قررت اليوم ان ابدأ في التسويق لمشروعي المليوني
الا وهو توزيع القهوة على مدارس البنات
سميت بالله الرحمن الرحيم وجهزت ترمس الشاي والقهوة
ووضعت معهم في السلة التمر والكيك لزوم كرم الضيافة
وعلقت مع كل ترمس ورقة دعاية
فيها الخدمة اللي اقدمها مع نوع الهدية اللي بعطيهم اياها اذا اشتركوا في خدمتي
ورقم الجوال واسعار الترامس بالاشتراك الشهري او الطلب اليومي
وارسلتها الصبح وما نسيت ترمس الحارس
بالكاد وافق الحارس يدخلها تقل متفجرات مهيب قهوة وشاهي
المهم اخوي اكد عليه يدخلها غرفة المعلمات
قاله فيه غرفتين ,قاله دخلها وحده منهم !!

الا واقعد احتري الجوال يرن ومغير اناظرة بين الساعة والساعة
ولا حس ولا خبر
يا الله الخيرة لا تكون قهوتي في الساحة تشتكي الشمس والوحدة
وجاني النوم ونمت
واول شئ سويته بعدما قمت هو النظر للجوال طريقي للمليون
واذا هو نايم مثلي .....حسبي الله
تعوذت بالله من الشيطان وابعدت عني التفكير السلبي
وقلت ان شاء الله انها خيرة ونشوف آخرتها
جاء الظهر ورجّع اخوي الترامس
وكانت الفاجعة اللي ماتمناها لعدو ولا حبيب
الترامس كما هي ...كما تركتيني عدت اليك !
ولا لمست ولا فتحت ولا شرب منها ولا فنجان
يمكن تقولون قهوتك مهيب اللي
لكنها بشهادة المقربين من احسن ما يكون
واستعمل فيها الزعفران والهيل الممتاز
لكنهم ما فتحوها اساسا ولا ادري وش السبب
العجيب ان الكيك ماخوذ هو ويا التمر
حتى الحارس اخذ التمر ولا شرب القهوة!!
يمكن اقول انهم عندهم قهاويهم ولا هم في حاجة قهوتي
لكن وش سر التمر والكيك
وفيه ورقة دعاية ماخوذة والثانية رجعوها بعد ما فكوها من الترمس
وهذا شئ جيد ويبعث على التفاؤل
تتوقعون ليش ما ذاقوا القهوة , ايش السر يا معلماتي الفاضلات

عطوني نصايح ...انتقاد ..رفع معنويات
أي حاجة لكن لا تحطموني تراي

السبب الأول انك ما رحتي معاهم وبدل ارسال الشاي والقهوه

لازم انك تتعبي شوي وتروحي المدارس ولا تعتمدي على اخوك

وش مدريهم ان اللي يسوي هذا الشي ولد ولا بنت ؟؟

ما أحد يوثق هالأيام

الله يوفقك ويساعدك يارب

الغلط انه مارحتي انتي بنفسك وتعرضي خدماتك عليهم واكيد بتلاقي احد ياخذ منك

اما كذا تدخليها ما اتوقع بتجذب لانه مايدرون من الي مسويها ووش فيها

لكن روحي انتي بنفسك وقت الفسحه لغرفه المعلمات وقولي لهم واشرحي وان شاء الله بتلاقين احد ياخذ منك
وذوقيهم القهوه <الحريم يحبون كل شي وكل شي عندهم يمشي ^_&

مسكوية حاولي مررررررة ثانية ولا تترددي وياحبذا تخشي بالقهوة والشاي بنفسك

والله يا اخوان اني اروح مع القهوة واعرض بضاعتي بنفسي احسن شئ
لكن هذا اللي ما ابيه ولا اقدر عليه
لو تدرون وش صعبها علي
خاصة انها اول مرة اسّوق البضاعة واعرضها
يعني قلت يمكن ان ورقة الدعاية تنفع

لكن اذا خافوا من القهوة ليش ما خافوا من الكيك
هنا السر !!

الله يعافيكم ما قصرتوا

انتي لاتقعدين تفكرين ليه خذو كيك وماخذو قهوه لا

انتي حاولي تتشجعي وتروحين وتعرضين قهوتك ويكون سعرك مهو غالي ويكون مربح لكي

السلام عليكم ورحمة الله وبركاته

أختي مسكويه مبروك بداية المشروع ... والله يوفقك
اتوقع يا اختي عدم شربهم للقهوه هو عدم ثقتهم ومعرفتهم بصانعها
والأفضل انك تسوقي للقهوه بنفسك عشان يشوفونك ويطمنو
وتذكري ان اي بدايه صعبه

وبالتوفيق

بالتوووووووووووووووووفيق

مساء الخير اختي من خبرتي بقولك ملاحظاتي ان شاء الله تفيدك
اولا مثل ما قالوا الاخوان والاخوات ما سوقتي اولا قبل ارسال القهوة اذا ما تقدرين بنفسك على الاقل اعلان مكتوب توضحين فيه مميزات القهوة والسعر اللي لازم يكون معقول لان المعلمات الان مع كثر من يقدم هالخدمات يقارنون السعر والجودة في مدارس البنات المراسلة والعاملة يسوون للمعلمات قهوتهم بسعر بسيط
شوفي اكثر من مدرسة لاتعتمدين على عدد قليل
ثانيا / ليه خذو الكيك والتمر لانهم عندهم قهوتهم وما احتاجو لقهوة غريبة لكن التمر والكيك يمي يمي ويمكن العاملة هي اللي خذتهم
ثالثا / انا اشوف تركزي على القهوة لان الشاي امره سهل متوفر
[align=left][align=center]اسفة على الاطالة الله يوفقك[/align][/align]

شوفي يا قلبي اذا تعرفي انت مدرسات اعرضي عليهم وخليهم هما يعرضوا على المدرسات في المدرسة وصدقيني على طول ياخدوا من عندك لان المدرسات بمجرد وحدة تمدح شيء الكل يحب يجربه
بعدين يمكن المدرسة الي انت رحتي لها المدرسات متفقين مع الخالة او مع احد ثاني انه يسوي القهوة
ربي يوفقك يارب