السلام عليكم ورحمة الله وبركاته











الإنسان حياته مليانه مواقف منها الزين ومنها الشين ومنها اللي يخليك تكره الدنيا ومافيها
وصدمات وغيره من ذا الأمور ...

لكن البلا فيه مواقف تصير كثير وترفعلك الضغط 60000 فولت يعني الشياطين ذاك الوقت

سيبت العالم كلها وجاتك ...

نبي نذكر بعض المواقف اللي ترفع الضغط واكثرها من واقع تجربة حياتية ..

وكلن منكم الله لا يهينكم يطرحلنا موقف خلاه لو جنبه فنجال شاهي توه صابه يقبعه في اللي قدامه



الأول ////

يوم يجيك يوم وتطلب من واحد شي انت محتاجه وهو في غنى عنه وتشوفه يعطكيه بطيب نفس

ومايمر يومين الا وتكشف ان اللعين نظره بعيد وناويله شي وتلقاه يجي يطلب منك شي انت ماتقدر
تستغني عنه ابد واذا اعتذرت منه قالك انا معطيك الشي الفلاني وماقلتلك شي والحين تقلي مااقدر
( يعني نيته يتمنن عليك ويذكر افضاله ويحط نفسه ذيبان وهو ماعندك احد )

وانت في ذاك الوقت على طول بترمي اللي اخذته منه في وجهه وبتلعن اليوم اللي طلبته شي

من يطلب الناس لا بد ويقل مقداره .... حتى لونها اشياء يرثيلها الحال

انتبه قبل يبيحلك الزمن بأسراره .... ويمن عليك بكرة الذليل بريـــــال
الشكوى لله

الثاني ////

يوم تجلس من كم واحد وتسولفون الا وواحد مغتابله واحد عندك وتجي بتهرج الا ويجيك الثاني
يقوله عيب عليك تهرج عليه وهو ماهو فيه < < للآن حلو
لكن البلا انه قبل كم يوم جايك علم انه هرج عليك من وراك والحين جاي ينصح

(هذا اللي يقال عنه يأمرون بالمعروف وينسون انفسهم)


قوم ليـــــا جيتها رفت شواربها
000000000بالضحك وقلوبها فــيها الردى كالي
وقوم ليــــا جيتها صكت حواجبها
000000وأبدت لي البعض في مقـفاي وإقبا لي

الشكوى لله


الثالث///

يوم تجي ناوي شي براسك وتجي تعلمه واحد وتقله تكفى لا تعلم احد الين يتم الامر
ويقولك ابشر ما يهمك سرك في بير وتحس انه ذيبااااان وان سرك محفوظ

وما يعدي يوم الا ويجونك الناس ( عالبركة سمعنا انك بتسوي الشي الفلاني)

وخافيك للناس لا تفك أسواره ... ومن فكه طاح من عين الرجال
الشكوى لله



الرابع ///

يومك تقوم بواجب شخص وتقوم بحاجته عن طيب نفس وماهمك الا رضا الرحمن ثمن رضاه

ويجيك يوم انت في امس الحاجة للقيام بواجبك وتلقاه بكل بسااااطة يسحب نفسه

الشكوى لله

وينك يوم الرجال تحتاج واجبها ... وهي ماقصرت معك في حاجة
اثرني بالاول ماكنــــت حاسبها.... ونظرتي كانت فــيك منعاجـــة
الخامس ///

تجلس مع ناس انت عادهم جميع رجال وطيبين ويجيكم ضيف فالجلسة ويسولف معكم
وتلقى سوالفه ماتمل من قصيد وقصص وسوالف وغيره وتقومون بواجبه
ومن ثم بعد مايروح ينقزلك واحد من اللي انت جالس معهم

ويقول ::هذا منهو ؟ ويجاوبونه فلان ..
ومن ثم يقول ::: اييييييه عرفته هذا كل راس ماله ناقتين يرعاها وحنا موجبينه ورافعين مقداره

((( ذاك الوقت ماتملك الا انك تهفه باللي جنبك وتطرده من المكان اللي انتم فيه )))

(( وهذا اللي يقولك يقيس الناس بالرصيد ماهو بالافعال ))

وطايح ٍ من عيني ارجال عندي كان وين,,,,=وحاقر ٍ منهو يقيس الاوادم بالرصيد
الشكوى لله


السادس ///

يومك تعرفلك واحد سوالفه ماتملها وهروج مابه زيها وتكون عنه فكرة مبدأية انه مافيه منه

وان خوته تشرى ... ويجيك يوم يجيه واحد يسب فيه وهو مايسوي ولا شي وخايف منه

وكل ماشافه في جلسة يهزيء فيه ....... والمصيبة انك تلقى اللي انت عاده رجال ساكت ويقدر
اللي قاعد يهزئه ..

(( هذا اللي يقال عنه ,,,, ولا الردي لا حصل من يهينه قدره )

الشكوى لله

يعطيك العافية
وشكرا على الطرح

لا هنــــــــــت وكلام في محلهـ ـأعطــاكـ ـأللــــــــه ـألــــــــعــــــــــــافيهـ
تقبلـ
مروريـ
وديـ

يعطيك العافيه

شفنا من هالمواقف كثييييييييييييير
يعطيك العافية

بصراحه موضوع مميز والله يعطيك العافيه

وعليكم السلام ورحمة الله وبركاته

اقتباس:

المشاركة الأصلية كتبت بواسطة صقر ورقان الثاني //// يوم تجلس من كم واحد وتسولفون الا وواحد مغتابله واحد عندك وتجي بتهرج الا ويجيك الثاني يقوله عيب عليك تهرج عليه وهو ماهو فيه < < للآن حلو لكن البلا انه قبل كم يوم جايك علم انه هرج عليك من وراك والحين جاي ينصح (هذا اللي يقال عنه يأمرون بالمعروف وينسون انفسهم)

والله تصير كثير
يسوي ابو الاخلاق على راسك
ويما تزعلت معا شباب عشان هذا الموضوع
عوافي على الفضفضه صقر ورقان