السلام عليكم ورحمة الله وبركاته
من العنوان ارائكم على المشروع ونصايحكم
تكلفته تجارب _ وكيف اسوي دراسة الجدوى )
بانتظاركم

وعليكم السلام
اخوي مخاوي
غير ايجار المحل , التكاليف الباقيه بسيطه, من قيمة مكان عرض الخضار على مرايه , على ميزان كلها تكاليف بسيطه,

لكن انصحك تروح حلقة الخضار, وتشوف اسعار الجمله , تعرف مثلا سعر كرتون القوطه كم , وكم وزنه.
وقيس عليها كثير من الخضار والفواكه, وسجلها بورقه, وطلع القسمه يعني كم تكلفة الكيلو
نفرض كرتون قوطه في 15 كيلو لقيت سعره 30 ريال ,,, يعني تكلفة الكيلو 2 ريال,,,
بعدين مر على اكثر من محل للخضار واسأل عن الاسعار,,, صدقني بتلقى كيلو القوطه من 4 الى 5 ريال,,,
قوم بالعمليه هذه كم يوم ,,, ومهم حضور الحلقه بدري وتتعلم كيف الشراء ,, وش الانواع ,,,ودور النظيف..

مثل ماقلت لك سابقا اكبر مافيها ايجار المحل...
لكن!!!!!
اذا بتسلمها عامل !!!!
وبتخليه لحاله وانت بس تمر وتاخذ المقسوم,,,!!!!! تتغير نسبة نجاح المشروع بنسبه كبيره ,,, سالب طبعا...
ممكن تستعين بعامل لرص الخضار وتنظيفها,,, وتتواج بالمحل اوقات الذروه...
وتوكل على الله

الله يجزاك خير اخوي
اشكرك على هاللنصايح
بس ممكن توضح لي الحلقه وش يعني
الله لا يهينك ويجزاك خير
وباقي النصايح بطبقها ان شالله وممكن اخلي العامل مثل ما قلت يصف ومن هالامور واجي اوقات الذروه

فر ق التسميه
حنا نسميها حلقة الخضار
يعني سوق الخضار
وانصحك اول ثلاث شهور تجلس في المحل عشان تعرف دخل المحل التقريبي ,
والبدايه دايما تحتاج متابعه وبقوه

بارك الله فيك وان شالله راح اشوف سوق الخضار للجمله
وامر على كم محل اشوف الدخل ومن هالمعلومات
واذا لك خلفيه عن الجدى عن المحل عطني خلفيه ربي يخليك
ومكان المحل اسف كثرت اسئله بس تحملني فديتك

لا ...ولا يهمك وانا اخوك اسأل مثل ماتبي واللي اعرفه بعلم به
الموقع مهم لأي مشروع , مثل محلات الخضار اذا لقيت لك ركن في سوبر ماركت فهو طيب,,
او دور لك على محل قريب من سوبر ماركت كبيره وعليها حركه,,واهم شي مايكون فيها محل خضار,,
وانا اخوك كلهم شغالين...
بس انت اصمل وتوكل على الله,,,,

باشر حلالك بنفسك اول خطوات النجاح .... انت في اي مدينة ؟

مشكورين اخواني على المرور
انا من مدية الرياض
واشكركم مره ثانيه على المرور لاهنتو وجزاكم الله خير

السلآم عليكم

قبل لاتفتح محل خد لك خبره بسوق اولآ وطريقة البيع والشرآء في شهر رمضآن فرصه لمشروع الخضآر

ركز اكثر شي على الحشآئش

والخضآر . طمآط كوسه بآذنجآن فليفله ( فلفل رومي ) جزر الخ ..

بطآطس ع بصل وهكذآ

وشوف لك مكآن تجمع لان بنسبه 100% الكل محتآج موآد الخضآر بهذآ الشهر

وخصوصآ اول اسبوع من رمضآن وخصوصآ اول ثلاث ايآم . استغل هذه الفرصه وتعلم في هذا الشهر
وانا بنفسي شآيف السوق . سلة الكوسه عندنآ تقريبا 14 كيلو الصبح برمضآن قبل مآتطلع الشمس ب 70 ريال والله بعدين كل سآعه ترتفع ليهآ 10 الى 20 ريال ووصلت الى حدود 120 ريال عند التجآر طبعآ هذا الكلآم

وشهر رمضآن مآيبي لهآ خبره في البيع . لان السوق حلو بالخضآر والكل يشتري ومعروفه عند الكل ترتفع الاسعآر بس مو تكثر . وشوي شوي تتعلم شهر كآمل وعندك من يقرب العيد . تنزل السوق بنسبه 50% الاسعآر والبيع على الخضآر ويتجهو الى الفوآكه

واسف على الاطآله مجرد نصيحه . موفق ...

الله يجزاك خير اخوي ما قصرت