تسجيل الدخول
|
|||||||
تأسس الموقع عام
2006
Site was established in 2006
|
|||||||
| موضوع مغلق |
|
|
LinkBack | أدوات الموضوع | انواع عرض الموضوع |
30-09-2010, 11:32 PM
|
||||
|
||||
|
شامل دورة الأمن العام من التسجيل للتخرج ...}
السلام عليكم ورحمة الله وبركاته طبعاً كل سنه يسجلون مجموعة كبيره في الأمن العام ويجلسون في حوسه يبون المعلومات عنه عشان كذا حبيت اكتب ذا الموضوع شامل يبقى في منتدى البطاله لطلاب دورة الأمن العام كل سنه أول شي في التسجيل نبدأ ونقول بسم الله .................................................. ........... مناطق التسجيل الرياض .. مكه المكرمه .. عسير .. الشرقيه .. القصيم .. المدينة المنورة منطقة الرياض و مكه المكرمه طلابها يستلمون رواتب ويتسجلون عسكر من بدري عسير و الشرقيه والقصيم والمدينة طلابها يستلمون مكافئات شهريه ومايتسجلون عسكر الا بعد التخرج طبعاً تسجل عالنت وتاخذ رقم الطلب يطلع رقمك تجمع اوراقك المطلوبه على الموقع وتروح لهم يوقعون لك على صورة الشهادة وحسن السيرة والسلوك ويقولون لك خذها معاك والمقابله الثانيه بتاريخ كذا تجيب معاك الورقتين ذي طبعا الورقتين ذي تحفظها لأن أهم منك بالنسبه لهم تخلص المقابلات اللي هي طبعا صارت معروفه عند كل الناس بعدين تنتظر الأرقام النهائيه وذي اللي تلعب في الطلاب وكل يوم تلاقي ناس يقولون الأرقام تطلع في اليوم الفلاني لاتصدق لأن ماتطلع الارقام الا قبل الدورة يمكن بأسبوعين او 3 اسابيع بالكثير ندخل على الدورة فترة الإستجداد الـ45 الطلبآت ... طبعاً الطلبات المطلوبه في الموقع انت بتقراها وتجيبها معاك لكن بضيف لكم طلبات عشان ماتحوسون بعدين وهي اغراض شخصيه لكل طالب 1- معطر جسم ريكسونا خذ معاك 2 فقط . 2- مزيل عرق ريكسونا خذ معاك 2 فقط . 3- بودرة حساسيه وخذ معاك 1 فقط مقاس وسط . 4- الشرابات (( وانتم بكرامه )) خذ عدد كبير منها . 5-الداخليات كثير مايجيبون فانيلا داخليه لكن أحب انصح بها لأنها بتنفعك تحت التيشرت لأن وقت الجزاء تتمنى تلبس 5 فنايل على بعضها وثاني شي تشيل عنك العرق والقرف . 6- امواس حلاقه . 7- الفلوس خذ معاك 1000 ريال لأنني انا اصرفت في ال45 حوالي 800 ريال وزود شوي . 8- ملايه وبيت مخده .<< لأن ملايتهم ومخدتهم وسخه . 9- قفل للشنطه حقتك عشان الحراميه . ...................................... الحضور لفترة الاستجدادالـ45 لاتكون عند مدينة التدريب الا الساعه 6 و 45 دقيقه تعال خلك هناك عشان ماتطيح ملطوع وتقرف نفسك . طبعاً بتدخلون من عند باب القبول والتسجيل اللي كنت تجيه في المقابلات . يصفونكم مجموعات ويبدون يدخلونكم على الميزان والطول مرهـ ثانيه . وشوي يجون المدربين حقين التدريب وياخذونكم طوابير يدخلونكم صالة الاجتماعات الين يجي اللواء سعد الخليوي يعطيكم الكلمه المعتادهـ يعلمك اللي