حياك الله اختي لغزالمشاعر .. ردك اسعدني جدا ..خصوصا انك راعية بسطه مثلي .. واكيد راح تكوني حاسه فيني ..

كلامك درر عزيزتي .. وصحيح اني جديده ومبتدئه بعالم البسطه والبيع .. بس والله فعلا احس كلامك هو الحاصل ..


مشكوره عزيزتي على النصايح والكلام والدعوات الطيبه ..

وحبيت استوضح منك بعض الامور اذا ماعليك كلافه او ثقل ..

اولا انا بسطت بسوق كل الحريم حولي يميني ويساري وبكل اتجاه تحصلين بسطه .. كلها قمصان بيت وسجاجيد وشراشف صلاة وبخور وشنط واكسسوارات وغيرها .. ولما فكرت ابسط حاولت ابسط بشئ مو عند البساطات ودخلت بالالعاب والبكل والعطور .. لكن للاسف ماحصلت مردود .. اللحين افكر انا بخياطة ملابس اطفال على ذوقي القماش والموديل .. واستفرد ببضاعه مميزه .. هل تشوفين انتي انها مناسبه .؟ واذا تخبرين خياطه تفصل لي بالجمله شاطره وتراعيني ياليت تدليني عليها .. لاني مثل ماقلت لك جديده بعالم السوق ماصار لي خمس شهور ..

ثانيا ابيك تدليني على اسواق بسطاتها في حركه والسوق ماشي .. لان صراحه المكان اللي انا جالسه فيه تعبان ماادري من السوق ولا من بضاعتي ..


واخيرا مشكوره على تفاعلك ويعطيك الف عافيه ..

أختي لك رساله عالخاص

مشكوره اختي لغز المشاعر ..




ولا زلت بانتظار اخوي فتى نجد .................. وممن لديه المقدره على افادتي ..

الأخت / يساطه

من أول ما قراءة موضعك يوم أمس وأنا قاعد أفرك راسي وعصر مخي لعله ينقط ولو فكرة,,

واخيرا طلعة فكرة سغينونه يعني صغيرة مره ,,

وبغض النظر عن البضاعة ,,,, لكن أفضل العاب أطفال ,,, وانتي ممكن تستخدمين الفكره كا إطار عام ,, وتولدين منه أفكار مناسبه لوضعك ,, وموقعك وطريقتك:

الفكرة هي كالتالي:


1-تبحثين عن العمال اللي يدوجون بالشوارع (بنقالي) لأنهم بعد العصر يدشرون بالشوارع ويبحثون عن عمل,,,

2-تشترين بالجمله,,,, علشان يكون هناك مكسب,,, وتكون البضاعة حسب مايراة البنقالي مناسب, هو من يحدد نوع البضاعة,,

3- تتفقين مع كم بنقالي على تصريف البضاعه في الحواري والأسواق واللمرات,, لا تشيلين هم ,,, يعرفون كيف يصرفون بضاعتهم,,, وتعطينهم على القطع مبلغ معين,,,حسب إتفاقكم,,

4- لابد تأخذين تأمين على بضاعتك (يعني يعطيك مبلغها) وعندم يصرف البضاعه تتحاسبون.,,,, إلا إذا كان الشخص مضمون ومعروف في الحارة, يكون أفضل.

أتمنى أن تكون الفكرة مفيده لك ولمن يطبقه,

أنتي مش خاسره شي جربي ,,,, أدنيا تجارب ,,,, وربما يكون لك موزعين من العمال في جميع حارات المدينة,,, ووصيهم يجيبون موزعين من أخوياهم ,,,, واللي يجيب موزع يكون له نسبه معينة,,, إغراءت,,,




حاولي وبالتوفيق

نايف العرب .. اشكر لك اجتهادك .. بس الموضوع صعب شوي .. اعتقد يبيلها رجااال

صعبه اتفاهم مع عمال واعتمد عليهم بأمور زي كذا ..



معلم تجاره .. مشكور على التعليق





ولازلت بانتظار فتى نجــــد

ليت احد يفيدني من الاخوان او الاخوات .. متى يمكن بمقدوري المراسله اقصد ارسال رسائل خاصه في هذا المنتدى ؟

الله يوفقك ويرزقك

بسألكم يا جماعه .. فتى نجد منقطع عن النت او متواصل ..؟

لاني لاحظت عدم تواجده بهالفتره .. وانا جديده بالمنتدى ماادري هو من زمان منقطع ؟؟


حاولت ارسل له رساله خاصه .. طلع ملغي خاصية استقبال الرسائل


ف وش السالفه ؟؟


علموني علشان اهدئ من سرعتي بس .... لاني داعسه لاخر سرعه وابي رد منه

[align=center]
مساك الله بالخيـرر اختي ..

أولاً : للأمانه عنوان موضوعـك ماعجبني حيييل حييييل ،

ليش فتى نجـد بالذات ؟ أنا ماأقول كذا قصور في أبو خالد .. بالعكس الرجال طيب وفيه خيـر ووده يسآعد الكل ، لكن معه ظروفــه .. وإن شاء الله يدخل في أقرب وقت ويفيدك ..

