صحيت يوم السبت باكراً مع زقزقة عصافير ذلك اليوم الحار المشمس
تقريباً الساعة 6.30 صباحاً .. أول ماصحيت جأني تأنيب ضمير غير طبيعي
يقول : إلى متى وأنت على هالحال دايم تفوتك صلاة الفجر .. المهم أني
استغفرت ربي خطيأتي وقمت و توضيت وصليت الفجر وبدأت استجمع قواي لبست ملابسي
وأستعددت الخروج والذهاب الى المجهول للبحث عن وظيفة في مكان تصل مساحته
الـ 100.000 كيلوا متر ..
توكلت على الله وأخذت اغراضي ومايلزمني وركبت سيارتي واتجهت أولاً الى
بوفيه حارتنا وطلبت ( 2 جبن سايل وواحد حليب شاي )>>> تسمع بالتفصيل 
في البداية أتجهت الى بعض اعمالي الخاصة ثم انطلقت الى الصناعية
ووصلت مكاني المزعوم على الساعهـ 10.30 تقريباً
وأول شيء سويته رحت لإدارة الصناعية 2 .. دخلت المبنى
ومالقيت إلا موظف واحد في العقد الرابع من العمر ..
أنا : السلام عليكم .
الموظف : وعليكم السلام .. هلا مرحبا سم آمر .
أنا : مايامر عليك عدو .. أنا سلمك الله خريج جامعة وأبحث عن وظيفة ما أدري
وش أفضل طريقة للبحث عن وظيفة وهل فيه شركات عارضه وظايف أو طالبه موظفين
الموظف : والله يا أخوي صراحةً مالنا علم بالشركات وحاجاتها حنا مالنا علاقة
بالتوظيف ونعتبر وحدة مستقله عنهم .. وبالنسبة لإدارتنا للأسف مافيه حاجة لموظفين جدد .
أنا : طيب أخوي .. ممكن تدلني على أقوى الشركات في الصناعية أو تعطيني على الأقل خريطة للصناعية .. بحيث يكون عندي خلفية عن اللي أبمر عليه .
الموظف : الشركات ومواقعها شفها كلها قدامك في الخريطه معلقينها بالسيب ( الممر ) .
أنا : طيب .. يعطيك العافية .
( ملاحظتي : حرام إدارة مدينة صناعية كاملة ومبنى
بدورين ولا يوجد فيها الا موظف واحد لايملك أي توجيه ولو بسيط للباحثين
عن العمل .. حتى خرائط توزع لمن يحتاجها لايوجد 
) .
توجهت الى سيارتي وبدأت البحث .. أول مصنع وقفت عندهـ كان
مصنع الشرق نزلت من سيارتي كاشخ ومررت بحارس البوابة اللي سبحان الله
كاني ألد أعداءهـ .. أستقبلني بطريقة مقرفة جداً .
حارس البوابة : نعم نعم .. بغيت شيء
( بعذرهـ شاف الملف الاخضر وعرف وش أنا من لحية )
أنا : لا ابد سلامتك بس ادور وظيفة
هـو : لا ماعليش مافيه وظايف
أنا : وأنت وش دراكـ .
هـو : أصلن مافيه وظايف ولا موظفين توكل على اللهـ .
أنا : طيب لا تدف 
(تعوذت من أبليس وقلت ياولد توكل على الله وشف غيرهم والله مانيب فاضي لهالمريض )
بعدها توجهت لمصنع الجريسي لصناعة ورق الطباعة A4 .. نزلت من
السيارة ودخلت مبنى الادارة واللي يحوي تقريباً 20 موظف كلهم من جنسيات
عربية وأجنبية .. لم أقابل فيهم شخص واحد سعودي .. أستقبلني مديرهم وهو من جنسية
عربية وكان استقباله وهي كلمة حق أستقبلني أحسن استقبال قهوة شاهي
دردشت معه عن العمل وفرصته في مصنعهم .. ذكر لي أنهم
ليسوا بحاجة موظفين في الوقت الحالي
ولكنهم بحاجة ملحة إلى محصل للشركة ولا أهمية للشهادة ماعندهـ مانع
يقبل حتى أللي عندهـ كفاءة وهي براتب مع النسبة
تقريبا 3000 ريال على الأقل وقد تصل الى 5000 ولكن تحتاج
الى مجهود خرافي وطبيعة العمل ( الذهاب في كل يوم الى المصنع
بصناعية الخرج ثم الانطلاق الى العملاء الموجودين في مدينة
الرياض وقد تمتد ساعات العمل من 9 – 10 ساعات يوميا .. أخذنا وعطينا
بالسواليف وبدأ يسولف لي عن وضع الشباب السعودي بنظرهـ
من باب أنه معايش الوضع في السعودية من عام 1400 هـ وجدت
الكثير من الحقائق ومنها أن الشباب السعودي مرفه - - - أنا بيني وبين
نفسي أقول ( من حقهم ) إذا كان في دولة عز فليه مايستعز .. يعني
المفروض هالوظيفة اللي قلت عليها مايشتغلها السعودي الا براتب
على الاقل 10000 ريال ... ولــــكن للأسف المفروض شيء والواقع
شيء ماعلينا المهم طلعت من عندهـ بكم هائل من المعلومات
عن الشاب السعودي وأنه مايصبر ومن هالكلام ..
وبدأ يذكر لي أنهم مرفهين ومو حقين شغل ولم يومنوا بأن
العمل عبادة وأن الوضع الحالي يحتاج منهم إلى الكثير من الجهد
شكرته على نصايحه وأستلمت الباب خارجاً
بعدها توجهت الى مصنع التيسير ولقيت فيه نفس مالقيت في أغلب المصانع أجانب في أجانب ..
** لايوجد وظائف **
توجهت بعدها لمصنع أستيبكو –موزع معتمد لسابك
دخلت عليهم وجهوني إلى المسئول وهو شاب سوداني
لابس عقال ويتكلم سعودي ..
أنا : بعد مالقيت عليه التحيه وبعد تكرار الاسطوانه الشرحية عني .. سئلته ما أدري أحصل لديكم وظيفة ..
هو : والله يا اخوي الوظايف ماعندنا حاجهـ حالياً وخاصة الوظايف الإدارية أما وظايف العمال فما زال عندنا حاجهـ وملحة جداً .
أنا : طيب كم توظفون اللي معهـ البكالوريوس
هو : وش التخصص
أنا : محاسبه
هو : يعني تقريباً 2500 إلى 3000
أنا : وبكل قوة عين .. يا أخوي حرام هاذي يستلمها اللي معه كفاءهـ .
رد علي واحد سعودي كل أيدينه أوراق ( شكله المعقب ) .. وواقف وقفة كلها أنضباط بجنب سعادة المدير
قال : أحمد ربك غيركم مايلقاها 
( يقول أنه يعرف واحد معهـ جامعه ومتوظف بـ 1500 وأنه مبسوط ومستانس ..
أنا : ضحكت ضحكه أستعباطية وأستأذنت وطلعت بسرعهـ ( خفت أخربها ) 
بعدهـ توجهت إلى ... .
.
.
.
.
أنتظرونا ..!!
أخوكم أبو خالد - الرياض
10-09-2006, 08:12 PM
العرض العادي
