[align=center]
بسم الله الرحمن الرحيم
السلام عليكم ورحمة الله وبركاته
يااخوان انا قررت اسوي مغسلة سيارات متنقله
الاداوت..
جهاز غسيل بالبخار السعر 20 الف
سياره مثل حق توصيل المطاعم مستخدمه طبعا /السعر تقريبا 15الف
مكنسه كهربائيه تقريبا/800او 1000ريال
جهاز ضخ هواء 2000ريال
فتح مكتب خدمات من شروط المشروع
استقدام اثنين نفر هندي
تقريبا اجمالي تكلفة المشروع 50 الف
طبعا فكرتي عن المشروع كالتالي...
الغسيل الشهري مثل اتعامل مع 100 شخص اغسل لهم السيارات مره وحده كل اسبوع
السعر 70 ريال كل نهاية الشهر الاجمالي 7000الاف ريال بالشهر طبعا لو اتوفقت ولقيت 100 زبون يتعاملو معي بالشهر
من ضمن الافكار اتعامل مع المجمعات السكنيه غسيل سياراتهم و مع المدرسين وبعض الادارات الحكوميه
ابي يكون يكون فترت الغسيل مع الاشخاص اللي متعاملين معي مثل الدوام الرسمي
يعني ابدا بالشغل من 6 الصبح لين 2الظهر بعدها فترة بريك (راحه) لين الساعه 4العصر
وبعدها اطلع اشتغل الشغل الخاص يعني مو مع الاشخاص اللي متعامل معهم
مثلا لو 100 ريال كل يوم 3الاف فالشهر وهناك 7000 الالف مع الاشخاص اللي متعاملين معي بالشهر الناتج 9 الالف بالشهر رواتب عمال 2000ريال مواد خام وادوات نظافه 1000 بالشهر
الصافي بعد توفيق الله 6الاف بالشهر وافكر اطلب من العمال مبلغ 7الاف فالشهر والباقي لهم هم وطريقتهم بالشغل
طبعا من مميزات جهاز الغسيل يسغل ويلمع بنفس الوقت
ابي رايكم بالمشروع ممكن ينجح او لا وايش العقبات او الصعوبات اللي ممكن تواجهني
وكمان افكر استقدم عامل واحد واكون انا شغال معه
انتظر ارائكم واقتراحاتكم
[/align]

اول شيء لازم نعرف مدى نجاح هذا الجهاز الجديد ( مكينة الغسيل بالبخار )
ماشفت اي شيء يشير الى نجاحها والمعلومات الشحيحة تقول انه جهاز فاشل والزبون متخوف منه

الجهاز الشركه تقول عليه ضمان سنه وحده فقط
بس ان شاء الله يكون يمشي لا اكثر من 3سنين

معقوله محد له رأي بالموضوع؟؟؟؟؟؟؟؟؟

انا اتوقع ان شاء الله نجاحك بقوه بس انصحك باشياء \

-لا تخلي الحساب الى اخر الشهر بعد الغسيل مباشرة خذ حسابك الناس مو سوا
- سولك دعايه وهي كروت صغيرة ماتكلف شي واكتب خدماتك وارقامك وانك تروح لي مكان ووزع الكروت
بين اصحابك يوزعون على كل الي يعرفونهم من حولهم ولاتنسى مناطق التجمعات الرجالية من قهاوي وكوفيهات وغيرها ......................


اتمنى لك التوفيق اختك روووووووووووووح الغزال دعواتك

روح الغزال / الله يسعد قلبك
ردك رفع معنوياتي كثير وفكرتك روووعه بخصوص التجمعات عند القهاوي
شكرا لك

فكرة جيدة الله يسهل عليك
أنا ابوي و أخواني مايغسلون ملابسهم بالبيت دايم بالمغلسة يعني أن شاء الله بتلقى زباين
وأحرص أنك تجيب عمال يعرفون غسيل الملابس النسائية حقة السهرات لأن راح تدر عليك ذهب
أنا شخصيا مرة لما قلت لأخوي يروح يودي فستاني عند الغسال قال ب70 ريال طبعا أنا رفضت لأنه غالي
لكن لوأنت مثلاً تبي تحطه بسعر أقل من كذا راح تلقى زباين بالهبل .
على العموم الله يوفق ويسهل أمورك

اهلا اخي
فكرة رائعة ولكن ممنوعة من البلدية

لاني قرأت عن فكرة مشروعك في احد المنتديات ان احد اشباب ذهب الى البلدية واستفسر وقالوا له ممنوعة ويمكن تصادر السيارة منك ولكن لايمنع انك تستفسر وتتأكد

اتمنى لك التوفيق