لك واللي عليك واقولك كلامه يقولك تنفذ كل شي وخلك محترم ترى بنطردك وبنسوي وبنفعل لك 3 ذي اعترض فيها دينك << اذا احد قالك لاتصلي قولي لا بروح اصلي ولا عليك فيه مالك << اذا قالك مدرب ولا اي مسؤول سلفني ولا هات الفلوس قوله لا . شرفك << اذا قالك احد افسخ سروالك يعني بيجازيك ولا شي قول لا ارفع السروال الين حد العورة وقول بس جازيني مثل ماتبي بس سروالي ماني منزله . غيرها يقولك تنفذ لو يجازيك وانت ماسويت شي تنفذ ولا تقول كلمه غير أمرك . بعد مايخلص اللواء الخليوي من محاظرته يطلع يجي القايد حق السريه يبدأ يوزعونكم فصايل وتطلعون مع المدرب حقكم تشيلون عفشكم تروحون جنب صالة الاجتماعات يبدأ التفتيش يفتشون كل اغراضك وتفتيش شخصي وطبعا اللي بيحط جوال ولا بطاريه في السروال اقوله يطمن نفسه عندهم جهاز يكشف وبتروح وطي الجوال خبيه في العفش يمكن تسلم وتعدي لكن في السروال بتطيح بعد ماتخلصون من التفتيش تشيلون عفشكم وياخذكم المدرب ويقول يلا هروله للسكن تروحون السكن وهناك يبدأ ترتيب السراير والتوزيع وتحطون عفشكم وكل شي بعدين صلاة الظهر بعدين يعلمونكم موقع فصيلك في الميدان عشان اذا قالوا تشكيل تشكل في موقع فصيلك بعدين تروحون عالميز طبعا الميز أكله مافي أخيس منه الله يعز النعمه يارب كل الأكل مليان كافور وانتم عارفين ليش حاطين كافور مايحتاج اشرح . بعد الميز ترجعون عالسكن وبعد كذا صلاة العصر بعدين عالميدان بيعدي يوم التحضير سهل بس النفسيه رديه شوي . نبدا في اليوم الثاني يدق البروقي قبل صلاة الفجر بساعه تقوم تغسل تتوضى تلبس اللبس الرياضي لأنك بتنام بالبيجامه بعدين تضبط نفسك وتروح للمسجد بعد الصلاة ترجع موقع فصيلك تصف يجي المدرب ياخذ تكميلكم وهو يعني يشوف اذا فيه احد لسى نايم بيلعنون خيره بعد كذا تبدأ الحصه الصباحيه الحصه الأولى 45 دقيقه 30 دقيقه هروله بعدين تمرينات لياقه بعدين راحه 5 دقايق بعدين الحصه الثانيه 45 دقيقه وهي تعليم حركات عسكريه بعد الحصه الثانيه تروحون عالميز يقولون لكم لانسمع صوت في الميز لو سمعنا صوت بعد الميز ترجعون مواقعكم في الميدان جزاء واذا انتم عاقلين يصرفونكم على السكن تجلسون الين قبل الصلاة بـ ساعه تتوضون وتروحون للبوفيه ومن البوفيه عالمسجد بعد الصلاة ترجعون للميدان تشكيل الين يفتح الميز بعدين تتوجهون للميز نفس النظام لو ماطلع ازعاج واصوات في الميز بترجعون للسكن لو طلع ازعاج جماعي بتشكلون في الميدان تصليبه جماعيه جزاء واذا كفشوا شخص او شخصين يتكلمون في الميز الله يعينهم يرجعون اكلهم اللي اكلوه . بعد كذا صلاة العصر وبعد الصلاة على حسب المناوب المستلم بعضهم يقولكم من المسجد عالسكن الين قبل الحصه بربع ساعه يدق البروقي تشكيل وبعضهم يخليكم في الميدان مشكلين بعضهم يعطيكم وضع الجلوس تجلسون وبعضهم يقولكم خلوكم واقفين واذا سمع صوت عطاكم ايعاز للوراء