بسم الله الرحمن الرحيم

السلام عليكم ورحمة الله وبركاته

كيف حالكم إن شاء الله بخير جميعا

أول شيء دعواتكم لي إني أتعدى الكشف الطبي و القبول النهائي

ثانيا كان موعد القبول المبدئي يوم السبت 7/7 و دقوا علي الجمعة الماضي 4/8

وقالوا تجي يوم الثلاثاء 8/8 الساعة 5 ص وحلق رقم 2 و جيب معك بطاقة الأحوال الأصل فقط و بالزي السعودي ثوب وشماغ

و رحت لهم يوم الثلاثاء بمركز الحاير بالرياض عاد و ينادون بالأسماء إذا جاء إسمك تبرز بطاقة الأحوال للعسكري و يقول روح على جنب لين يخلصون من الأسماء كلها و العدد كان حوالي 50 متقدم .

و ركبنا الباص و رحنا للأدلة الجنائية اللي جنب المحكمة العامة و بصمنا و جلسنا حوالي 20 دقيقة إلى 30 دقيقة و فيه بوفيه يقولون اللي يبغا يفطر و إلا يشرب ماء يروح علشان شوي فيه تحليل بول و أنتم بكرامة و ركبنا الباص و رحنا لمديرية المباحث في عليشة و جلسنا على الكراسي و ينادون بالاسماء اللي ينادونه يحلل بول و أنتم بكرامة و أحترينا لين خلصنا كلنا و طلعنا حوالي الساعة 9 ص و اللي معه سيارة يرجع معهم للمركز في الحاير علشان سيارته هناك و اللي ما معه سيارة يقولون له تبغا تنزل عند المديرية للمباحث و تركب ليموزين و إلا ترجع معنا هناك عاد على كيفك
و قالوا لنا بكره الأربعاء تروحون لمستشفى قوى الأمن بالرياض الساعة 10 ص .

الأربعاء 9/8

رحت للمستشفى حوالي الساعة 9.30 ص و دخلونا الساعة 10.30 ص
تجلس على الكراسي و ينادون بالأسماء علشان يعطونك ورقة المستشفى و بعدها ترجع لكرسيك و تجلس لين يجيك الدور وإذا جاء دورك تروح لعسكري و تبصم بالسبابة اليمنى و تعطيه بطاقتك الأحوال و ينظر فيها و يرجعها لك و يقول لك روح لقسم الأشعة أول باب على اليمين
وتدخل غرفة الأشعة يحط جهاز على صدرك و بعدين يحطه على ظهرك و ويقول خذ نفس عميق و تخلص و ما تأخذ خمس دقائق في الأشعة و تمشي للبيت و قالوا تعال يوم السبت 12/8 بعد بكره تسوي باقي الفحوصات طول ووزن و تحاليل دم و بول و أنتم بكرامة فقط .

كان ودي أنزل الموضوع من يوم الثلاثاء و لكن جاتني ظروف خارجة عن إرادتي

لا تنسووني من دعائكم

و بالتوفيق للجميع ..