بسم الله الرحمن الرحيم

السلام عليكم ورحمة الله

كل عام وانتم بخير وأسأل الله العلي القدير ان يتقبل منا صيامنا وقيامنا وسائر أعمالنا

هذا اول موضوع لي في هذا المنتدى واتمنى ان لا اكون ضيفا ثقيلا عليكم

نويت بمشيئة الله تعالى الدخول في مجال تقسيط المبالغ اليسيرة يعني 5000 الاف إلى 15000الف كما هو دارج لدى الكثيرين طبعا عن طريق بيع بطائق سوا

ولدي العديد من التساؤلات اتمنى من اصحاب الخبرة في هذا المجال أن يشيروا علي

أولا لا ادري حتى الان هل أبدأ بفتح مكتب ام بدون خاصة أن المكتب يحتاج سجل تجاري وإجراءات مع العلم أني موظف ولا استطيع فتح سجل تجاري وهل يمكن فتحه باسم الزوجة ام لابد من رجل

ثانيا تكاليف السجل والرخصة وما الى خلافه من هذه الامور اجهلها تماما

ثالثا سمعت من الكثيرين أن الكمبيالات اوثق من الشيكات فهل للكمبيالات صيغة معينة او يجب ان تصدق من جهة معينة حتى تكون معتمدة ؟؟
كذلك صيغة العقد والكفالة هل يجب ان تكون بصيغة معينة ام يكتفى بتبيان ماعلى المشتري من مبالغ مالية وطريقة تسديد الاقساط الشهرية وكذلك التصديق هل يكون من جهة معتمدة ام يكتفى بالتواقيع فقط

رابعا لا استغني عن أي نصيحة أو مشورة من اخوتي الكرام

أولاً أسجل ملاحظة المنتدى بطيء الحركة خصوصاً مع الستايل الجديد
ثانياً
بخصوص مشروعك وجهة نظري مسألة فتح محل من عدمه تعتمد على شيئين : رأس المال + إدارة المحل ..فهل لديك رأس مال يسمح لك بمواصلة استقبال الطلبات أم تعتمد على تدوير رأس المال من خلال الأقساط في هذه الحالة المحل ما يصلح..الشيء الثاني هل لديك الوقت لمتابعة المحل من بعد صلاة العصر إلى 9 مساءاً ؟

أقترح عليك تبحث عن شخص له محل تقسيط وتطرح عليه تشغيل فلوسك مقابل ربح وأعتقد ستجد من يوافق وتتفق أنت وهو على الصيغة والأرباح ..إلخ بعضهم يأخذ أول قسط وبعضهم نسبة

وهناك حل ثاني ..تبحث أنت عن زبائن بنفسك وتذهب لأي مكتب تقسيط علشان تسجل عقد عن طريقهم وهنا يأخذون 100 ريال -200 ريال قيمة العقد فقط

وعليك بتقوى الله فهذه التجارة محفوفة بمحاذير شرعية وعليك بالقناعة والتيسير على عباد الله والربح القليل الدائم أفضل من الكثير هناك الآن من يأخذ 50 % أرباح وهناك من يأخذ 25 % أرباح نلاحظ مع مرور الوقت أن أرباح وزبائنه اللي ماشي بـ25% متواصلين ..
جهز نفسك بمعلومات كيف تضمن حقوقك عن طريق صياغة عقد عند محامي ورتب سجلاتك وتوقع أنك ستواجه مماطلين لذلك اتفق مع محامي يعقب لك في هذه الحالة ونصيحة مجربة لا تقسط أحد إلا وتعرف مسكنه الدائم وعمله ليتم تبليغه مباشرة التعب أول أحسن من التعب بعدين

أعرف أحد الأقارب عنده مكتب تقسيط يقول لي : الشغلة أرزاق قد توفق بزبائن أوفياء وقد تذهب فلوسك حسرات ومغثة وسكر وضغط وتتعب من روحة المحاكم ومواعيدها اللي أصبحت تقاس بالسنوات الضوئية لا والنكته الجديدة أن بعض القضاة وفقهم الله تعالى يرفض النظر بالقضية لشبهة المعاملة المالية هل القاضي موظف بالدولة أم لا ؟

يقول صاحبنا : إن فيه ناس عطوه 100 ألف ولا يقبل إلا 100 ألف يشغلهـا وما دار عليها الحول إلا صارت 250 ألف ولكنها بذمم الناس

هذا رأيي والسلام

ربي يرزقك من واسع فضله الاخ الهذال بيض الله وجه ماقصر

ربي يرزقك من واسع فضله

شوف وانا اخوك على عجاله

السجل فايدته وخصوصاً لمن تقصدهم وراتبهم على الراجحي يضمن لك خصم قسطك من راتب المديون لك مع نزول راتبه ولذلك تجد اصحاب المكاتب يرتاحون لمن راتبه على الراجحي والبنك ياخذ منك نظير هذه العمليه مبلغ بين الــ200 او 300 ريال ولكن تضمن مبلغك في الجيب