درر وقبوع انزع ويخلي صلعتك تحت الشمس تنشوي . وبعد كذا تبدأ حصة العصر 45 دقيقه وطبعا تعليم حركات عسكريه مافيها هروله والي يقولك لاتخلي المدرب يعرفك معاليك في كلامه لآن المدربين بيحفضونكم من اول يوم بعد الحصه العصريه يصرفونكم عالبوفيه وبعدين تتوضون وعلى المسجد صلاة المغرب بعد المغرب تشكلون يرفعون التكميل وبعد كذا تروحون الميز تتعشون ومن الميز على المسجد وبعد صلاة العشاء فيه مناوبين على طول يرفعون التكميل ويصرفوكم على السكن وضع النوم وفيه مناوبين يجازونكم الين عاد متى مابغى يصرفكم وهذا يعتمد على انضباطكم وعلى طيبة المناوب المستلم بعدين وضع النوم تروحون السكن اللي يبي ياخذ دش وهذا افضل خذ دش وتنضف وحط البودرة وضبط وضعك البس البيجامه ونام على طول افضل لك لأن اول ايام الدورة في فصل الصيف الليل قصير خذلك نومه افضل لك من السوالف طبعا في ال45 ضعاف النفس كثير وانتبه ل فلوسك واغراضك من السرقه طبعا نصيحه لكل طالب يحطونه ظابط صف لايغرك كلامهم اذا ماتعلم على اللي يبزوط ولا ماتطلعه ولا ماتسوي بنسويلك وبنسويلك ويعطونكم مغريات يقولون انت ياظابط الصف لك مميزات كذا طبعا كله خرطي وهياط بس ونصيحه اذا قالك انت ظابط صف ارفضها وقول انا ضعيف اخاف يضربوني ومااقدر تحجج بأي شي اهم شي اخوياك لاتخليهم يزعلون منك لو تتجازأ عنهم لأن اخوياك اللي معاك هم اخوياك مو المدربين ترى دورة وتروح عنهم وبتبقى مع اخوياك . ذا نظامك بيكون في ال45 ماعدا يوم الخميس ماعندك الا حصص صباحيه بس وحصه عصريه ماعندك ويوم الجمعه نفس النظام بعد الفجر تشكيل وميز فطور بعدين عالسكن عندك اعمال اداريه تغسل ملابسك الوسخه وتضبط وضعك الين الظهر تصلي الجمعه وتشكيل وميز وباقي اليوم صلاة وتشكيل ماعندك حصص . طبعا بتسمع اشاعات كثير كثير عن التخرج بقولك تطمن 39 يوم بتاخذها زي السلام عليكم معاليك في الاشاعات الكثيره والمقنعه اللي بتسمعها طبعاً الكلام الوسخ من المدربين يا كثرهـ وكل انواع الوساخه تطلع منهم لكن لاتقول خل كرامتك برى لأن الرجال من غير كرامه مايسوى لكن مهما قال لك المدرب خل في بالك حكمه وحدهـ (( كلام الخر مايضر )) والحكمه الثانيه (( والقافله تسير وذاك الشي يقول هوهو )) يعني لاتجادله ولاترد عليه خله ينابح مثل مايبي معاليك فيه في ربك بيحاسبه على كل كلمه قالها بس انت قول حسبي الله ونعم الوكيل وبس . وطبعا الدورة بتكون جامعه شباب من كل مكان لاتفكر بيكونون كلهم رجال فيه وراعين كثير ولايغرك العمر فيه بعضهم عمره صغير لكنه رجل بكل ماتحمله الكلمه من معنى وبعضهم كأنه شايب لكنه ورع وضعيف نفس عشان كذا في ال45 لاتشد مع اخوياك الطلاب خلك انت الافضل في كل شي الكلمه الشينه اذا جاتك صد عنها واستحقرها هي وراعيها لاتتضارب ابد ابعد عن المشاكل . بتستلمون البدل العسكريه في اخر اسبوعين من ال45 والقايش والبصاطير