السلام عليكم

كيفكم عساكم طويبين

والله مدري وش اللي مدحدرني في الدكــة خبري مبطي ماطبيته من زمان لكن لولا الغصه اللي بقلبي كان صارت الدكة في ادراج الرياح

وان شاء الله ماانقطع عنكم (( وجه واحد ماسير على اخوياه في الاستراحه ))

عموماً بصفه عملي في البنك صرت اتعامل مع كافة شرائح المجتمع
المتقاعد والموظف والطالب العاقل المتزن والمراهق وبين حضري وبدوي وبين طرش بحر وبقايا حجاج

عموماً ليس القضية في الجنس والقبلية ويعلم الله ان المقصد من هذا الموضوع المصارحة في واقع حنا نعيشه ونستشعره (( نستشعره بلحالها يابسما يبيلها تثبيته ))

في مجله البنك اللي تصدر اسبوعياً قريت مقال ضحكني وبكاني في نفس الوقت
مجموع القروض التي منحت للمواطنين في جميع البنوك اللي خرجت من محافظ القروض حقتها وصل 340 مليار ريال سعودي !!

طبعاً كلنا نعلم ان البنوك تعطي قروض بضمانات بنكيه يا استقطاع شهري من راتب العميل او رهن عقارات او رهن محافظ استثماريه !! المشكلة ليست في القروض المشكلة في الاتي :

في دراسه سووها مركز الدراسات في البنك اللي اعمل فيه ذكر ان القروض التي منحت للمواطنين من موظفي الدولة والقطاع الخاص استفادوا من القروض الشخصية واستثمروها بالشكل الصحيح واخذوا حيز 7% من مجمل القروض اللي منحها البنك اللي فيه حسابات للموظفين او رجال الاعمال !!

اما 93 % فمنهم من اخذ القرض لغرض الزواج او لاغراض اخرى كالسفر خارج البلاد والقائمة تطول

طبعاً هذا الاستطلاع اعتمدتها الاداره بين العملاء اللي اخذوا القروض
يعني من بين 100 شخص استفاد 7 منهم في القرض منهم من استثمره في بدء مشروع تجاري واقعي بعيداً عن الربح الوفير والخسارة الفادحه مثل سوق الاسهم !!

اما الباقين .......................

بصراحة القضية ماتتعدى عن منهج لان البنوك اقرب مالها بعبده المال منتجاتها مال نعطيك مال وتعطينا حقنا وزياده

في امريكا البنوك كلها تعتمد على بطاقات الفيزا والماستر كارد وامريكان اكسبريس للافراد لان جداوها اقتصادياً افضل من القروض سواءاً سلع او بالنقد

طيب تصدقون والا ماتصدقون ؟؟
في حفل الربع السنوي في البنك وكنت انا حاضر الحفل جلست مع رئيس منظومة التجزئة المصرفيه للافراد في بنكنا راتبه 300 الف ريال ناهيكم عن منحه نسبه نص بالمية من ارباح البنك وجنسيته هندي شغل سابقاً مدير الاقليمي في احد البنوك الامريكيه في ولايه اكلاهوما وجلسنا نسولف معه بحكم خبرته اللي تفوق 20 سنة مصرفي في اكبر البنوك في امريكا يقول :

في امريكاً اذا جاء موظف او شخص يطلب قرض فأول شيء يقوم به البنك مسائلته عن سبب غرضه للقرض سواء كان تجاري او غرض شخصي !! ... يقول اذا جاء شخص وتقدم بغرض قرض عشان يبدء مشروع تجاري سواء محل او غيره يطلب البنك للشخص المتقدم نموذج عن مشروعه عشان يدرسونه ويقررون اذا فعلاً مشروعه بينجح والا لا (( مع الملاحظة بأمكان المتقدم يقول للبنك وش دخل امكم عطوني قرض ولايكثر انت وياه )) وانظمه مايمنح القرض الا لمن عمرهم 25 سنه وفوق مهب بزران ديرتنا توه متوظف في حريسان والا في الحفر يطق له قرض ويدز بها للاردن والا سوريا !! وزاره المالية او المؤسسه اللي تدير البنوك وتراقبها سنت هالقوانين علشان بس ماينجر المواطنين في قروض مالها اخر ناهيكم ان امريكا اكبر دولة مقرضه للافراد والمؤسسات والدول في العالم ...

وكذلك افضل شعب مدخر في العالم !!


ملاحظة كبر قريح :

تدرون ان بريطانيا ماتقرض الا فقط لاغراض تجاريه وتهيئة العميل في ايجاد مصادر دخل اخرى غير راتبه الساسي اللي يعتبر مصدر دخله الاساسي ؟؟ عاد بنوكنا عرفت ان شعبنا همج وماحطت قوانين مايمنح القرض الا لغرض تجاري حال صندوق العقاري لكن لاحياه لمن تنادي

عاد مفهوم الادخار عندنا تبن وانتم بكرامه يجيك عسكري ماتعرف شنبه من اباطه ياخذ قرض ويدز لسوريا يفسفسها ومايمر 6 شهور على القرض الا ورايح للفرع يقول عطوني اعاده قرض !!

