السلام عليكم ورحمة الله وبركاته .

مبروك عليكم الشهر والله يبلغنا وياكم العشر .

راح اعطيكم نبذة مفصلة عن تجربتي مع الدواجن . وهي :

في البداية اول من فتح عيني على الدواجن شخص موجود بينا وله الفضل بعد الله في بدايتي مع المشروع وهو الاخ العزيز ع البراهيم . جزاه الله الجنة .

اول مادرست الموضوع اخترت اني اتخصص في تفقيس بيض الدجاج البلدي وبيع الانتاج صيصان والبيض يكون من مصدر خارجي . ليه اخترت التخصص هذا ؟ اقولكم ليه لانه ببساطة مايحتاج مكان كبير . والمكان الكبير ماهو متوفر عندي .

لكن يعيبه انه العناية اصعب بالصيصان الصغار . وايضا تحتاج اهم شي للمشروع واللي هي الفقاسات .

الفقاسات هي اغلا ما في المشروع وجدت انه الفقاسة الايطالية غالية وقيمة سعة الـ500 بيضة بـ 8000 ريال . والخيار الاخر كان الفقاسات الوطنية رخيصة لكن على ما قالوا الرخيص مخيس , وتحتاج تقليب يدوي على الاقل 3 مرات في اليوم , على انه في ناس شغالين عليها لكن حاطين عامل يقعد يقلب ليل نهار ونسبة التفقيس منخفضة فيها .

فقررت اني اصنع وحدة بنفسي وبمساعدة احد الاصدقاء العزيزين على قلبي , وكانت متعبة جدا وفي الاخير اتضح انه فيها عيب في التقليب الالي ونسبة الانتاج كنت 30% من الفقس والباقي يموت وهو داخل البيضة .

بحثت بعدها عن فقاسة تكون آلية بالكامل وغير مكلفة . ووجدتها وهي الفقاسات الصينية عند احد الصيدليات البيطرية في الرياض . وكان اسعارها حلوة لكن اعلى من اني استوردها .
فقررت استوردها من الصين بنفسي لقلة الدراهم اللي عندي . فطلبت ثلاثة فقاسات , ثنتين منهم سعة 264 بيضة وواحدة 440 بيضة . كلفتني الثلاثة مع كل التكاليف من جمرك ومكتب تخليص 6000 ريال تقريبا , وسالت عن قيمتها عند خوينا راعي الصيدلية طلعت بتكلفني 9000 وعليها شوي . يعني وفرت 3000 ريال .

وبصراحة الى الان ما عوضت اللي خسرته لاني موقف الشغل لظروف النقل في الوقت الحالي .

لكن انصح بالعمل في دجاج الزينة وخصوصا البراهما في الوقت الحالي لان عليه طلب . طبق البيض الملقح للبراهما يكلف 250 ريال تقريبا والبيع للصوص عمر اسبوع يجيبلك مو اقل من 25 بالميت وجيب اكثر كل ما كبر عمره .
وسعر البيع يحدده الوانها وصفاوة نسلها يعني مثلا شي انا بعته كانت الوانهم بنية واعمارهم الشهرين تقريبا كانو 5 صيصان الوانهم صافية ونسلهم اصيل بعت الواحد فيهم بـ 150 ما شاء الله تبارك الله . وانت عليك الحسبة بالنسبة لي الى اخر انتاج كان عندي ما بعت باقل من 37 ريال للحبة .

تعالوا نتكلم بلغة الارقام شوي ونقول :
شريت خمسة اطباق بقيمة 250 ريال يعني 1250 ريال
وعلف راسكو لاحم حجم 50 كيلومن افضل انواع السوق بـ 62 ريال(طبعا تزيد وتنقص حسب السوق )
تطعيمات وعلاجات وفيتامينات بـ 100 ريال .
المجموع 1250 +62 + 100 =1412 ريال

نقول انه نتج عندك نصف البيض في اسوأ الحالات ( طبعا يعتمد على جودة الفقاسة وتقدير رب العالمين قبل كل شي ) يعني 75 صوص براهما .

قول تبي تبيعهم جملة بدون فرز الالوان . بعمر شهر بـ 45 ريال .
ينتج معك 3375 ريال .
نطرح من القيمة هذي اللي دفعناه في الاول . يعني 3375 - 1412 = 1963 ريال صافي الربح من الانتاج هذا فقط - ما شاء الله تبراك الله يعني نسبة الربح في 51 يوم 139 % تقريبا . يعني في السنة 7 فقسات نضربها في نفس الربح والعدد يعني 7*1963 =13741 ريال هذا بدون تطور وعلى اعداد قليلة .

* للمعلومية المشروع في عالم التجارة ان كان دخله الصافي ما يقل عن 25% فيعتبر ناجح .

تخيل لو كان 20 طبق وما يفقس اللي عندك الا انت معبي الفقاسات مرة ثانية . عليكم الحسبة .

ارجوا اني اكون قد وفقت في ايصال الفائدة لكم فإن اخطأت فمني ومن الشيطان وإن اصبت فمن الله .

واي استفسار انا حاضر .

بس لاتنسى يا صاحبي البراهما انواع ومحتاج تكيف >>>يعني اشترو المكيف بالاول ولا تتوهقون
وربي يوفقكم جميعا

اشكرك اخوي الهلالي على التعقيب النافع .

وصحيح انه البراهما ما يتحمل حرنا لكن مو للدرجة اللي تتصور يكفيهم مكيف صحراوي وقت القيض .

والبراهما فئات وانواع كثيرة من الصافي التب ومنها المهجن ودرجة صفاوة اللون بعد لها دور.

وحبيت اضيف انه برضه في مخاطرة كبيرة بالنسبة لسعر الطبق مقارنة بالبلدي . لو خربت الفقاسة فجائة او زادت حرارة الفقاسة كثير ممكن يروح عليك البيض . وياما كليت هوا الين تعلمت .

يعني الشغلة تراها مو هينة يبيلها متابعة ومراقبة دائمة .

والله الموفق .

الله يعطيك العافية وماقصرت مشروع بسيط وممتاز ولكن اخوي هل عليه طلب اي هل في ناس تشتري وشكرا

الله يوفقك
وإن شاء الله تجد نجاحاً
دعائي بالتوفيق لكل الأحباب

عزيزي اشكرك على الموضوع

وارجوا ان تسرد لك مشروعك بالصور

لاني اشعر موضوعك بس حسابات

ما شاء الله

الله يوفقك اخوي