ولي عوده لك

[align=center]
السلام عليكم ورحمة الله وبركاته
[/align]
اولاُ : صبحكم الله بالخير جميعا .. والله يوفقك فيما نويت أخوي
أنا طال عمرك ارشح انك تفتح مكتب اذا عندك رأس مال حلو أو تقدر توفر رأس مال مع الوقت مع العلم ان موقع المكتب ضروري وبالنسبه لتوفير رأس المال مع الوقت ... الا وهو استقطاب المستثمرين سواء ناس تعرفها او ناس تبيك تشغل فلوسها لها وهي تستفيد وانت تستفيد ... لانك على حسب النظام الي تحطه هل انت تبي تأخذ نسبه على المستثمر او تبي تستفيد من قيمة العقود مع العملاء بتقسيطهم عن طريق هـ المستثمر .. طبعا [ المستثمرين ] شغلهم لحال لاحق عليه .. وبالنسبه للمكتب انا اقولك توكل على الله وافتح هذا رأيي وأتمنى تقول كم رأس المال في الأول .. عشان اشوف لك اذا تبي تستمر او تحتاج لمستثمرين بوقت سريع .

وبالنسبه طال عمرك لأحتياجات المكتب ؟
1 - لازم يكون بطريق مزدحم او معروف بالحي الي انت فيه او بالحي الي بيكون فيه طبعا لابد يكون الحي من الاحياء الي سكانها يحتاجون لهـ المبالغ الصغيره لتدبر أمورهم .
2 - استخراج سجل تجاري : يعني لو بأسم زوجتك .. راح تحتاج وكاله عامه من زوجتك ومكتوب فيها يحق له توكيل الغير .. وبهالوكاله انت راح تسوي لك وكالتين وكاله للمعقب الي راح يراجع الأوراق و وكاله لمدير المؤسسه الي طبعا بتحطه زوجتك في طلب استخراج السجل ولابد يكون [ متسبب ] وهذي غالبا سهله لان كثير بمكتب الخدمات يحط اسمه متسبب ويأخذ عليها مبلغ بسيط اضافه لخدماته في استخراج السجل التجاري لك .. وقيمة السجل 1000 ريال .. [ مدير المؤسسه . ليس له صلاحيات مجرد أسم فقط ] وبعد ماتستخرج السجل طال عمرك .. هناك تصديق المؤسسه وختمها ورأس مالها بالغرفه التجاريه .. والغرفه التجاريه تسأل عن رأس المال وغالبا مايكون رأس المال 25000 ريال .. توضع في حساب صاحب السجل التجاري [ وهذي بعد يقدر يدبرها لك المعقب حسب علاقاته ] طبعا الغرفه التجاريه تاخذ مبلغ 900 ريال .. وبالنسبه للمحل رخصة المحل من عند البلديه وهي بعد مايطلع الموظف يقرر كم يأخذ عليك حسب اللوحه والاشياء هذي ..

وصيغة العقود والكمبياله وهـ الاشياء كلها في برنامج معروف للتقسيط .. الي عليك هو تجيب لك جهاز كمبيوتر وطابعه بالمكتب وتنزل هـ البرنامج وموجود فيه كل شي بالنسبه للتقسيط وسهل الاستخدام ولكن هـ البرنامج مو مجاني ... انا راح اقولك اسم البرنامج وراح اقولك وين تلاقيه ... [ اذا اردت معلومات عن البرنامج وكم سعره وتجربته راسلني بالخاص .. احترام لهذا المنتدى ماقدر احط سعره ومكانه يمكن هذا ممنوع ]

وبالنسبه للفائده .. انا اشور عليك انك تقسط بطاقات سوا لسهولة حملها وحفظها عندك ماتحتاج مستودع ولا اي شي وفائدتك يعني على ماشفت من المكاتب واطلاعي على هـ الامور لو تكون 50% راح تكون حلوه وراح تستقطب لك عملاء .. لان اغلب المكاتب فؤادهم 60% وأنت والي تشوفه ..
وبتطلع عليك الحسبه :
5000 تقسط بقيمة 7500 على 15 شهر . كل شهر 500 ريال
10000 تقسط بقيمة 15000 على 15 شهر . كل شهر 1000 ريال
............. وهكذا

اتمنى اني ماطولت عليك واي شي تأمرني فيه انا تحت امرك .. وانا درست هـ الموضوع كثير والان ابشرك تم استئجار المكتب وتأثيثه . وبأنتظار رخصة البلديه لبدء العمل فيه .. والله الموفق

واتمنى دعواتكم لي بالتوفيق جميعا ... واسف لو تأخرت بالرد ولكن لانشغالي وقلة دخولي للمنتدى