يمْه أدري..الجوع ذبّاح الرجال
.. .. .. .. .. وأدري أنه هالخوي ماهو سوي

وأدري انه هالعمر خبز وريال
.. .. .. .. .. يابعدي " وأدري زماني نخبوي !

وأدري أن الجوع مابه راس مال
.. .. .. .. .. بس أنا والجوع يمْه .. نستوي

له مواسم عشب فيني.. واحتفال
.. .. .. .. .. له مطر يهمي فصدري واهتوي

ينزرع فيني ثقة حد ... الهبال !
.. .. .. .. .. كلما شفت الاماني......تنزوي

ينتزع حزنٍ تجثم بي .. لياال !
.. .. .. .. .. له زمن يمه فـ صدري منطوي

ينتزع للصمت ثورة ، واحتمال
.. .. .. .. .. والبكا دمعة ف..جفني تنضوي

ينتزع صرخة..فحلقي للجمال !
.. .. .. .. .. صرخة تملا الكون يايمه دوي

وهذا انا كلي على بعضي خبال
.. .. .. .. .. طفل متمرد , وشاعر فوضوي

مانبت للفقر ف..شفاهي سؤال
.. .. .. .. .. يمه لو يشوي محاديبي شوي !

للعطش في شفتي غيم و زلال !
.. .. .. .. .. والجدب في بحتْي .. حلم بدوي

لو هوت شمس العمر نحو الزوال
.. .. .. .. .. تنطفي الدنيا وشمسي ما تهوي

يبقى لحن الجوع للعمر / إشتعال
.. .. .. .. .. كلما غنيت أحس اني " قوي " !




إبراهيم المرحبي ( رحمه الله ) !