السلام عليكم ورحمة الله وبركاته

طبعاً بما إني شفت كذا عضو يبون الطلبات بالكامل حقت الدورة المطلوبه في الموقع واللي مو مطلوبه .

قلت أبشروا بضبطلكم موضوع يخص الطلبات فقط وبنزل فيه أكبر شي أعرفه واللي يضيف شي جزاهـ الله خير ..

بسم الله نبدأ بالطلبات المطلوبه في الموقع ...

1- لبس رياضي نص كم لون رصاصي عدد (( 2 )) << طبعا لون رصاصي لمجموعتي المجموعه الخامسه عاد كل مجموعه على حسب لونها .. اهم شي يكون طقم البنطلون والتيشرت يعني كلها لون رصاصي وكذا ونص كم .

2- أصل بطآقة الأحوال مع 5 صور للبطاقه مكبرهـ وواضحه منها .

3- 5 صور شخصيه بالزي الرياض مكشوفة الراس .<< يعني بعد ماتحلق صفر تطق اللبس الرياضي المطلوب عليك وتروح تصور خشتك عند أقرب مصور .

4- قبعه بيضاء عدد (( 2 )) .

5- جزمة رياضيه سوداء (( عدد 2 )) << على فكرهـ اللي يستطيع يروح المتجر الوطني هناك عندهم جزم طبيه تخلي الواحد ماتتعب رجوله وماتجيب للواحد الحساسيه .

6- شراب اسود عدد 10 << هذا المطلوب لكن اللي يبي نصيحتي يجيب 30 شراب عشان الريحه .

7- مقص اظافر عدد (( 2 )) .

8- دفتر أبو 80 عدد (( 5 )) .

9- صابون سائل للأيدي عدد (( 2 )) .

10 - صابون جل معقم عدد (( 2 )) .

11 - (( 2 )) شامبو , (( 2 )) منشفه , (( 2 )) معجون اسنان وفرشه .

12 - ملابس داخليه عدد (( 10 )) وطبعا هذا المطلوب لكن بقولكم كذا شي يتعلق بذا الطلب

أول شي فنايل داخليه مو شرط يعني لو تجيب 5 بالكثير زين لأنك ماراح تلبسها لأننا في جو حار مايحتاج الواحد يلبس فنايل فوق بعضها في الحر ويحرق نفسه .

ثاني شي االسراويل الصغار هم طالبين 10 لكن انتم جيبوا 30 احسن لكم عشان الحساسيه والقرف .

ثالث شي السراويل الطويلة مايحتاج لكن جيب 3 او 5 للنوم فقط اذا ماتعرف تنام بالبيجامه .
رابع شي أفضل شي في الملابس الداخليه القطن اللي يجي لاصق عالجسم عشان يمتص العرق .

13 -بيجامة نوم لون سماوي عدد (( 2 ))

14- قلمين أزرق او جيب 5 اقلام احتياط .

هذا مافي طلبات الأمن العام

لكن اللي رآح نضيفه في الموضوع

1- البودرة حقت الحساسيه وطبعا كلكم تعرفونها لانكم استخدمتوها يوم كنتوا اطفال وتشوفون امهاتكم يحطونها في حفايظ وراعينكم طبعا جيب منها 2 علب كبيره افضل شي عشان حساسيه الخصيان والإبط .

2- عصار شد المفاصل وذا اشتر منه 5 لأنك ماراح تقدر تنام الليل من غيره كثير يجيبون فكس وصدقني فكس بس بيخلي الناس يشردون منك لأن ريحتك خايسه عشان كذا العصار هذا افضل شي .

3- شرشف جيب معاك 2 مثل حقت المستشفيات تجي شرشف ثقيل يدفيك ويكون خفيف الحمل احسن من البطانيه . وترى ان ماجبت شرشف بتتوهق هناك بطانياتهم مثل بطانيات التوقيف .

4- منشفه صغيرهـ من اللي تشوفونها على كتوف الكدادين عشان تحطها على المخده لان أكيد المخده تكون ريحتها وسخه .

5- معطر ريكسونا حق الجسم عشان ريحة صنانك انت وياهـ مايكتم اللي جنبك وياليت كل واحد يكثر من ذا المعطر خصوصا في ال45 << والله لو يشوفون شركة ريكسونا وانا اسوي لهم اعلان هنا يحطوني في الاعلانات حقتهم في ام بي سي .

6- شنطتك حط فيها قفل من اللي يقفل على السحاب يمسك السحابين في بعض اتمنى فهمتوني القفل صغير الحجم ويبقى المفتاح مربوط في سروالك عشان ماحد يسرق اغراضك لان هناك في وراعيين وسخين كثير وانتبهوا على اغراضكم لاتقول بتحطها تحت المخده والله من التعب لو يفسخونك الظاهر ماتدري .

7- أمواس حلاقه وذي مهمه جدن لأنك بتجلس عندهم 45 يوم او على حسب حسبة حموني 38 يوم بالضبط يعني لازم امواس حلاقه عشان باطك الخايس وشعر العانه تحلقها على طول وتبقى نظيف وطبعا ياليت كل واحد قبل لايخش الدورة يتعلم في وجهه كيف يحلق دقنته بالموس .

........................

الحين بظيف طريقة استخدام البودرة عشان يكون الموضوع كامل .

البودرة مثل حقت الحلاقين اللي يحطها قبل التنعيم .. اذا اخذت دش ونشفت جسمك تحط في يدينك البودرة وترشها على خصيانك وفخوذك وباطك لأن الباط لو جاتك فيه حساسه اتحداك تستعد مضبوط ماتقدر وكذلك الفخوذ لو جاتك الحساسيه (( الحفى )) والله لاتقدر تجري ولا تستعد يعني غرق جسمك بالبودرة ذي في مناطق العرق .

هذا وصلى الله وبآرك

أي استفسار حياكم الله

ولاتنسون التقييم ترآني جالس اعسل واضبط الموضوع يعني مجهود شخصي .