مدخل

ساعات أحس إن الزمن
قاسي ولايمكن يلين
وساعات أحس إن الفرح
محال ولايمكن يحين






إيه والله قهر ...!!
من بعد ماتابعت ثلاث كؤوس عالم متتالية (1998 - 2002 -2006) --> ترى ماني بشايب

راح تفوتني أول كأس العالم ---> طبعا بسبب الدورة العسكرية

قهر والله قهر ..!!
وإلا بالله عليكم .. {حاكم بيزنطة } هالدلخ الكهربجي اللي علاقته بالكورة مثل علاقة شايب عمره 70 سنة بالرضاعة
يجلس بالكازينو ويشفط بالمعسل مع براد شاهي عدني
ويشوف كأس العالم وهو مايدري وين الله حاطه وانا ما اشوفها


وإلا { م } يجلس ويحط رجل على رجل ويتابع كأس العالم يحسبها مثل متابعة سالي وهايدي --> صدق اللي مايعرف الصقر يشويه

وإلا { زيدان } قبل كم شهر يسألني كيف نظام الدوري السعودي ..!!
والحين جاي يقول أنا أشجع منتخب الديوك

واللي يفقع المرارة حتى { متحنكف } اللي مايعرف حتى الركنية كيف تلعب
صار يكتب قصائد بمناسبة قدوم كأس العالم
وآخرها قصيدة اللي اول بيت فيها يقول :

ياكاس العالم تراك اشغلتيني
أخذتي أهتمامي وحبي كله


واللي زوود يقهر حتى البنات اللي علاقتهن بالرياضة عموماً وكرة القدم خصوصاً مثل علاقتهن بالتفحيط
صاروا يشجعون ايطاليا
على فكرة ترى توتي مابيشارك

الله يهديك ياسعادة اللواء .. ليش مددت الدورة 3 أشهر اضافية ..؟!

وتحرم 800 مجند يعشقون كرة القدم أكثر من عشق اهل الرياض للبيك

وتحرمني شوفت محبوبي المنتخب الهولندي -->عسى الطاحونة الهولندية تطحن كل المنتخبات

الناس يوم الجمعة متحمسة لكأس العالم وتحضر المكسرات والنعناع
وأنا في وقتها رايح لمركز التدريب
وماخذ لي في الطريق قهوة تركية او ميكاتو لعل وعسى اني انسى فيها هموم كأس العالم


[mark=#990033]المطلوب [/mark]

من يقدر يكلم جوزيف بلاتر يأجل كأس العالم الى شهر 12

لأن كأس العالم هذه أتوقع بتصير أسوأ كأس عالم في التاريخ
لأني ماراح أتابعها

وأتوقع بل ومتأكد إن جوزيف بلاتر لو يدري اني ماراح أتابع كأس العالم كان يصدر قرار بتأجليها الى 2011

واللي يقدر يقنعه ترى راتبي حق هالشهر حلال عليه

وأنا غايب كل هالفترة إحتجاجاً على عدم مشاهدتنا انا وبقية زملائي بالدورة لكأس العالم



مخرج

أشكي مرارة حيرتي
بدنيا ماظني بتزين
وإذا بدى بعيني الامل
تجد أحزاني وتبين