المشاركة الأصلية كتبت بواسطة غريب الاوطان

زي ما قالوا الاخوان عليك بالاستغفار

لكن من هنا لين يتيسر لك الليموزين ولو اني ما ادري يسمح لك فاضن سمعت من كم سنه ان في شركات ليموزين تأجر على السعودي بمبلغ يومي اضن 50 ريال او حول المبلغ هذا وإذا تعسرت عليك

وما ادري عن سيارتك تضبط للمشاوير الطويله زي الرياض الطائف مكه جده او باقي المدن او على الاقل للقصيم او باتجاه الخرج

مشاوير الكداده في العاده إذا كان نفر واحد ومشوار خاص فكل 10 كيلو سعرها 10 ريال وإذا كان حمولة ركاب على الماشي فالـ 10 كيلو كل راكب يدفع ريالين ثم تضرب في المسافات يعني 50 كيلو حق مشوارها للراكب مشوار خاص 50 ريال ومجموعة ركاب كل راكب يدفع 10 ريال وهكذا 300 كيلو مشواره الخاص 300 ريال وإذا مجموعة ركاب يدفع الراكب الواحد 60 ريال وزيه 400 كيلو المشوار الخاص 400 ريال وإذا مجموعة ركاب الراكب 80 ريال في داخل الرياض تقيم المسافه للمشوار 5 كيلو 5 ريال و 10 كيلو 10 ريال وهكذا ما عدى في حالة يكون الزحام شديد في المشوار الي تطلع له تقيم الوقت الي ممكن يضيع عليك وتضيفه لحق المشوار للمسافه وإذا كانت سيارتك جديده بتلاقي سهوله من الركاب الي بيدفعون خاصه للمشاوير الطويله وإذا كانت سيارتك قديمه برضوا بتلاقي سهوله للركاب الي ما يبون يدفعون مبلغ عالي

بالرغم اني عشت في الرياض لكنها المدينه الوحيده الي ما كديت داخلها الا بعشره ريال وباقي المدن اتمشور فيها وقت ما ابي فلوس واطلع حق البنزين ومصاريف اليوم فما عندي خبره في الرياض لكن قياس عليها وتشابه المكده في باقي المدن

اول حاجه تخطر في بال الكداد اذا سيارته تمام هي المواقف للجايين من المدن والي رايحين لها فإذا سيارتك تمام تتجه لها وتخليك وسيع بال وتنتضر اي مجموعه رايحين لاي مدينه وتشوف كم المسافه وكم حمولة سيارتك ثم تقسم المسافه على خمسه لجل تحدد المبلغ الي تطلبه من الراكب الواحد فيهم

الشي الثاني الي يخطر على بال اي كداد بيكد داخل الرياض هو الي جايين طيران واضنه صعب او الي جايين بر نقل جماعي ثم زي ما قلت تقدر المسافه بالكيلو وتحط قيمة المشوار زي عدد الكيلو الي بتقطعه الا في حالة ان تتوقع ان المنطقه الي بتروح لها ماراح تلاقي ركاب او زحام فتقدر المبلغ للوقت الضايع عليك

الشي الثالث الجامعات والدواير الحكوميه الي تتوقع ان مافي سيارات تقل الطلاب والموظفين وهذي بتلاقي ليموزينات تتزاحم عليها لكن انت مجبر ان توافق على المبلغ الي يحدده الراكب مقابل ان يتخلى عن فكره الركوب مع ليموزين ومثله الاسواق او على طريقك في الشوارع وانت تتمشور

الشي الرابع وهي طرق الباصات والحافلات ابو ريالين او ابو ثلاثه او ابو خمسه او ابو عشره وهي حلك البديل اذا جربت المكده بالمشاوير الخاصه او الي تعطيك مبلغ افضل فهذول يكون محدد السعر ويكون متعارف عليه وتركب في طريقك على الماشي وتنزل الركاب على نفس الطريق او الى نهايته

إذا ما تعرف وين المكان الي بتوصل له فإسأل الراكب يعرفه او لا وهو راح يدلك
حاول ما تكون طماع وإذا لقيت المشوار الاول لا ترده
تأكد من الاثباتات للعماله عشان ما توقع في احراج وحاول يكون معاك صرف عشان ما تضيع وقتك
اعتبر ان مشاويرك عباره عن دوام تجني من وراه راتب
لا تجازف بالسرعه لانك راح تكون مسؤول عن الركاب الي معاك
إذا صادفت راكب ضروفه صعبه اعتبر انك جالس تفرفر بحث عن ركاب
إذا فاتك راكب او كان من نصيب كداد غيرك فهذا رزقه مقسوم له وكمل طريقك او انتضارك وان شاء الله بتلاقي رزقك

هذا الي اقدر افيدك فيه وإذا محتاج اوصلك مشوار ارسل لي رساله خاصه وقلي على وين تبي