طبعا الكل بيدخل فاغر

عشان طاري الخمسه مليون لكن بقولك حاجه ان القرض ربوي

الكثير فغر اسرع من البرق والكثير تحطم اسرع من الرعد وهذا القرض شي واقعي ومعروض علي من فتره وللاسف ان الضروف احيان تحد الواحد للتفكير بشكل خاطئ والشيطان والنفس امارين بالسوء والله يجيرنا من وسوستهم

القرض يا احباب مو من بنك لكنه من ملياردير أسأل الله أن لا يجعل أمواله وبال عليه ووصولي للاقتراض منه سهل جداً والسبب ان له اكثر من 60 سنه وهو صحبه من عمي اخو الوالد وما استبعد انه بعد هو مخربها زيه فعلاقتهم مع بعض قويه والصاحب بالمصاحب يصحبو ومره دخلت عليه ولقيت معاه فلوس والله حتى البنك ما يحط زيها مغير رزم ام خمسميه مكدسه على بعض والمشكله يقول قبلها بيوم يا ولدي ما معي ولا ريال ويتشكى وصدقته وبغيت اعطيه ريال واقول ادعي لي ومن بعدها ما صرت اصدق اي واحد يقول ما معاه ولا ريال علطول اتخيل الرزم وابطل ارثي لحاله

المهم ان الرجال عامل صحبه هو وعمي وعمي فال ابوها مغير يتسدح على الفلوس ويتشكى ان ما عنده ولا ريال والرجال طايح توزيع فلوس بشرط يكون معرفه او عن طريق المشكواتي عمي ابو الرزماتي وجالس الشيطان يوسوسبي كلما تذكرت الرزم ومحتار في القرض نفسي اخذ قرض لكن ما يكون ربوي يعني يكون باسلوب البنك ان اشتري سلعه منه ثم ابيعها واخذ الخمس مليون واقصده واعطيه مكسبه اذا ربح المشروع ولو ان الافضل انحاش لاوربا واخليه يتوطى في بطن عمي بس الورطه ان بكون اكلت مال حرام يعني صبها وردها

ابي مشورتكم لان مجرد اكلمه راح اخذ خمس مليون فهل اذا كان بشتري سلعه ثم ابيعها عليه واعطيه كاش ثم يقصدلي << حلو اعطيه هات الفلوس بلا فشكلك اما اعطيه ويقصد لي حلوه وانا ودي اصير مليونير واتشكى زي عمي واقول ما معاي ريال بس راس مالها عشر رزم لو فردتها ما سوت في الغرفه شي والحاجه الثانيه وش المشروع المناسب لان فكرت اخذ قطعة ارض كبيره في منطقه فاضيه زي مثلا الربع الخالي واقسمها وابيعها على البعارين << مشروع كسبان مره او اشتري قطعة ارض زاوية تسعين بدل ما تكون افقيه تكون عموديه واعمل فيها اعشاش وأجرها على الطيور المهاجره تعرفون الطيور تتنقل من ديره لديره ومحتاجه لفنادق صغيره وسونا صغار وبوفيه مفتوح صغير او ما ادري وش المشروع المناسب محتار وانا افكر وما ادري وش الدبره

في الختام الكلام الي قلت حقيقي لكن حبيت ان استشير هل اخربها معهم او اتعوذ من ابليس واتمسك برباطة الجأش فأفيدونا واتمنا ما احد يقول حرام وبس او حلال وبس نبي رد مقحبط

اخوي والله مافهمت شيء

الحين وش القصة وليش كذا مرة طويلة

يعني اختصر المفيد و رتبه سطر واحد

الله يوفقك اخوي

السالفه ان فيه رجالن طيب يسوي قروض ويعطي لحد 5 مليون والرجال ملياردير لكن طريقته ربويه

واقدر اخذ منه قرض لانه صديق عمي وابي الطريقه الانسب لتحويل القرض من ربوي لاسلامي

وهل المال الي اصله ربوي يجوز الاقتراض منه حتى لو كانت الطريقه اسلاميه وهنا الحيره الي واقع فيها

والشي الثاني وش المشروع المناسب هل هو في شراء ارض وتوزيعها اراضي ثم بيعها وحده وحده لجل تجيب مكسب او في طرق ثانيه تناسب المبلغ

تروح تشتري ذاكرة جوالات من المصنع بالصين تاخذ لك مليون ذاكرة 1 قيقا بــ 3 مليون

وتبيعهم بالسعودية بـــ 10 مليون


------------------------

تروح تشتري سبح و مساويك و سجادات صلاة بالجملة بقيمة 5مليون

وتسوي لك أكثر من 100 بسطة في مكة و المدينة وتبيع بالمفرد وتصرف بضاعتك خلال شهر وتربح 3 اضعاف راس مالك....

طيب اذا اخذت ال5 مليون
خذ نصها واعطيني نصها <<طمع


سؤالك يبغاله شيخ يجاوبك عليه عشان تطمن...

والله يوفقك ويرزقك الرزق الحلال ويبعدك عن الحرام

يبدو انك تحلم احلام يقظه

بالنسبة لذاكرات الجوالات الطلب عليها أصبح قليل
لماذا ؟
لأن أغلب الجوالات الجديدة بذاكرة داخلية 16 أو 32 قيقا
وفق الله الجميع

عندي لك مشروع يكسب ذهب وهو انشاء مصنع....؟؟؟

اذا تبي راسلني على الخاص