[align=right]
أخواتي واخواني.. السلام عليكم ورحمة الله..

أختكم شيهانة محتاجة فزعتكم عسى الله يوفقكم بهالشهر الفضيل..

قصتي تبكي .. إهيء إهيء.. .. بعد ماكنت موظفة في شركة مرموقة بالدمام لمدة 3 سنوات وبراتب مجزي (غير البونص كل 6 شهور ).. تغيرت الإدارة الرئيسية في الرياض وقرروا فجأه إغلاق فرع الشرقية.. ولقيت نفسي بين ليلة وضحاها (حلوه هذي) عواطليه وألف بين الشركات مع ملفي الأخضر... إهيء إهيئ..... ولاحد معطيني وجه.. آه على برستيجي الله راح هدر

عموما.. الوالد الله يحفظه يوم شاف دمعتي على خدي طول الوقت قالي شوفي يابنتي، أنا راح أستقدم سواق على كفالتي، وانتي اشتريلك سيارة وشغلي السواق عليها

بصراحة الفكرة مرة عجبتني مع أني عارفة أنها مش فكرة جديدة، بس أنا عانيت منها كثييييييير لما كنت على راس العمل (حلوه هذي؟).. لأني بصراحة عجزت ألقى سواق مناسب والأسعار مرررره غالية، وأفكر أني أتعامل مع بنات الكليات والموظفات..

عاد أنا كنت مخبية قرش أسود لليوم الأبيض.. وجمعت حوالي 30,000 ريال. وقاعدة أفكر من جد أني اشري سيارة وأدفع الدفعة الأولى، وباقي الأقساط أدفعها من شغل السيارة..


لكنننننننن.. عندي شوية أسئلة ياليت تساعدون اخيتكم فيها ولكم الأجر بهالشهر الكريم..


1. أيش رايكم بالفكرة من حيث المبدأ، بالذات للي مارسوا هذي الشغله، يعني هل هي مربحة ومناسبة لي واللا لا؟

2. أيش أفضل سيارة أشريها لهذي الفكرة؟ يعني أشري سيارة صغيرة (هونداي مدري شسمها)، والا متوسطه (كامري)... والا أشري سيارة مني باص... مع أن بنات الخبر فيهن زعطه وشايفات نفسهن وياربيييه ما يقبلون يركبون سيارة الباص هذي.. (فيه سيارة حلوه أبوابها تفتح توماتيك بس والله مدري وش اسمها أو كم سعرها)..

3. كيف أقدر أضبط شغل السواق واتأكد أنه ما يستغلني أنا يالمسكينه ويجلس يتكس على سيارتي لحسابه الخاص وانا ياغافله لك الله؟؟

4. هل فيه مشاكل من هالفكرة، وأيش المخاطر اللي لازم أفكر فيها واحتاط منها؟

5. كيف أظمن أفضل تشغيل للسيارة بحيث أنها ما تظل واقفة، لأن كل دقيقة تكون السيارة واقفة معناها خسارة لي، واللا وش تقولون؟

6. كم متوسط الدخل الشهري من هذي الفكرة؟ وكم لازم أدفع مصاريف شهرية (راتب السواق + بنزين السيارة + صيانة شهرية + تأمين.... )؟


الله يخليكم ياليت تساعدوني بأسرع وقت عشان أرد على الوالد، يا إيه يا يفتح الله ويشوف له وحدة ثانية غيري !!. ولكم مني الدعاء بالتوفيق بالدنيا والآخرة..




أختكم المجروحة/ شيهانة الخبر
[/align]

اختي العزيزه نصحيتي لك كل ما كانت السياره كبيره زاد عدد الركاب وزاد دخلك ومن ناحيه السواق لا يحرك السياره الا للمشاوير هذي بس والبنزين انتي تكونين معاه لاتقولين اخليه يجيب فاتوره ترا صارت قديمه يعبي 20 ريال ويقول لعامل المحطه سجل 30 لك 5 وانا 5 ريال قليله صح لاكن بالشهر كم؟ وبعدين وزعي اوراق عن الاماكن اللي يتجمعون فيها الحريم وسوي دعايه بسيطه وانتبهي من السواقين والله يستر عليك ويوفقك واي خدمه حاضر

