[align=justify]
[align=right]
بسم الله الرحمن الرحيم
السلام عليكم ورحمة الله وبركاته

فيه مزرعة قريبة من الرياض إنتاجها طيب من كافة أنواع الخضار ،

عرضت على مدير المزرعة " أجنبي " فكرة أني أشتري منهم الخضار وأبيعها في سوق العزيزية بالرياض ..
فاستحسنها وأخبر كفيله ... المهم أن كفيله بيكلمني غداً للتفاهم إن شاء الله ..

إنتاج المزرعة متوسط ، وبيصفى يوميا من 40 صندوق مشكل وطالع على كلام المدير .


الإشكال .. والأسئلة التي أريد الإجابة عنها :

. كيف أتعامل مع البضاعة في السوق ؟

. هل لابد من دلال ؟

. بالنسبة للسعر .. هل لابد أن أعرف سعر مثلا الطماطم في السوق ، ثم أشتري من صاحب المزرعة بسعر أرخص من سعر السوق ؟ .. أم راعي المزرعة يحدد ؟ ...

[/align]

مع التحيـــــة والتقــدير ،،
[/align]

اخوووي لازم اول شىء تشووف نوع الخضار وشووووووو هل هوو مطلووب بكثرة ولا عادي يعني مثلا بعض الخضار مطلووب وفرتها بكثيرررررررررررررررررررررر مثل الباميه والكوووسه

ان كانت الكمية قليلة تقدر توزعها علي محلات الفواكه والخضروات بالمنطقة وتجي اخر الليل تاخذ قيمتهااا يعني اجل بس يووم واحد احسن لك من الحلقة
كل ماتبعد عن الدلال كل ماكان ربحك اكثررررر

يؤؤؤؤؤؤؤؤ اخوي لازم تعرف اسعارها بالحلقة كم ... عشان تقدر تعرف كم مكسبك لاتنسي انه في تحميل وعمااال وشىء يصلح وشىي مايصلح

بس ع العمووم الفكرة مرة حلوووة والله يرزقك

اولاً
لابد من الوقوف على النوعية قد تكون ممتازة او متوسطة او رديئة فلا تشتري شيئاً ل تره.
ثانياً :
الخضار كالبترول ترتفع وتنزل باليوم فكن على تواصل بأحد ممن هم في السوق ليزودك بسعر اليوم قبل الشراء ويجب أن يكون السعر أق من العزيزية.
ثاثا:
المزارع يريد البيع بأعلى سعر فلاتستسلم لرغبته.
رابعاً
العدد سهل ان توزعه على محلات الخضار بدون الدلال بس لازم يكون سعرك أفضل من العزيزية ونوعية خضارك

نوكيا . ألف شكر لك
دلوني على السوق . الله يجزاك خير
بالنسبة للخضار هي مشكلة وماشاء الله طيبة جدا
الله يكتب اللي في خير

من عنده فائدة فليفدنا

يا هلا يالحارث اول شي صل صلاة الاسخاره بعدين توكل على الله
السوق من متى ما جيته ؟ طب السوق الساعه 2 في الليل وشف الاسعار بس قبل كل شي
بقول لك الي عندي اول شي تعرف الجيد من الخضار والي مو جيد ولالا ؟
اذا تعرف كويس قل لراعي المزرعه عطني ثلاث ايام على اقل تقدير
وسجل انتاج مزرعته شف وش تنتج وطب السوق وشوف المطلوب وشو
بعد كذا اعرف اسعاره في حراج الفجر الي تكون السيارات فيه من الساعه وحده
والعالم تجي من ثنتين وحراج الظهر طبعا تبداء السيارات تجي من الساعه عشر ونص
اذا عرفت السعر والنوعيه المطلوبه ما باقي عندك الا شغلتين
الأوله تشوف الجوده الي عند راعي المزرعه والسعر هل منه مكسب ولالا
والثاني وانت في سوق العزيزية في الحراج اسأل اصحاب المؤسسات قل بشترك عن طريق مؤسستكم ولكم نسبه تصير تدخل سياراتك بأسم مؤسستهم وتعطيهم تقريبا خمسه في الميه
دور الين تلاقي اذا حصلت توكل على الله واختر النوع الطيب واشرف على التحميل والبيع بنفسك
وبالتوفيق بس لا تتكيسل شد العزم وابداء ترا ملينا من كثر لقيت مشروع وبعد يومين لا ما يصلح وزي ما طبو السوق غيرك وهم ما يعرفون عنه شي انت تقدر تدخل والمعلومات قدامك وبالتوفيق واي شي تحتاجه في السوق انا تحت امرك انا اكون هناك الساعه ثنتين ونص في الليل

شكرا لك أخوي آخر الصبح على الإفادة الطيبة
الله يكتب اللي فيه الخير
السوق آخر مرة عنه قبل يومين وسألت وشفت الوضع
طبعا راعي المزرعة وصلته اليوم وإلى الآن يفكر ويقدر
؟؟
الله يكتب اللي فيه الخير

ما شاء الله
الله يوفقك

الله يجزاك خير ياأبو يحي
ماكتب الله نصيب من هالمزرعة والله يبارك لراعيها فيها
طبعا آخر ماوصلني أنه تفتح مخه نحو التصدير للرياض ولكن عن طريق عمالة
ويحيى الوطن والمواطن
وتحيى الثقة في الحرامي

كل يدورعلى رزقه اخوي الحارث

ولا تزعل وانا اخوك يمكن تكون خيره
اول شي السوق الحين نايم ويمكن يكون التأخير فيه خيره لك
اهم شي وانا اخوك انت بديت صح لا توقف لا توقف انتبه تقول خلاص مليت
رح لسوق العزيزيه قبل الحراج الصباح ولا الظهر الي تبي قبل الحراج يعني وحده ونص الليل
او عشر ونص الصباح وشف السيارات الي جايه من المزارع ولا تتكلم مع الدلال رح لسواق
وترا الحل والربط عنده اعرف من وين جاي ومنهي مزرعته الي يورد منها واخذ علومه كلها
بس لا تكلمه قدام الدلال او اذا معه احد علشان كذا اقول لك قبل الحراج ونبهني لهالشغله واحد الله يجزاه خير
المفتاح السواق بس مهوب تجي مدرعم وكل سواق انت من وين ومن وين جاي الخ لا راقب السوق شف البضاعه الحلوه احتك بالسايق اول مره اعرف السايق لا تطب في الدلال وبالتوفيق وان شاء الله راح تلاقي بدل المزرعه عشر وسالفة المواطن وثقته في الاجنبي هذي حكايه نبيع بعشره ويبيع الاجنبي بثلاثين ويشيل منه ومبسوط وانت يقعد لك في الزله اليوم واحد مستقعد على صندوقين كوسه يبيها مع الجروم بسعر 18 ريال يعني الكوسه بالجرم 9 ريال سعر الجرم لحاله 3 ريال الى ربع يعني يبي صندوق كوسه بخمس ريال والاجبني يشيل منه على 25 و30 وهو يضحك