قصه .. وابيات

عبدالله الغامدي · #1 (**permalink**) 28-08-2007, 08:59 AM

أسعد الله جميع اوقاتكم
،،،
نقلت الاخت " تعبت ادور " قصه مؤثره للشاعر نمر بن عدوان
فتذكرت قصه حصلت معي و أحببت ان تشاركوني فيها
و أهديها للأخت تعبت ادور .. الله يكفيني شرها

،،
قابلت مره من المرارير أحد اصدقائي ، ولاحظت انه شارد الذهن ، كثير الاتصال بالجوال دون كلام
مايعني انه كان يتصل دون ان يجد اجابه ..
تطفلت و سالته .. خير يابو ..... ، عسى ما شر .
قال تبغا الصدق يابونوره .. حصل موقف بيني وبين زوجتي ، والحين هي في بيت اهلها

.. وقاعد ادق من اول ابغا احل الموضوع قبل يكبر .. لكن ماترد

..
افاااااااا .. شكلك يقول انك معترف انك غلطت عليها
قال اي بالله اني غلطت و معترف .. لكن المفروض ماتروح بيت اهلها

قلت يابن الحلال اهدأ والامور بسيطه انشاءالله
قال وين بسيطه وهي ماترد .. وخايف يكبر الموضوع

قلت طيب .. وش رايك في اللي يخليها ترد عليك ؟؟
قال : ابونووووره .. امنعنا الشرهه
قلت لا شرهه ولا هم يحزنون .. واذا خليتها ترد عليك ؟
قال كيف ؟؟
قلت موشغلك .. قلي وش لي ؟
قال اللي تبغاه .. بس تقول لي اول وش راح تسوي
قلت اول شي ابغا عشاء في المكان اللي احدده

قال تم
قلت ودعوه من قلبك
قال تمين

قلت خلاص .. اعطني نص ساعه بالكثير ..

المهم .. جلست بعيد .. مسكت الورقه والقلم وطلع معي الابيات هذي
،،

يا شاشة الجوال ايش الحكايه :: ليش اتصالي عن حبيبي لغيتيه ؟

لو شاف رقمي فيك حس بشقايه :: مير الأكيد انك ياشاشه خدعتيه

انا اعرفه .. وده يسولف معايه :: يبغاني اضحك .. واتغزل ..واسليه

يقطعك ياشاشه .. ذبحتي غلايه :: شوقي فقدته راعي شعور مغليه

،،

قمت عند صاحبنا ، واعطيته الابيات وقلت الحين ترسلها ، وتنتظر نص ساعه ماتدق
وبعدها دق وشوف النتيجه

قال طيب .. لو مانفعت
قلت .. الله يعين .. حتكون وقتها عزابي يعني عشاك عليه
قال تم
المهم ارسل الابيات .. انتظر نص ساعه .. ودق
والنتيجه : ردت عليه زوجته .. ورجعت المياه لمجاريها ..
ومن فرحته ..
طنشني وطنش العشاء

،،
اتمنى تكون القصه و الابيات عجبتكم
والله يكفينا الشر

أقرأكم في ود ...
ابونوره