[align=center]
بسم الله الرحمن الرحيم
السلام عليكم ورحمة الله وبركاته
[/align]

[align=justify]
أخواني وأخواتي بمنتديات البطالة حياكم الله ..
الحمد لله رب العالمين إحنا في المنتدى مثل الجسد الواحد إذا إشتكى منه عضو تداعى له سائر أعضاء الجسد بالسهر والحمى .. يجمعنا هم واحد وتعب واحد وتفكير واحد رغم اختلاف اهدافنا .. ولأن الإنسان لا يؤمن حتى يحب لأخيه ما يحب لنفسه كان واجب على كل واحد فينا يخلي غيره يستفيد من تجربته .. وحرصاً عليكم والله ولأني ذقت الأمرين بحياتي قررت أكتب لكم تجربتي في الحياة من الألف للياء .. ورغم صغر سني لكن والله إني شفت كل شيء بحياتي زين وشين .. إقرأوني بتمعن و تركيز .. لأجلكم ليس لأجلي ..

عشت طفولتي في بيئة مخملية و مرتاحة جداً جداً مادياً .. يعني بالعربي عشت طفولتي مدلع .. ما عمري سمعت كلمة لا .. ما كانت حالتنا المادية ثراء فاحش لكن كانت فوق المتوسط .. وكانت احلامي وطموحي يتعدى السحاب .. كنت أبي أشتري قصر لأبوي وقصر لأمي وسيارتين بسواويقها لأبوي وسيارتين بسواويقها لأمي وقصر لكل واحد من اخواني .. وأخلي كل هالقصور جنب بعض عشان نكون قريبين من بعض لأني أصلاً أميل للجو العائلي .. وكنت أحلم إني أتزوج وحده تحبني وأحبها وبخليها تلف العالم معي وبخليها تزور سور الصين العظيم وتتمشى بحدائق بابل وتصور جنب برج ايفل .. وبسكنها بقصر كبير وبسخر لها الخدم والحشم رهن إشارة عيونها .. وكنت ناوي أدخل عيالي أحسن مدارس بالعالم .. وكنت أحلم إنه تكون عندي مجموعة شركات قابضة مثل حقت الوليد وكنت احلم إني أبني مساجد بكل العالم واسوي جمعيات خيرية ما تتشرط على المساكين ..

ولأني كنت أعيش في بيئة شبه ثرية ما كانت هذي الاهداف بعيدة عني .. مجرد خطوتين وأوصل .. لأن كانت كل الأدوات بيدي طبعاً بعد توفيق الله .. لكن فجأة وبلا ميعاد والحمد لله على كل حال انقلبت حالة عائلتي 180 درجة من عائلة شبه ثرية الى عائلة شبه فقيره أو تحت المتوسط .. وهذا الشيء أثر على نفسياتي كثير .. وين الي كنت أحلم فيه؟ وكيف بوصل له الحين؟ وكيف بحاول أواسي نفسي؟ وكيف وكيف وكيف؟ كانت أسئلة كثير تدور في رأسي!

إنصدامي من الفرق بين قدراتي السابقة وقدراتي الحالية سبب لي أزمة نفسية .. وعشان أكون صادق معكم أكثر زاد هالأزمة النفسية قصة حب كنت أعيشها وإنتهت بالفشل الذريع على جميع الأصعدة .. عشان كذا تأثرت نفسيتي وصرت ساكت وسرحان دايما .. وحسيت نفسي ما عاد اقدر اعيش وبنفس الوقت ما عندي استعداد اتنازل عن هذي الأحلام الي كنت احلم فيها والسبب مجرد ان عائلتي اصبحت فقيرة فجأة!
كان هذا السبب اشوفه تافه جداً وسخيف والسبب ان طموحي عالي وبداخلي شيء يقول لا تتنازل عن احلامك!