لكن اللي بقولـه في المنتدى عقول تجاريـه كثيـــــــرره .. وناس واجـد فيها خير شروى اخونا فتى نجـد ، ومُمكن بعض الناس يشوف عنوان الموضوع .. ولا يرد عليك ، بيقول انا وشدخلني أرد على وحده تطلب مشورة شخص واحد فقط .........!

أنا قلت لك كذا لجل تآخذين اكبـر عدد من النصايح من جميـع الأخوان في المنتدى .. وأتمنى مآيزعلك كلامي ..

وألحين انا بقولك فكرتي ..:

إنتي بسطتي على ألعاب وعطور وشباصات وهالاشياء كلها ومكسبها ضعيف ..

أولاً : إنتي مآشرحتي .. تآخذين بالجملـه من أسواق الجملـه ، أو من تاجر صغيـر يوزع بالجملـه ، فيه فرق بينهم .. لان اذا خذيتي من أسواق الجملـه على طول .. بيون السعـر أقل ، عكس يوم تاخذي من تاجر صغير يبيع بالجملـه ، لأن هو اكيد ماخذ من اسواق الجملـه الكبيـره ، ويبي يكسب فيها ، ويكون له مكسب بسيط في اللي يبيعـه عليكم .. هذي النقطـه تزيد في الربح أو تنقص ..

ثآني نقطــه .:
مثل ماقالت الأخت لغز المشاعر ، الشنط .. فيها خيـرررررر واجد بإذن الله ، طبعاً تقليـد الماركـه .. إسألي عنها في أسواق الجملـه عندكم وشوفي كم أسعارهاا .. ومري على البسطات اللي تبيع هالشنط ، وشوفي بكم يبيعونها .. واذا عندك جرأه ولسان طليق .. حآولي تدخلي مع البنات اللي يبيعون ، وتشوفي كم مكسبهم فيها ، ومن وين يشترونها .. وهل لهم مندوب متعاملين معاه ، أو ياخذون مباشره من أسواق الجملـه ، كل هالاشياء اللي ذكرتها .. تفيييييدك كثيـر قبل ماتدخلين في الشغلـه ..

اعطيك مثال ، انتي اشتريتي جملة شنط تقليد للماركـه ، سعر الوحده بالجمله 50 ريال ، إنتي أول شي خلي مسكبك بسيط منها .. يعني مثلا البيـع يكون بـ70 ريال .. أو 65 .. وافرضي اول شي اشتريتي بـ مبلغ 1500 ريال شنط .. بيصيـر عندك 30 شنطـه ، اوكي ..

وأحسبي مكسبك في كل شنطه 15 ريال على أدنى حد .. 15 × 30 = 450 ،< مكسب ممتاز جداً

، لين يصيـر لك زباين .. طبعاً أي عميله تجي عندك حاولي تكسبيها كـ صديقه وأخت .. إذآ كانت إمرأه كبيره في السن .. أو فتاه .. وحاولي قد ماتقدرين تعطين رقمك لـ أي وحده تشتري من عندك .. يصير بعدين تتصل فيك وتسأل عندك الشي الفلاني وكذا يعني .. وإنتي عارفه البنات ، كل وحده تقول للثانيه لقيت شنط تشبه الماركه بـ اسعار خياليه ورخيصه في السوق الفلاني .. الثانيه بـ تجي وتشوف بضاعتك .. طبعاً أهم شي خلي شكل البسطه يفتـح النفس .. يعني مرتبـه وشكلها حلو ، تجذب المارين ..

ومثل ماقلت لك ، مو شرط موضوع الشنط .. قيسي عليها أي فكره في بالك .. مُري على البسطات مثل ماذكرت وشوفي اللي يناسبك .. أو إذا عندك فكره جديده ، حاولي تدرسي المشروع من جميع إتجاهاته .. رواد السوق من أي طبقه ، متوسطـه أو عاديه ، أو شبه مرتفعه .. أو بسيطه .. وكم حدودهم في شراء البضاعه الموجوده عندك .. من المحلات البسيطه بالسوق ، ونقصي من السعر عنهم قليلاً .. حتى يصير لك عملاء ..

ثالث نقطـه .:
، وهي رساله لك ولـ كل تاجر أو تاجره ..

الرسول - صلى الله عليه وسلم - قال / (إن التجار هم الفجار). قالوا: يا رسول الله، أليس قد أحل الله البيع ؟ قال: (بلى، ولكنهم يحلفون فيأثمون، ويحدثون فيكذبون)...

الحلف في التجاره .. اذا وحده قالت لك ليييييش 70 ريال ، مره غاليه .. لا تردين على طول أقسم بالله مكسبي فيها بسيط ، أو والله العظيم مكسبي 10 ريال فقط ، أو أياً كان ..
إحذري وتذكري حديث الرسول اللهم صلي وسلم عليه .. قولي لها ياأختي مكسبي فيها بسيط بدون أي أيمان أو حلوف .. طبعاً يعتمد هالشي على إسلوبك في الكلام .. وانا راح انزل موضوع متكآمل في قسم البيع والشراء ، يخص الشي هذا ..

وأخيراً أختي ..
أتمنى لك التوفيق في حياتك ، وبإذن اللـه تحققين طموحك وتصيرين تاجره لها اسم في السوق وفروع في كل مدينه ..

أخوك
[/align]