السلام عليكم ورحمة الله وبركاته
انا توني اختبرت في مكة محضر خصوم
كانت للأسف الشديد في اللجنة الاولى
( اللجنة الثالثة يقول تكلم عن نفسك واكتب كلمتين واكتب
اسمك والباب بس)
( اللجان الثلاث عبارة عن شقه واحدة وكل باب داخل الشقة لجنه فيه ثلاثه مطاوعه)
ولما نادوا اسمي دخلت على ثلاثه اشخاص سلمت سلام كامل ردوا وقال لي واحد منهم اجلس
جلست ولا اثنين مقابليني اللي هم الشيوخ واحد قاعد على جنب بس طابق الهويه
طبعاً الشيوخ اثنين واحد حمران يعني محمر كأنه من القوقاز ولا يعرف يبتسم (لله في خلقة شؤن)
والثاني اسمر فيه 126 علامة مدري وشي علاماته في جبينه وفي عينه وتحت عينه في خشمة
وفي برطمه
وحدث ولاحرج ولكنة مبتسم واخلاقة يعني احسن من حمران
اول شي سالني حمران قالي وش شهادتك قلت لة
قال لي تكلم عن محضر الخصوم تكلمت بما فتح الله علي
قال وش تعرف عن المرافعات الشرعيه ؟
قلت لة معرفها قال ولا سمعت عنها قلت الا تكلمت اي كلام في اي حاجة على ماقالوا
قال لي طيب وش الفرق بين المحاكم الاداريه وديوان المظالم؟
برضه اي كلام في اي حاجة
قال كم تحفظ من القرآن قلت لة ماتيسر ياشيخ
استلمني ابو سمرة قال ليه تقدم على العدل اصلاً قلت وظيفة شاغرة وقدمت عليها قال بس قلت
ايه ( الظاهر كان يبغاني اقول علشان كلها مطاوعه ومن هالكلام المهم ماقلت )
قال طيب راتبك في الوظيفة اللي انت عليها اعلى من راتب الوظيفة المتقدم لها
قلت صحيح بس وظيفة الحكومة تفرق قال كيف ؟
قلت لسببين : الاول امان وظيفي في وظائف الدولة بإذن الله عز وجل
السبب الثاني الثاني الخميس مافيه دوام
قالي وش مراتب الدين ؟
قلت عيد السؤال المهم قال سؤالي واضح
شوي وقلت لة الاسلام والإيمان والإحسان
قال كم اركان الإحسان قت ركن واحد
قال طيب ( السؤال التالي وصل ضغطي H بس اني كظمت الغيض )
قال الاترى ان موظف الدوائر الشرعيه لابد ان يكون مظهرة شرعي ( يقصد اللحيه لاني حليق)
قلت بلى ياشيخ بس سلامة الباطن اولى من سلامة الظاهر
قال انا اتكلم عن الظاهر قلت ان شاء الله مظهري جيد
قال الله معك
وطلعت وانا مكسور الخاطر
ولكن رزقي على الله عز وجل وليس عليه ولا على غيرة
هذا كل ماحصل معي بإسهاب والمعذرة لاني حسيت انهم يسألون قاضي مايسألون محضر خصوم
واعتقد ان المسألة ( اي الوظيفة حسمت مسبقاً والعلم عند الله عز وجل)
اتمنى لكم التوفيق جميعاً
01-11-2010, 01:18 AM
العرض العادي
