يفرح ليا من عقّب الرجـل رجـال
يتعب عليه وفـوق متنـه يشيلـه
يعلمـه ويزوجـه طيـب الـفـال
ثم يتركه لا منـه أثمـر حصيلـه
يتبع هوى الزوجة وعن بوه ماسال
ومفارق أمه عنده أحسن وسيلـه
ليته ومثله ما يعقـب لـه عيـال
درويش ما يفهم حقـوق القبيلـه
وفي البيت ما ينقل من الهم مثقال
و ينفذ اللـي تآمـر بـه الحليلـه
يلبس ثياب بيض وينكـس عقـال
ضعيف شخصيـة بركتـه قليلـه
لا صار ما له بين الأجواد منـزال
حاول تخلـص منـه والله يزيلـه
إلى نقل همـه وغمـه ولا احتـال
يدري أن عليه حقوق لك مستحيله
ياللي يحب الغطرسة بين الأجيـال
عيب عليه ونقص وأكبـر فشيلـه
ومن لا سأل عني فأنا عنه ما أسال
صديت عنه وبارقـه مـا نخيلـه
ماكـل رجـال يسمـى بـرجـال
أصيل من روس الرجال الأصيلـه
يقال والله خاب من خيبـة الخـال
ولا بد مـا يقفـى بكلمـه رزيلـه
ورجال تاثق فيه لا حسـك الجـال
زومان شيـال الحمـول الثقيلـه
حلال صعبات المعانـي والاشكـال
يصبـر لميـلات الدهـر وتعديلـه
ورجال بيتـه للمساييـر مدهـال
وإن لاذ به مظلوم يخلـي سبيلـه
ورجال لا غاروا هل الخيل خيـال
حامي التوالي بالسيوف الصقيلـه
ورجال يحسب من رجاجيل الاعمال
ورجال لا يغـزي ولا ينغـزي لـه
ورجال ناقص من دروب التمرجال
الله يحرمـه الجنـان الفضيـلـه
ورجال فيه الكبر والـزوم دجـال
ويش راس ماله يوم ينفخ صميله
بالكذب والنمة يزلـزل لـه حـلال
مـوذي عبـاد الله غـاوي ذليلـه
النذل من طبعـه يحبـوه الانـذال
ذنبه علـى جنبـه جديـد مديلـه
ورجال بالمجلس إلى صب فنجـال
خذاه باليسـرى ويعطـي زميلـه
دنيا لها صـولات ولهـا تجـوال
وابـن آدم لابـد يبنـي رحيـلـه
وبيت بليا سـاس مبنـاه ينهـال
ساسـه ردي ولا يزبـن دخيـلـه
وغصن بدون أوراق ما تحته ظلال
كبـه ودور لـك شجـرة ظليلـه
يذري ذراها لا حداك أشهب الـلال
لاصارت حبـال المـوارد طويلـه
ولاني وكيل آدم على دق وجـلال
والعـد جمـه مـا يغطـه نثيلـه
عبرت عما شفت في بعض الاحوال
وختمانهـا تكبـيـرة وتهليـلـه

للشاعرعبدالرحمن الواهبي


وتقبلو تحياتي