وانتم بكرامه والتحليل و تروحون للعياده يعطونكم ابرتين في اليدين عشان انتداب رمضان بعد فترة الاستجداد ال45 يكون تحضيرك بعد 10 ايام مقيف البذله وتجيب الطلبات اللي يعطونك هيا تجلسون السبت هناك يكون طول اليوم يوزعونكم توزيع الباصات وفي الليل تحطون اغراضكم في الباصات وترجعون السكن وقبل الفجر تشكلون وتصلون وترجعون تشكلون بعدين يوزعون عليكم الاعاشه تاخذها معاك الباص بعدين تركبون الباصات وتمشون على مكه طبعا الباص مايوقف ابد الا اذا السواق كفوو يوقفكم في استراحه وسوو بالضبط مثل ماسويت في باصنا نزلت انا لحالي شريت كرتون كود رد وكرتون بيبسي وحمضيات وجبت اكل وفصفص وجلكسيات وبنرنجلز وشيبسات وفله السفر وطلعات وماقصروا الشباب قالوا كم الحساب علمتهم وتوزعناه على عددنا يعني مثل القطه واذا وصلتوا مكه تشكيل وتوزيع ورديات وحوسه في مكه (( انتداب رمضان )) على حسب دورتك انا دورتي اعمال مرور كان عملنا على حواجز مكه ورديتنا 6 ساعات ونريح 24 ساعه فيه ورديات 6 ساعات ويرتاحون 40 ساعه طبعا في دورات يكون عملهم في الساحات حقت الحرم المشاكل اللي بتواجهكم في رمضان طبعا كثير طلاب في استلامات النهار تحت الشمس بيفطر اذا بتفطر يا صاحبي لاتفطر قدام الناس روح بقاله وادخل داخلها واشرب اللي تبي واكل وارجع موقعك واذا قالك عامل البقاله مافيه فطور داخل البقاله << طبعا لانه خايف لأن تجيهم مشاكل وغرامات لو انكفشت عندهم يصيرر تخبي اغراضك تحت البذله وتشوف لك حوش او مكان بعيد عن الناس وتفطر وترجع موقعك لأن فيه امن وحمايه يصورنك وعلى طول قرار اداري الغاء دورة فيه 2 في كتيبتنا انفصلوا بسبب الفطور غير اللي تأخرت دورتهم شهر وسجن لأنهم ماانكفشوا متلبسين بس كانوا شاكين لقوا حولهم مويه بارده واكل طبعا انتداب رمضان ذا احلى شي في الدورة لانه فله اخر شي الاستئذان في الانتداب يطلعونكم من فترة ل فترة وغالباً الشباب يشردون من الشبك وكذا طبعاً مافيه رقابه قويه وفله الدخان معاكم في السكن وغير البلوت اللي يحبون البلوت ينبسطون هناك وطبعا بتكونون في سكن الطواري في عرفات البوفيه حقتهم فله ساندويتشات وكود رد وبساكيت وفله اخر شي بس طبعا السكن وسخ وقرف ودورات المياه حقته خربانه وخصوصا اول الايام بعد ماتخلصون الانتداب يفكونكم في مكه يوم العيد يجي اللواء سعد الخليوي ويقول كلمته وشكر وكذا ويفكونكم على الساعه 10 صباح يوم العيد عاد تركبون مع الكدادين وكلن يروح ديرته تحضرون بعد 15 يوم التحضير يكون بالبذله العسكريه اللي يوزعونها لكم في سكن عرفات وتكون مقيفها مثل مايعلمونكم وتجيب اغراضك طبعا لاتكثر لآنك 5 ايام وتطلع الدوام يكون تصحى الفجر عندك حصه هروله 45 دقيقه طبعا بتهرول10 دقايق وراحه على حسب المدرب بعد كذا عالميز فطور وبعد الميز تروح السكن 10 دقايق وتشكل عشان تروحون الفصول الدراسيه 4 حصص يوميا كل حصه 45 