يااهل الرياض تكفون ساعدوني

حلمي الامنية · #1 (**permalink**) 30-08-2010, 10:07 PM

السلام عليكم ورحمة الله وبركاته ,,,

يا جماعة الخير انا رجال متوظف وفي خير ونعمة ولله الحمد والمنة وكل ماااريده هو زيادة مدخولي ,,,
وصراحة ابغى تكون عندي سيارة تاكسي وكيف اطلعها وماهي الشروط اللازمة ؟؟

ثانيا مدينة الرياض مدينة كبيرة كيف ادل فيها لاني صراحة مااعرف الا العليا والملك عبدالله والملك عبدالعزيز يعني الاشياء الرئيسية !!!! انا مو من اهل الرياض
فياليت احد ينصحني كيف ابدا اعرف مدينة الرياض حي حي وشارع شارع ...
لاني شفت باكستاني يقول عرفت الرياض في خمس شهور ....
تكفون ماهي الطريقة المثلى لمعرفة احياء وشوراع الرياض معرفة تامة
الله يوفقكم ,,,

النيوزلندي · #2 (**permalink**) 30-08-2010, 10:24 PM

والله شف الرياض وانا من مواليده ما ادل كل مكان
اهم شيء تعرف المواقع الاساسية والمشهورة
يمكن بالبداية تعطي سعر قليل على المشوار ويمكن العكس
واحسن لك في البداية اشتر لك بـ600 ريال GPS وانطلق

بنت الطنايا · #3 (**permalink**) 30-08-2010, 10:25 PM

هنا شرح كامل لطريقة التقديم والشروط اللازمه للحصول على سيارة اجره عن طريق بنك التسليف

الشروط الرئيسيه :

- العمر لايقل عن 21 ولايزيد عن 60
-المهنه طالب / متسبب / متقاعد
- رخصه عمومي سارية المفعول

اذا هذي الشروط تنطبق عليك تتوجه لوزارة المواصلات ادارة الطرق والنقل بمدينة الرياض وموقعهم مقابل القوات الجويه على شارع الملك عبدالعزيز يوجد فندق اسمه الزهره تدخل مع الشارع اللي قبله يجيك اول تقاطع تاخذ يسار تلقى مقرهم على اليمين

اولا تاخذ منهم خطاب موجه لادارة الاحوال المدنيه علشان تطلع برنت بالمهنه واذا عندك كرت عائله يكفي .. الاوراق المطلوبه منهم :

-برنت الاحوال او كرت العائله
-صورة من بطاقة الاحوال
-صورة الرخصه العمومي
-برنت من المرور بعدد السيارات المسجل ملكيتها على صاحب الطلب
( تاخذه من مرور الشرق ) قسم الرخص ولا يحتاج خطاب << امورهم سهله
- احضار الاصول للمطابقه

بعدين تاخذ منهم شي اسمه ( رخصة تشغيل اجره - افراد )

تتوجه بعد كذا لبنك التسليف والادخار السعودي ومكانهم الملز شارع الستين ومعك الاوراق التاليه :

- صورة بطاقة الاحوال
- برنت من الاحوال المدنيه او صورة كرت العائله
- برنت من التأمينات الاجتماعيه
- برنت من المرور
- صورة الرخصه العمومي سارية المفعول
- رخصة تشغيل اجره - افراد

بعد كذا تتم دراسة الطلب خلاال مده 10 ايام الى شهرين - ويجيك اتصال منهم بالموافقه من عدمه اذا بالموافقه يطلب منك الاتي :

- كفيل غارم موظف ولايقبل اصحاب السجلات التجاريه في الكفاله
-تغيير المهنه الى ( سائق اجره ) من الاحوال المدنيه

نجي لسعر السياره والاقساط ومدتها :

يتم تقسيط السياره بنفس سعرها ( بدون فوائد ) ويضاف لها ( التأمين ) يعادل 12 % تقريبا من قيمة السياره مثلا كامري سعرها 71 الف + 8520تأمين = 79520
وتقسط على 48 شهر بمقدار 1656 شهريا

طريقة دفع الاقساط

عن طريق الصراف الالي خدمة سداد ورمز المستفيد 058 ( بنك التسليف ) وبامكانك تسدد جزء من المبلغ المستحق او اكثر من المبلغ المستحق

وبالتوفيق للجميع

اما بنسبه اذا تبي تدل الرياض ماعليك الا انك تفر فيها لين تحفظها

احمدالمزيني · #4 (**permalink**) 31-08-2010, 12:01 AM

موفق بإذن الله ... لك مني أجمل تحية .

حلمي الامنية · #5 (**permalink**) 31-08-2010, 12:12 AM

جزاكم الله كل خير ,,,,

حلمي الامنية · #6 (**permalink**) 31-08-2010, 12:14 AM

يعني من كلامك اختي بنت الطنايا ان الموظف ماله حق ان يشتري سيارة اجرة ؟؟؟؟؟؟؟؟؟؟
ارجو الاجابة !!!!!

بنت الطنايا · #7 (**permalink**) 31-08-2010, 12:40 AM

والله اتووقع مايمدي لكن لو تسال يكون احسن
بنسبه لوضعك

لو تشوف لك سياره تكسي للبيع
او تشتري سياره بمبلغ متواضع وتقلب لونها ابيض وتطلع عليها ترخيص اجره وتسوقها بدون تالجاء للقروض اذا ماتقدر
في موضوع لشخص بقسم شراء والبيع كان عارض لموزين للبيع ب 17 الف ريال
مادري نباعت ولا لا

بس دور وشوف سياره مناسبه لموزين للبيع او سياره خصوصي وقلبها اجره

وربي يوفقك

حلمي الامنية · #8 (**permalink**) 31-08-2010, 02:04 AM

^^^^^^^^
الله يجزاك كل خير ويوفقك لكل مافيه الخير والصلاح

بن عامر 12 · #9 (**permalink**) 31-08-2010, 08:02 AM

اخوي انت موظف ماتقدر تشتري تكسي ،، مالك الا انك تشتري باسم اخوك او باسم اي واحد وتشتغل عليه بنفسك وماعليك

إدارة أعمال · #10 (**permalink**) 01-09-2010, 01:29 AM

وشلون تدل الرياض ؟

أنا من سكان الرياض وما أدل كل المناطق أضيع بعض الأحيان .
لكن مع الوقت صدقني بتصير دليله ( دليلة يعني ماجلان الرياض ) .
صحيح انك بتواجه بعض الصعوبات ، لكن من بغى الدح ما قال أح .