انا بدأت التجاره في الجوالات الصينيه والاشياء الغريبه من الجوالات مثل جوال الساعه والقلب والماركات بدأت براس مال 45الف ريال فقط اشتريت من دبي 200 جوال وصرفتها على محلات الجمله خلال شهر ونصف ورجعت وشريت 400 جوال وصرفتها خلال 15 يوم وكل ما ارجع لدبي اشتري اكثر واخذ الطلبات من السوق واجيب لهم حتى صار بيني وبين الصينين ثقه وفي احد الايام اتصل علي (بوس ) مديرهم وقالي ما يحتاج تجي لدبي انا راح ارسلها لك والفلوس ارسلها لي عن طريق الحوالات قلت اوك وصار يرسلها لي عن طريق فيدكس واستلمها ثاني يوم واتصلت عليه وقلت ابغى 500 جوال قالي تقدر تصرف 2000 جوال قلتله ما معي حقهم قال متى ما صرفتها حولي فلوسها قلت خير انشاءالله ( عند الصينين حاجه غربيه متى ما وثق فيك يعطيك اللي قدامه وراه) .
حتى اني وصلت لمرحله ما اقدر احك راسي قلت لازم اجيب عمال شغلت لي واحد اردني في دبي يستلم البضاعه ويفحصها ويمني هنا في السعوديه يفرزها وويوزعها على المحلات ويستلم فلوسها وفي اكثر الاحيان انا استلمها .
تصدقوا بالله من كثر ما صارت بيني وبين الصيني ثقه ارسل لي بضاعه بفاتوره وحده 3 مليون ريال
وحولتها له بعد ما صرفت البضاعه ونسيت اقولكم انا فتحت حساب في فيدكس وكانو يرسلونها عن طريق المطار خلال يوم وانت مستلمها والحساب كل نهايه شهر
جانا رمضان الخير وبعده موسم الحج اشتغلنا شغل لا يعلم فيه الا الله
وبعد موسم الحج قلت اباخذ اجازه انا والاهل شهر كامل قلت للعمال اشتغلو مثل اول واحسن قالوا اوك
سافرنا خارج البلاد كل يوم اتصل عليهم يقولون الشغل ماشي بس مو زي اول قلت الحمدلله

بعد الاجازه رجعت وجلست اتحاسب مع اليمني عطاني حسابته ورحت لدبي وتحاسبت مع الاردني
وفي الاخير طلع عجز عندي بقيمه 350 الف ريال وقلت وقفوا الشغل .

وجمعتهم الاثنين وتخيلوا اول مره يتقابلون ومنا ومنا والحسبات مضبوطه ما عرفنا ووين راحت قلت الله يعوض علينا

جلست شهر وانا كل يوم اجلس مع واحد منهم واغريه عشان يعلمني وييقسم ويحلف بالقران انه ما يدري وحسباته صح
الشهر الثاني حبيت ارجع للسوق واشوف الامور ومفكر اني اشتغل لقيت الاخوان قاعدين يشتغلو من وراي انهبلت انا اللي علمتك الشغله تروح تشتغل من وراي قال ابغى اترزق الله بعد البحث والتدقيق لقيت :

اليمني عنده محل بالبطحاء و سيارتين و25 مندوب

والاردني متزوج روسيه بدبي ومعه x6 قيمتها اكثر من 300 الف
رحت على طول لفيدكس واشوف حسابي هناك لقيته واصل 580 الف ريال الاخوان قاعدين يستخدمون حسابي
طبعا جبت اليمني عندي في البيت وهددته الين عطاني حساب الفيدكس وفوقها مبلغ بسيط
ورحت لدبي يوم عرف اني جاي طلق زوجته وهرب للاردن

المهم صحيح يا اخواني واخواتي اللي ما يشتغل في حلاله ويداريه ما هو بوجه تجاره ( اعذروني على هالكلمه) والمال السايب يعلم السرقه لو تحط اللي تحطه الا ما ندر

والله يا اخوان واخوات ان عندنا العمال ما هم مساكين حنا المساكين اللي قاعدين في بيوتنا ونستنى الفلوس تنزل علينا من السماء
تخيلوا ادور عامل في سوق البطحاء فاهم للبيع والمشترى يشتغل معي 5000 ريال بالشهر مالقيت
واخر شي لقيت اليمني 10000 ريال بالشهر ومعها نسبه .

*بنقالي تخيلوا في حسابه مليون ريال وعطاني 500 الف ريال كاش يقول لي خلها معك اللين تجيب بضاعه وانا حولت مليون ريال لدبي وسحبوني المباحث وتحقيق سين وجيم والبنغالي يحول ولا احد يفتح فمه .

*تخيلوا كل المحلات اللي في البطحاء للاجانب الا ثلاثه محلات فقط للسعودين وما يقدرو ينافسو الاجانب .
الحمد لله اني طلعت من الشغله وانا ما خسرت شي لانه كنت اشتغل بدون راس مال وهذي اعتبرها درس لي بعد الاسهم

اخواني واخواتي التجاره هي معرفت التجار الكبار متى ما ارتحوا لك اعرف انك سوف تنجح في تجارتك بعد الله .

*ومفهوم التجاره فكره وليست راس مال . كثير من الناس يملك راس مال قوي ولا يعرف يشغلها

*وانا ما اشتغلت بالسوق الا بعد ما ارتحوا لي الصينين واليمنين ( القهر ما فيه سعوديين ) وصرت معهم مثل الاخوان
واسف على الاطاله ...........