دقيقه ويكون النظام حصتين ساعه ونص وفسحه نص ساعه تروحون للبوفيه وبعدين حصتين وعلى السكن تتوضون وتحطون الدفاتر وتتوجهون عالمسجد بعد الصلاة تشكيل وميز وعالسكن وطبعا اللي عنده اي ملاحظه يسجلون اسمه وعلى طول بعد الغداء يكون من ضمن مجموعة الطابور الاضافي والطابور الاضافي يكون يوميا بعد الغداء 45 دقيقه جزاء يكسرونك تكسير لكنه والله فله وضحك بعدين صلاة العصر طبعا احنا في اعمال المرور نطلع بعد صلاة العصر الين العشاء الساعه 9 نرجع السكن نطلع موزعين عند الاشارات اللي مو رابط الحزام نقوله اربطه واللي مضلل نقوله فكه وكذا وعندك كل الصلاحيات قسيمه حجز مثل ماتبي لكن احنا ماخذينها فله مطاعم وبقالات ودخان وفله وغيرنا يكون ماعندهم شي العصر مافيه حصه بس يجلسونهم في الميدان شوي وعاد على حسب المدربين اللي عندهم احيانا يقولون بوفيه وسكن وكذا فلته المغرب صلاة وبعدها ميز وبعدها صلاة العشاء ونوم وهذا نظامك بيكون الين نهاية شهر 11 طبعاً اذا سلمت من الحجز انت بتطلع كل اربعاء وترجع الجمعه مافيه جزاء جماعي غير تأخير يعني بدل مايطلع الفصيل او السريه الساعه 10 صباح يطلعون بعد الظهر لكن حجز جماعي ذا مستحيل يعني الرجال المنضبط بيسلم من الحجز ................. تعديل المهنه يوزعون لكم خطابات للأحوال عشان تعدلون المهنه يا حلوين طبعا اللي يبي يسافر وقت اجازة الحج لايعدل المهنه يروح يفلها وينبسط وقبل التحضير يعني التحضير يوم الجمعه هو يروح يوم الاربعاء اللي قبله الاحوال ويعدل المهنه وياخذ البرنت اللي ماراح يطلبونه منكم الا بعد 3 اسابيع من التحضير يطلعونكم يوم الاثنين منها تعدلون المهنه ومنها تاخذون راحه قبل مهمة الحج ومنها تستمتعون بالرواتب لانها نزلت لنا يوم الثلاثاء يوم 25 / 11 نزلت لنا 14266 ريال . طبعا مافيه ولا احد مانسي هم الدورة من شاف رصيده طبعا انتم اذا طلعتوا من ال45 حاول تمر عالبنك الاهلي وتعطيه رقم بطاقتك ويعطيك بطاقة الصراف عشان ماتتأخر اذا نزل الراتب تروح تدور بنك تصك سرى وتطلع البطاقه << مسكين توهق ومايبيكم تتوهقون مثله . طبعاً بحمد الله إنتهينا من إنتداب الحج وذا التقرير حقه ................ طبعاً نزلنا يوم 29 / 11 / 1431هـ مشينا مكه في باصات طبعاً ممنوع الباص يوقف في استراحات يوقف بكم وقفه في البر تصلون وتطيرون شرآب وانتم بكرآمه طبعاً بقولكم الحل قبل كل شي عندكم السواق اكراميته 100 ريال يوقف لكم لو تبون كل استراحه ماعنده مشكله طبعا يوم حضرنا يوم الجمعه يوم 28 / 11 وزعونا باصات ووزعوا علينا الشد السفري والغطا الي يجي فوق اللبس حق المطر وركبنا عفشنا في الباصات ورحنا نمنا وصحينا صلاة الفجر صلينا واخذنا الاعاشه وركبنا الباصات مشينا وصلنا مكه صلاة العصر تقريباً دخلنا المعسكر حقنا وكان معسكرنا في وادي محسر وكانت مهمتنا تنظيم المشاه فقط كل دورات الامن العام