العوامل الي ذكرتها التحول المادي المفاجئ وقصة الحب الفاشلة أثرت على دراستي رغم اني كنت متفوق فيها وبإمتياز والمشكلة انها جت بوقت خطير جداً وهو قبل امتحانات ثالث ثانوي النهائية بفترة بسيطة جداً .. لذلك تأثر معدلي وما قدرت ادخل الجامعه رغم اني ما كنت احلم وما زلت اني أدخل قاعات الجامعه وأحصل على البكالوريوس والماجستير والدكتوراه .. وبسبب ضعف المعدل إنتسبت إليكم يا جماعه العاطلين وقررت اني عشان أحقق أحلامي لازم اشتغل بالتجارة ..

وفعلاً أذكر إني بدأت بتجارة المساويك .. وكنت اجلس عند المساجد حتى بعد صلاة الفجر أبيع مساويك .. والله يا جماعه فيها خير كثير المساويك هذي بس يبغالها صبر و جلادة .. كنت اشتريها جملة لما كنت ساكن بالرياض ( قبل ما انقل للمدينة ) كنت اشتريها جملة من سوق نسيت والله اسمه بس اكيد تعرفونه سوق شعبي بالرياض اظن اسمه الديره سوق العجايز .. وترى بيع المسواك مو بس بريال .. تأكد تماماً بيجيك واحد يعطيك عشرة ريال وياخذ منك المسواك بريال ويقول لك خل الباقي معك .. اذكر جاني واحد عطاني مية وقلت له ما عندي صرف والله قال هات المسواك ومالك شغل قلت له كم واحد تبي قال واحد بس والله عطيته المسواك وعطيته المية ريال حقته وقلت رح الله يسهل عليك مابي منك شي قال خل الباقي لك انا اشجع الشباب السعودي تستاهل .. و عشان اكون صادق معكم استغليت نقطة قوة فيني وهي موجودة بكل شاب سعودي .. وهي لبس الشماغ والعقال أثناء العمل .. ترى هذي مفيدة جداً جداً لأنك بتلفت الإنتباه لك وبيستغربون سعودي يشتغل هذا الشغل .. وتأكد بيرزقك الله سبحانه وتعالى من حيث لا تحتسب .. المهم اني بيوم من الايام كنت اتفرج على صور قصر الوليد بن طلال وحسيت بغصه في قلبي لأني طلعت دخل المساويك من جيبي وعديته لقيته حوالي 220 ريال بس وسويت مقارنة بين المساويك وقصر الوليد وتحطمت وقررت اني اترك المساويك بلا عودة ..

وبما انه ما كان عندي راس مال قوي ما كنت اقدر افتح محل .. عشان كذا قررت اتوظف .. وحطيت سيرتي الذاتية بمواقع التوظيف ودق علي واحد .. قال انا عندي محل خضار بالشرقيه وابيك تصير فيه كاشير وسكنك واكلك وشربك على حساب المحل وراتبك 2500 ريال لكن دوامك يوميا ما عندك ولا يوم اجازة ودوامك بيكون من الساعه 7 الصباح الين الساعه 12 بالليل بدون توقف حتى يوم الجمعه دوام قلت له عطني فرصة يومين افكر وأتخذ قرار .. خصوصا اني بكون بعيد عن اهلي ووقت الدوام الي بيهلكني .. لكن كان الحلو بالموضوع اني كنت بااخذ الراتب وما اصرف منه شي لان سكني واكلي وشربي على حساب المحل .. وفعلاً إتخذت قرار شجاع ورحت وقررت اجمع راتبي .. وفعلاً رحت .. وكنت محافظ على اوقات الدوام ..

أول إسبوع مر حلو وعادي وكله حماس وزيادة احلام
ثاني اسبوع حسيت بشوية ملل ..
ثالث اسبوع بدأت أتعب من جد ..
رابع اسبوع ضربت فيوزي

لأن وقت دوامي كان صعب جداً كنت اشتغل لمدة 17 ساعه باليوم تقريباً بدون توقف .. لكن رغم كل هذا تحملت وصبرت وضغطت على نفسي وكنت كل ما اقرر اترك الشغل أفكر بالحسناء الي بخطبها وانه لازم لها مهر وذهب ومدري ايش ومدري ايش وكل ما تذكرت موضوع الزواج تنحت ومسكت ارضي وهجدت .. استمريت معهم تقريبا ثلاث شهور .. لكن بعدها تركت الشغل لاني والله حسيت نفسي تغيرت وشيبت وحسيت اني ما اخذ كفايتي من النوم والراحة وخصوصا انه كان في أمل رغم انه ضئيل اني ألقى وظيفة بنفس الراتب بيوم من الايام بالمدينه وانا مع اهلي ..

