المشاركة الأصلية كتبت بواسطة وعدالاماني

بقولكم ايش صار معاي في مدرسة قبل يومين كلمتني
وقالوا حضري درس وتعالي اشرحي

عاد أنا طرت من الوناسة من زمان عن التحضير والحماسة
المهم رحت لهم الساعة 8 وقالت انتظري الين نلاقي لك حصة؟؟
مفروض انهم مضبطين وضعهم من اول
كفاية اخوي جلس بالسيارة في عز الظهر ينتظرني

المهم قلت يلا ننتظر ونشوف
جاتني ادارية شكلها مو سعودية قالت كم تتوقعي الراتب؟؟
قلت في نفسي: احتمال يعطون الوحدة على حسب توقعاتها>>على نياتي
قلت لها الفين ومافوق>>هع هع هع

قالت لا رواتبنا 1600
قلت والاوامر الملكية اللي قالوا عنها قبل كم يوم؟؟
قالت لسه عليها
قلت: طيب الموارد البشرية ماتدعمكم؟؟
قالت للأسف لا...

آخر شئ استسلمت وقلت: اهم شئ آخذ شهادة الخبرة

بعدين دخلت اشرح الدرس وحضروا ثلاث معلمات
وشرحت لهم الانجلش وتفاجأت انهم مو فاهمين شئ؟؟
حتى اسألهم عن تاريخ اليوم يطالعوا مفجوعين؟؟
والمشكلة انه الادارية تقول: احنا ندرسهم انجلش من الروضة>>لأن المدرسة مجمع روضة وابتدائي ومتوسط

بس اللي شفته من عدم تفاعل الطالبات خلاني اتوقع انهم ماعمرهم سمعوا انجليزي
أو ان المعلمة اللي قبلي تشرح بالعربي وتمشي حالها

المهم في نص الدرس قالت الادارية خلاص يكفي شرح

واخذتني برا وقالت لو سمحتي املئي الاستمارة حقت التوظيف
قلت : يعني اداوم بكره؟؟
قالت : لا المعلمة لسه موجودة؟؟؟
كأني انلطشت كف

يعني مشوار طريق واخوي تحت الشمس ينتظرني وتحضير وآخرتها يضحكوا علي؟؟
طيب ليش ماخبرتني من أول؟؟

تقول المعلمة موجودة بس احتمال تولد شهر 5 ونبغاكِ مكانها إذا ولدت

النهاية رحت للبيت وجالسة انتظر ولادتها بالسلامة