ماعندهم اي مهمه غير كذا وتم توزيع الطلاب على شوارع المشاه (( الشارع المضلل - الشارع الجديد - سوق العرب - شارع الجوهرة )) طبعاً في شوارع ثانيه نفس النظام بس هذا اللي كان في معسكرنا يعني عموماً شغل الطلبة كله تنظيم مشاه طبعاً من يوم وصلنا عندنا حصه صباحية كل يوم الين يوم 6 / 12 طبعا يجيكم اللواء سعد الخليوي يعطيكم خطبه عسكريه يشجعكم على مهمتكم ويوعدكم بمفاجئات يوم 13 اذا انتهت المهمه ومدري ايش وطبعا المفاجئات عاديه وبقولها لكم 1- اجازتكم بعد المهمه اسبوعين . 2- نوط الحج . 3- تقديم التخرج . نصحى صلاة الفجر نصلي ونلبس اللبس الرياضي وننزل الميدان اللي هو شارع قدام المعسكر نهرول معاك ظابط الخط حقك والجنود اللي رآح يستلمون معاك . طبعا بيتم توزيعكم مجموعات اول ماتوصلون يصير اذا جاء وقت استلامكم ينادون المجموعه اللي بتنزل . طبعا اول الايام بروفات كل مجموعه تنزل مدة 4 ساعات واذا خلص استلامهم يسلمون اذا جات المجموعه اللي بعدهم وكذا تعدي اول الايام طبعا اذا صادقتوا يوم جمعه قبل يوم 8 الحج ينزلونكم الحرم تنظيم حركه حجاج يتم توزيعكم على ابواب الحرم وقت مايقولون لكم قفلوا خلاص توقفون حاجز بشري تقفلون الين يقيم الصلاة وبعد الصلاة تبدون تردون اللي بيدخلون للحرم الين يطلعون اللي داخل وبعدين يفكون باب دخول وباب خروج بعد ماتهدا الزحمه وبعد الصلاة بثلث ساعه ترجعون للمعسكر طبعاً بقولكم سالفة الاستئذان ... للخروج من المعسكر نصيحة مني لاحد يفكر يستأذن ابد لأنك اذا استأذنت بتطلع وهم عندهم خبر ولازم ترجع في وقتك المحدد اللي هو ساعتين مايكفيك تطلع من منى كيف بتروح تقضي وتتمشى لو رجعت بعد كذا لعنوا خيرك لكن ضبط وضعك مع اخوياك واطلع وهم يكملونك وارجع من غير ماحد ينتبه لك ونصيحة ثانيه لاتفكر تشرد اول الايام خلك الين ينكفشون أول مجموعه شاردة ويحسون الظباط انهم خوفوكم وماراح يدققون .................. نظام السكن طبعا في خيمة تجيب لكم القرف طبعا الخيمه كبيرهـ بس اذا دخلت حاول تروح جريء الين تجلس قدام وجه المكيف لأنك لو ماجيت عند وجه المكيف بتموت من الحر ولا راح تعرف تنام نظام الشاحن للجوال شي غريب بس نصيحة هات معاك وصلة ذيك اللي يسمونها محول اللي تشبك فيها 3 شواحن وتشبكها في الكهرباء عشان مايزعجونك الناس نبي نشحن نبي نشحن اغراضك الشخصيه المحفظه والجوال ... طبعا ذي تنسرق بسهوله لأن الكثير يلتهون وينام ولا نومه ثقيل خذ معاك كمر تلاقيه في محلات الرياضه مثل حق الحجاج بس مو اللي ينربط على الوسط لا اللي يجي عالكتف على الصدر ويجي مع الجنب يعني تحت اللبس الرياضي تقدر تخبيه ذي الطريقه كنت مستخدمها والحمدلله دخلت معاي جوالي البيبي وجوالي الصغير وفلوسي وسلمت من السرقه وغيري كل يوم يبكي اللي انسرق جواله واللي فلوسه واللي رآحت ال2 طبعا حتى الشد السفري والفسفوري وغطا المطر ذي اكتبوا