اختي الفكره جدا حلوه بقولك الى عندي عنه خلفيه واترك بعض الاراء لمنهم خبره فموضوعك اول شي اختاري سياره نقل يعني تتسع لاقل شي 7 اشخاص مثل هونداي العايئلي(كرنفال) او سياره مشابه له كثير بالسوق كالفورد او الهوندا بعدين تسوين اعلان او صحباتك الى يدرسن بكليه او معلمات وتنشرين الخبريه دعايه يعني سياره مكيفه موديل حديث سواق ...... خلينا نفرض الوحده من500 ريال كأاقل مبلغ بيطلع اخر الشهر 3500 ريال طبعا بالنسبه للسياره ماراح تكون مع السواق علطول تشرطين عليه يوقفها عن البيت ويسلمكم المفتاح نهايه الدوام يعني بعد مايوصل جميع الى معه من طالبات ومدرسات يجي بكره الصباح يأخذها وعلى كذا طبعا خلينا نفرض ان السياره جديده شوي يعني ماراح تكلفك صيانه كثير اخر الشهر تغيير زيوت وفلاتر وصيانه خفيفه بحدود 300 ريال طبعا راتب السواق مااعلم عنه هذا بيتم اتفاق بينكم بس الى انصحك تسوينه قبل كل شي شوفي اسعار السوق يعني كم يأخذون على المدرسه الوحده لان شغلتلك بتكون على هالاساس طبعا يمكن تحصلين معلمات او طالبات خارج الخبر يعني مثلا رأس تنوره الجبيل الحسا وبكذا انتي الكسبانه الوحده بتدفع اكثر طبعا اذا ماتبين توقفين السياره باقي اليوم وتحسين بخسارتك سوي اعلان مشاوير داخليه خصوصا للعوائل بسياره مكيفه وسواق وووو انتى وشطارتك والزباين مجرد تركب مع السواق ويعجبها الوضع بشتهر سيارتك والسواق طبعا تكتبين بالاعلان المشاوير مثلا بعد الساعه 3 عصر الى هو نهايه الدوام لانك مرتبطه مع المعلمات او الطالبات وخميس وجمعه بأي وقت هذا كل الى عندي اختي واخر شي لك دعوه من قلب صادق ربي يرزقك من واسع فضله بالشهر الكريم ...[glow=CC0033]اخوك سلوم الشملاني [/glow]

أخوي أسد العلا وأخوي سلوم.. والله ماني عارفة كيف أشكركم على هذي المعلومات وهذا التشجيع.. الله يوفقكم ويبارك لكم في رزقكم.. من جد تحمست أني أمشي في الموضوع.

أتمنى من باقي الأخوان والأخوات يفيدوني بمعلومات أكثر وإجابات على الأسئلة. بالنسبة للسيارة ما أدري كم سعرها في الوكالة.


الله يحفظكم ويعتق رقبتكم من النار في هذا الشهر الفضيل..



شيهانة

شكرا على طرح الفكرة ..... وانا من قبل فكرت فيها وادرجت موضوع من اجلها :

https://www.btalah.com/t217421.html

الاخوان ماقصروا
والله يعوضك بوظيفة افضل منها

اتمنى لك التوفيق

السلام عليكم ورحمة الله وبركاته
اختي انا عندي سائق خاص مطوع مازكيه علي الله
له خمس سنين عندي معه رخصه وراعي امانه الشهاده لله مع العلم هو داعيه للجنسيه البنغاليه
واهتدت ناس علي يده جعل ربي لايحرمنه اجره
المهم يقولي بابا دور لي سياره بوصل موظفات وقلت له يابوك الموظفات لازم محرم
مع العلم هو يعرف يسوق ومن زمان بالسعوديه ودليله خاصه بالشرقيه
يعني يدل ولاهو راعي حكي كثير يعني مسنعه صح مافيه لايمين ولايسار
لذلك عندي خطه طبعا" الكلام لولي امرك مع احترامي لك
السائق متوفر ولله الحمد عندي استطاعه اوفر غيره لامشا الشغل
نتشارك بالسياره يعني السياره عليك والسائق علي والضمان اللي تبغون ونحط الله بعيونا
او نتشارك بالسياره ونحط لنا ضمان وانا المسؤول بالاسم امام الجهات الخاصه لان ماحد يعرف لهم الا انا والضمان نسويه عند محامي
ولله الحمد وجهن تعرفه ولاوجهن تنكره يعني عاملي خابره يمشي علي البيض ولاينكسر ههه
هذا ماعندي والله يرزقك ويرزقنا من فضله والسموحه علي الاطاله

ليش ما تجبين سواق وشغالة زوجته وتكوم محرم له في المشاوير ؟

اختي خذي لك فان سافانا جي ام سي وكاله طبعا سعره في التسعينات بس خذيه تقسيط وتوكلي على الله للمعلوميه الفان يتسع ل9 اشخاص والله يوفقك

الفكره ممتازه

والله يوفقك اختي