إذا ماعندك علاقات بتجار عقاريين واصحاب املاك ولاعندك سيوله لاتفتح مكتب
اشتغل في احد المكاتب الكبيره واكتسب خبره وعلاقات وبعدين توكل على الله وافتح المكتب

انا واخوي فتحنا مكتب عقار قبل سنتين في شارع عثمان بالرياض وفشلنا ... والاسباب هي

اولاً ماعندنا علاقات بملاك العقارات في تلك المنطقه سواءاً ملاك اراضي او عمائر تجاريه او فلل
ثانياً لو تجي بيعه لقطه ماعندنا رأس مالها عشان نشتريها ولا عندنا علاقات مع هوامير كاش عشان نتصل عليه ويشتري وناخذ السعي

كانت تجي صيدات اراضي وفلل وتنباع وحنا نتفرج !!

والمشكله يجيك احد ملاك العقار ويعرض عندك محل يبي يأجره تروح تحط لوحة مكتبك تلقى ثلاث مكاتب غيرك حاطين لوحاتهم ههههههه والمشكله السعي كله 1000 ريال

وغير كذا يبي لك موظف عنده خبره بالعقارات وياكثرهم تلقاهم مصريين او سودانيين منها يجلس بالمكتب ومنها لو يجيك مشتري او مستأجر يبي يشوف شيء معروض عندك تطلعه مع الزبون ولاتنسى تشري له كسرة سياره

هذا رايي بمكتب العقار بعد تجربه فاشله الله لايعيدها ، اما بالنسبه لاجراءات فتح مكتب العقار

اولاً اذا مهنتك مستبب او رجل اعمال ماعندك مشكله ، اما اذا انت موظف اهلي لازم تجيب موافقه من عملك
اما موظف حكومي او عسكري اغسل ايدك مايطلعون لك سجل تجاري
اذا مهنتك طالب تقدر تعدلها متسبب بكل سهوله تروح الاحوال وتاخذ طلب تعديل المهنه وتعبيه مع بيانات اثنين شهود انك متسبب وتختمه من عمدة حيكم وبعدها ترجع للاحوال ويعدلون لك المهنه

اجراءات السجل التجاري
يعطونك خطاب للاحوال تحضر برنت وخطاب للادله الجنائيه تجيب صحيفة البصمات وهذي مايطلبونها الا لمكتب العقار او الخدمات العامه وتعبي طلبك وتدفع رسوم السجل + اشتراك الغرفه التجاريه وتستلم سجلك ثاني يوم
وعلى فكره الآن توهم بادين باستخراج السجل عن طريق موقعهم اللي يوضح لك اكثر وتقدر تطبع الطلبات من الموقع
http://www.mci.gov.sa/
ولاتنسى الاستخاره و موفق ان شاء الله

موفق بإذن الله ... لك مني أجمل تحية .

الله يوفقك
والعقار كنز للي يعرف له ,,

كذب + نصب+ تدليس+خداع+ غرر+استغفال+حلف بالكذب+تحايل= مكتب عقار او شريطي عقارات او شريطي سيارات....


انا اشتري وابيع في الاراضي في منطقة محددة لي اكثر من سنتين....طبعا لحسابي الخاص......وماعمري طبيت في صاحب مكتب محترم...

كلهم شلة متقاعدين نصابين حرامية ....واحد اول امس يبغى يبعني ارض في وادي ويحلف بالله انها ارض مرتفعه.....

اخوي ....اذا تبي نصيحتي....بيع مساويك ولا تدخل مجال العقار

اخوي اول درس لازم تتعلمه هو كيف تبخس الناس حقهم...

يعني يجيك واحد يقولك يا فلان ابيك تشوف لي زبون في الارض....لنفرض ان الارض تسوى 180 الف

انت تقوله السوق وانا اخوك راكد وفيه حذر من المشترين لان فيه اشاعة ان الاراضي بتنزل ......... وطبعا لازم من الحلفان وانك تتمنى ان الارض تجيب له مليون ....<<<<هذي كلمة الشريطية دااااااااااااائما ولازم تحفظها صم...

بعد كذا تقوله انا ما ااقدر اوعدك انها تجيب لك هالملبغ لكن اصبر وربك كريم ....انت تحدها على 195 الف ....واذا جاك مشتري تقوله والله وانا اخوك فيه حركة قوية هاليومين والله العالم انهم بيسوون شارع ثمانين حول هالقطعه....وقسم بالله امس انسامت مني ب 193 صافي...يعني بدون دلالة.....ووالله العظيم ان الرجال مزنوق ومستعجل ....والا قسمن بالله العظيم انها تسوى 210 الاف....




وش رايك بهالاسلوب....؟؟؟؟؟


ترضى ان تكون تربيتك واخلاقياتك بهالطريقة؟؟

ترضى تزوج بنتك والا اختك لشريطي اراضي؟؟؟


فكر وانا اخوك بهالموضوع....وترا في اكثر من طريقة عشان تكسب بالحلال....وتجربتي هذي كانت في استثمار حلالي الخاص.....

ههههههههه

الله يسعدك ياحاكم بيزنطة , كلامك بالصميم

اسأل الله لك التوفيق بالربح الحلال

اخوي حاكم بزنطه
\طيب ليش ما اعامل الناس بالصدق باذن الله تمشي اموري بصدقي مع الناس ؟؟؟؟؟؟؟؟؟؟؟؟