المهم بحكيكم عن تجارة الخضار لأني عشت وسطها وعايشت كل أحوالها .. أنا قبل ما أشتغل بالمحل كنت بصراحة أنظر للخضار والفواكه انه مكسبها بسيط جداً ولا يفتح بيت ولا يسوي شي .. لكن انصدمت بالعكس تماماً .. والله يا جماعه الخضار والفواكه كنز ما يدرون عنه الا الاجانب وفاتحين بيوت بدولهم من الخضار عندنا .. تصوروا كنا نشتري صندوق الخيار بريالين او ريالين ونص واذا مرة غالي بثلاث ريال وما نبيعه بأقل من 14 ريال .. تصوروا محل خضار فتحة وحده يدفع رواتب عمال مجموعها 18 ألف ريال بالشهر .. والله يا اخوان لما كنت كاشير وصلت لمرحلة ما عاد ادري وين احط دخل المحل من كثره.. ما كنت امشي الا بجيبي اليمين خمسه الاف وجيبي اليسار ست الاف وجيبي الي قدام ست الاف وشوي .. بالاخير بديت اخاف على نفسي وقلت لنفسي لو احد بالشارع يدري بالموجود بجيبي بيخطفني وبيطلب فدية .. بالاخير قلت لصاحب المحل ياخوي افتح لك حساب احط فيه فلوسك لاتنكبني وتقروشني بعدين ..

وجربت اشياء كثير والله .. وفزت كثير وخسرت كثير ... وانكسرت كثير وكثير .. لكن كل هذا كان خبرة .. هدفي الي أبي أوصل له من الموضوع هو إني أنصحكم إنكم تتصالحون مع أنفسكم وتتفهمون ظروفكم ووضعكم .. ولاحد يطمح بشيء غير معقول .. خلي اهدافك واضحة ومعقولة وقدر الامكان عشان ما تنصدم بكرة .. وتصير من أسوأ لأسوأ لا سمح الله

لا أحد يفهمني غلط ويقول لي ليش ما تبينا نطمح .. بالعكس .. أنا حكمتي بالحياة ( حياتك هي طموحك ) لكن لا تخلي طموحك يكون سبب في خسارتك وموتك بحسرة .. لكن عشان ترتاح وتعيش بهدوء و راحة وسكينه لازم يكون طموحك قدر الامكان .. لاتحلم عشان ما تنصدم بعدين .. وتأكد تماماً الطموح هو عدو الرضا .. واكيد هدفنا كلنا نعيش برضا ..

الي أقصده لا أحد يقول لي أنا بسوي مثل الراجحي كان يصرف قروش بالشارع وصار من الاثرياء .. الزمن هذاك غير زمننا هذا .. في هذاك الزمن كانت الفرص كثيرة والكفاءات نادرة .. عشان كذا أي واحد يبي يصير ثري يكفيه سنتين .. لكن بزمننا هذا الفرص قليلة والكفاءات كثيرة جداً .. الحين بكل بيت فيه جامعي وفيه شباب معهم شهادات .. لكن عاطلين .. لا تفكر انك عايش بالحياة لوحدك .. ولا احد يقول بتاجر وبعد عشرين سنة ( يمكن ) أصير ثري مثل الراجحي .. يا حبيبي العمر كم عشرين سنه فيه؟
شوفوا معي هالصوره :



شوفوا كيف يحاول يمسكها؟ طموحه إنه يمسكها وبيجلس طول عمره يحاول يمسكها
لكن أبداً ما راح يقدر .. لأنها مو مكتوبه له و مو نصيبه .. راح عمره وهو يحاول ..
[/align]

[align=center]
أخوكم من المدينة المنورة :
باكر
[/align]

أهلاً وسهلاً عبقور زمانه وحياك الرحمن ولك بالمثل إن شاء الله