عليها اسمائكم وخلوا كل شي لكم موثق انه لكم طبعا نظام الدوام ايام 8 و 9 و10 و11 و12 و13 الدوام يكون 8 ساعات ب 8 ساعات تستلم 8 ساعات وتسلم 8 ساعات ويوم 9 من الفجر الين المغرب الفرقه اللي عندها استلام ماتستلم لأن مافيه حجاج بس تستلم من العشاء الين وقت التسليم وطبعا الضغط يوم 10 و11 ذي اليومين يكون عليكم ضغط ماتتخيلونه و12 بعد فيه ضغط شوي وطبعاً عملكم في التنظيم (( عدم الافتراش - ممنوع دخول العفش للجمرات - ممنوع عكس السير )) عدم الافتراش : تعرفونه يعني مايجي احد في طريق المشاه ويحط خيمته ويفترش الشارع طبعا يجي دوركم تمنعونه ولو جاء الظابط وشاف عندك افتراش الله يعينك يلعن خيرك بتقوله ماقدرت بيقولك مافيه شي اسمه ماقدرت انت عسكري يعني تقومه يعني تقومه والمشكله المفترشين مصاريه اغلبهم تجيه يقولك شوي يا دفعه يعني يدرون انك طالب ماعندك سالفه والهنود يبربر عليك بالهندي ويسوي مسكين وغيره الشيبان والعجايز يوووه حاله ثانيه لكن الظابط مايعرف شي الا انك ماتخلي احد في موقعك مفترش . عدم دخول العفش للجمرات : طبعاً هذا اكثر شي بيتعبكم لأن العالم كلها تبي الخيمه والفراش والبسطه حقتها بيطلعون روحكم عشان ذا الشي ووسط الزحمه شوف كيف التعب اللي بتلاقونه . عدم عكس السير : يعني اذا كان الشارع نزول وجاك حاج بيطلع عكس الحجاج تمنعه مرهـ . يوم 13 اللي هو اخر يوم في نهاية الانتداب تلمون عفشكم تنتظرون سعادة الخليوي اللي مايجيكم الا قبل المغرب وانتم من الفجر ماعندكم شي بس تنتظرون سعادته يجي يقولكم كلام معروف شكرن لكم وقمتوا بواجبكم والخطه نجحت والقيادة مبسوطه منكم وبعد كذا الله يستر عليكم . كلن يروح ديرته . يوم 25 / 12 أول مرتب ينزل لنا وكان 3300 وكسور بسيطة اخر شهور في دورة الأمن العام شهر 1 وماادراكم ماشهر واحد طبعاً أول شي جاتنا راتب انتداب الحج نزل لنا بعد اسبوع من بداية شهر 1 وبعدين جاتنا الأنشطة الرياضيه ياخذون طلبه للكورة والطائرة والسباقات (( سباق الضاحيه .. الوثب الطويل .. سباق ال100 و ال200 وال400 متر )) طبعا اللي يشوف نفسه بطل في وحده منها لايتأخر من اول مايسمع التسجيل يسجل على طول طبعا ماتحضر حصص العصر لانك تكون في الملعب طول فترة الدوري ماتحضر تصليبة الظهر يعني تطلع من صلاة الظهر تروح تبدل تلبس بذلة رياضيه وتطير على الميز تتغدأ من غير زحمه وقرف وتقوم تروح الملعب وماترجع الا المغرب تطلع السكن تبدل ماتنزل الا صلاة العشاء وبعد الصلاة ميز ونوم يعني بتنبسط والمفاجاهـ الاكبر السريه اللي تاخذ بطولة بتنبسط يعني اذا اخذوا طلبة الطائرة الكاس مثل مااخذوه كتيبتنا طلعوا يوم الثلاثاء الظهر تقديم على الكل وماطلعنا الا ظهر الاربعاء يعني اي مجموعه تاخذ بطولة يجيها تقديم عرفتوا وبعد الانشطة الرياضيه جانا اسبوع الرمايه 3 ايام مسدس و يومين كلاشنكوف طبعا اسبوع الرمايه