او يجيك بزر راتبه 3000 ريال توه متعين في العسكريه ياخذ له قرض بيعرس وبطاقه فيزا والا اسلاميه ومايكمل سنه الا هو داخل على امه تسلفه كم ميه عشان يغطي احتياجاته !! طيب دام راتبك مايكفي وماخذن قرض عشان تعرس وشوله تاخذ قرض بالاساس !!

فيه اختراع اسمه ادخار افتح لك حساب فرعي وسوا عمليه ثابته من حساب راتبك كل مانزل كل شهر يتحول مبلغ من راتبك تحدده انت على حساب الفرعي تصبر كم سنه الا كملت مهرك وتأثيث السكن مع ان وجهك يخب عليه مسمى سكن !!

اعرف لكم هندي كان يشتغل في الفرع حق فيز وماستر كارد جاني في الفرع مبسوط قلت عسى ماشر ياسراج وش فيك فري هابي قال بنتي اللي عمرها 8 سنوات ادخرت في خلال سنه ونص 10 الالف ريال !! وجلست متضايقه تبي تكمل كم الف عشان تشتري لها اثاث غرفه تحلم بها !!!
قلت له طيب وش سويت ؟؟ قال قلت لبنتي خلي 10 الالف حقتك ورجعيها في حصالتك وبكره نروح انا وانتي في ايكيا اشتري لك الغرفه اللي تبينها بفلوسي واللي معك خليها لك تستاهلين على اللي سويتيها ...
قسم بالله ياجماعه وانا اكلم سراج والفجر والفرح في محياه شوي وبيتفصخ في الفرع ويرقص مكارينا من الفرحه والفخر ان بنته سوت شيء ماكان يدري عنه

ادخرت وحرمت نفسها من الكماليات وضرورياتها اليوميه بسبب غرفه نوم !!

بينما اليوم داخل علي بدوي بلبسه العسكري وفنيلته سايحه من اباطه لين خصره من العرق والسنان يقول لي ليش مااستحق اعاده تمويل مضطر وراي سفره لسوريا ....

والله شتان مابين الثرى والثريا ياجماعه

يضيق صدري لما يجيني شخص عمره 50 سنه هلك عمره في الاقتراض ومايكمل سنتين الا وطال اعاده قرض على مبلغ تافه عشان يسد احتاجاته واحتياجات عائلته ويطلب من البنوك سد احتياجاته بقرض متعب

يتقطع قلبي لمااشوف متقاعد راتبه 2000 يترجاني اكلم الاداره عشان يمنحوا له بيت والسبب انه ماكون نفسه من البدايه اهلك نفسه بالقروض وتزوج عن قرض وضاع عمره كله لاراتب يكفيه ولاحتى بيت يضمن له الراحه النفسية

احد اقرباي تزوج وعمره 38 سنه تاخر في الزواج بتقولون وش عقبه تعرس ؟؟
اعرس وهو ضمن مستقبله بدى من الصفر حتى السياره ماكان عنده سياره بدى حبه حبه ترقيات طول السنين ناهيكم انه مدخر من راتبه من كان عمره 27 سنه
فتح محلين ..اشترى قطعه ارض في حي النفل وبدى يبني واللحين خطب وتزوج وساكن في شقه بيكمل 8 شهور والا وهوطالع من الشقه وساكن في بيت عمره !! وان شاء الله بيعيش حياه كريمه !!

عرف ان الحياه صعبه والطريق طويل تعب وكدح وحرم نفسه من كماليات وضروريات لأجل الاستقرار المادي احسن من يتزوج عن قرض عشان يستر على نفسه وهو اصلا ماكون نفسه لليوم الاسود !!

ماألوم الحكومة والا البنوك على قله المساكن لدى الموظفين في السعودية
لأن شعبها همج وعقولهم في سراويلهم .... خساره فيهم برنامج مساكن !!

اكثر شيء يسويه الشخص لما يتوظف يقدم على قرض عشان سوريا والا للمغرب والا بعرس علشان استر على عمري حتى وهو عزوبي مايكفيه الراتب ويعيش بنت الناس في هم مالها ذنب بسبب انه مايعرف يفكر مايعرف ككيف يكون له مصدر دخل ثاني !!

مايدرون ان الحياه صعبه ويقولون ان الله هو الرازق لكنهم يقولون مالا يفعلون !!

عشم ابليس بالجنه ... هذا حال موظفينا وشعبنا السعودي بحلم السكن والعيشة الكريمة دام تفكير شعبها ياخذون قروض للاستخدام الشخصي مهب تجاري لايجاد مصادر دخل اخرى

لو خير لي ميتين ال بفلوسي وبين بانوراما تقسيط ... لااختار ميتين ال وانام قرير العين


تحياتي على فكرة متسلفته من الجيران