السلام عليكم ورحمة الله وبركاته

اخواني

انا سبق وقدمت بكلية الملك فهد الامنيه وانقبلت السنه اللي طافت قبول مبدئي لاكن مااااااااااااارحت بسبة تحطيم العالم لي يقولو وااسطااات ياااهووو وطنشتها من خبالي الزايد
مع ان معدلي مقبول مرتفع باقيلي نقطه واصير جيد .....

والسنه ذي قدمت على المباحث وانقبلت مبدئي ودقو علي ماشاءالله و الحمدلله يارب وخلصت اوراق الاحوال والبنك وتصديق الشيخ والاماره والشرطه

السؤال اللي أكل مخي

هل اكمل بالامنيه اذا انقبلت قبول مبدئي والا استريح واخلص المباحث على رتبة جندي ......؟؟؟


مع ان اخوي الكبير الله يهديه يقول خلك فالمباحث وش عليه جاه تعيينه مدرس ... وصراحه يالذيااابه بديت اشك ان الناس اللي حولي ما يتمنولي الخير الله يعين يااارب


الله يستر عليكم يالذيابه ردو علي تراني بحاجتكم

انت خذ الشيء المظمون ..
وخل عنك الاحلام اللي ماتوكل عيش ..
اذا ماعندك واسطه في الكليه الامنيه ونسبتك مقبول لاتفكر فيها ابد ..
رح للمباحث يازينها زيناه ..
موفق

نخاف نقولك انتظر الامنيه وما تنقبل وتروح المباحث
شف يا غالي لا تروح المباحث الي تقتنع فيها لا تقدم وانت متردد
لي ان نفسيتك راح تتعب بس اجلس مع نفسك شوي واقنع نفسك ان هذا رزقك مافي غير
عشان لا تنقهر وبتوفيق لك

ياخي خل عنك كلام الناس

حرام عليك تضيع على عمرك فرصه من ذهب بسبب كلام الناس

ترى فيه فرق بين >> ملازم >> وجندي

لاكن قبل لاتسوي اي شيء

استخير الله سبحانه واقدم على ما انت مقدم عليه

واترك كلام الناس وراك

مع اني منقهر منك لما مارحت يوم قبلوك مبدئي الامنيه ,, تدري انك بقبولك المبدئي اذا كان طولك ووزنك ونظر تمام انك قطعت 70% من الطريق يعني يبقى لك 30% اشياء روتينيه وتكون في ميدان الكليه تهرول

لاكن الحمد لله على كل حال هذا النصيب

و اخيرااكرر واعيد ولا ازيد استخير الله استخير الله استخير الله

واترك كلام الناس

وبالتوفيق لك اخوي

ملاحظه وش كان تخصصك

والله الاخوان افدوك وماعندي شي اقوله
الامنية حلوة بس
استخير الله وانشالله الله بوفقك

الناس القريبين منك ما يبولك الخير <-------- هذا شي طبيعي وهذا سبب كثرة العاطلين

حنا بوقت صارو أكثر الموظفين وحتى العاطلين يحطمون بعض وزياده على كذا يحبون أنفسهم

والحل يصير بيد العاطل انه يكون رجــال ويقدح من راسه ماهو يشاور العائله الكريمه

انت أهم شي تفكر بالوظيفه اذا حصلت وضمنتها وقتها تقدر تستخير وتقدر تتركها وتروح للوظيفه الثانيه

المباحث اذا اقبلوك نهائي وحددو موعد دورتك معناته مسكت جندي بيدك

لكن الأمنيه اذا اقبلوك مبدئي بيكون ملازم فوق الشجره وما تدري هو ينزل من فوق الشجره ولا يقولك ابتعد عني

ما احبك وش تبي بي ههههههههههههههه

الله يوفقنا وياك للقبول النهائي في جميع القطاعات

مقبول مبدئي في الامنية

ولارحت عشان كلام الناس

بصراحة لاتعليق

عصفور باليد ولاعشره على شجره احمد ربك المباحث بيدك لا تفوتها وتجلس طول عمرك ندمان

يارب سترك معك جامعة مقدم جندي لية
كان قدمت في المنشات يدونك وكيل رقيب

بصراحة امرك غريب انا خويي جامعي وتخرج من الدفعة دي ملازم ولا ازيدك من الشعر بيت تقديره مقبول
وبدون واسطة انت وكل امرك لله وصدقني راح تتيسر ولك القرار الاخير