لحاله ذا عقوبه لأن ميدان الرمايه كله تراب وغبار وبتكرهون نفسكم من القرف والكتمه وفوق هذا كل طالب ماياخذ ابو 10 دقايق في رمايته بس بيجلس من الفجر الين الظهر وهو ينتظر الطلبه يخلصون واذا تكلم رآح فيها ممنوع السوالف ممنوع الحركه ممنوع اي شي حتى وهذا وانت في حوش كله تراب وغبار ماحولك احد يعني لاتدقق التخررررررررج يا ناس والله عدت الايام صاروخ عاد الحين كل الأسئله والاشاعات عن التخرج كل واحد يقول والله سمعت والله قالي الظابط الفلاني والله مدري ايش بقولكم بالعربي نخلص التخصص 17 / 4 بعدها احسبوا بالميت شهر كامل بروفات بعدين يرفعون الأمر لأهل الأمر واذا قرر وزير الداخليه يجي يخرجنا بيجي وبس يعني فلوها لاتسألون عن التخرج مافي احد يدري . طبعا بدينا التخصص من يوم 12 / 1 / 1432هـ ونهاية التخصص يوم 17 / 4 / 1432 هـ ................................... طبعا الحين احنا بدينا في بداية البروفات والتحيه بالسلاح وكثير من حركات حفل التخرج والتخرج 85% في نهاية شهر 4او بداية شهر 5 والدورة القادمة شهر 6 في بدايتة او نصفه رآح تبدأ والكلام من مصادر موثوقه عندنا في مدينة التدريب . ومعلومه بسيطه / والله يا شباب ان الدورة ام الفله والوناسه لكن بدايتها بيضيق خاطرك لانك كنت في حياة مدنية ودخلت حياة عسكريه كلها تربطها احكام وقوانين وتعرف بالضبط والربط يعني انت مربوط بنظام يضبطك ولازم تمشي عليه وعن الجزاء والحجز والحوسه والله كلها ايام وتعدي النفسيه اللي بتجيك وتكدر خاطرك لاتخليها تسيطر على مخك فلها مع العرب اللي عندك وانبسط وربك بيعيدها الحين احنا خلصنا الشهر ال7 وداخلين في ال8 والله نفتكر الايام اللي رآحت مانحس انها طويلة بس نحس ان ال3 شهور الباقيه طويله مع انها الحين كل شي عندنا فله ووناسه المدربين اخلاقهم عاليه معانا واتكلم عن سريتنا الي انا فيها عشان مايخالفني احد من غير سريتي ويغلطني وبصرآحه بقولك شي المدرب يبي حصه بنشاط واذا اعجبته في الحصه يعطيك عيونه بعدها . هذا وصلى الله وبارك على نبينا محمد . لي بآكـ عند وجود أحداث جديدهـ التعديل الأخير تم بواسطة يـرِبــِشٌ ; 12-01-2011 الساعة 10:58 PM سبب آخر: بطلبه |
|
30-09-2010, 11:55 PM
|
||||
|
||||
|
عشششت على المـوضوع الله لايهيـنك .. |
|
01-10-2010, 12:24 AM
|
||||
|
||||
|
++++++++++++++++++++++++++ التعديل الأخير تم بواسطة العقيد نايف ; 08-10-2010 الساعة 03:59 PM |
|
01-10-2010, 12:27 AM
|
||||
|
||||
|
يعطيكـ الف عافيهـ ع المعلوماات ياسنيديأأأ |
|
01-10-2010, 12:40 AM
|
|||
|
|||
|
يعطيك الف الف الف عافيه موضوع جميل جدا وطريقة كلامك اروع |
|
01-10-2010, 12:55 AM
|
||||
|
||||
|
بتوفيق للجميع .... |
|
01-10-2010, 01:05 AM
|
||||
|
||||
|
|
| موضوع مغلق |
|
(( لا تنسى ذكر الله )) |
|
|
|
|
1Likes
العرض العادي
