الي عنده أي إستفسار عن مستشفى الحرس الوطني

الزيزفوني · #**301** (**permalink**) 02-05-2011, 11:31 AM

اقتباس:

المشاركة الأصلية كتبت بواسطة متفاءلة

طلب مشورة من الاخ الزيزفوني:
انا اختبرت اختبار الحرس مرتين وكلهم عديتهم الحمدلله
الاول كان قبل سنتين وبما ان مدته انتهت اضطريت اختبر للمره الثانية بس للاسف درجتي اقل من الاول بكثير
فسؤالي هل اعيد اختباري لتحسين الدرجة ..لأن اللي فهمت من كلامك ان الترشيح يعتمد ايضا على درجة الانجلش
او الغي الفكرة ...!! وهل الاعادة تعتبر اخر فرصة لي في الاختبار بما انه للمره الثالثة؟؟
وشكرا جزيلا

أعتذر عن التأخير للجميع لظروف عمليه .

أنا حسب علمي أعادة الاختبار ليست أختيار شخصي كما في السابق بل يتم تحديده من قبل مكتب التوظيف في الفتره الاخيره .

أذا لك فرصه تعيدي الاختبار انا انصحك تعيدي وتستعدي له من الممكن تكون فرصك اكبر

الزيزفوني · #**302** (**permalink**) 02-05-2011, 11:33 AM

اقتباس:

المشاركة الأصلية كتبت بواسطة شمعه مضيئه

السلام عليكم ورحمة الله وبركاته

سؤال للأخ الزيزفوني
أنا مقدمه على وظيفة أخصائية إجتماعية
وإختباري اللي من100 درجه بعد أسبوع
وحبيت أستفسر عن المقابله الشخصيه لهذه الوظيفه هل تكون بالعربي أو بالإنقلش؟؟
وأسئلة المقابلة هل تكون أشياء عامه مثل ماذكروا بقية الأعضاء أو عن التخصص؟؟

أتمنى إفادتي جـزاك الله خيراً..

أعتقد انك سويتي المقابله خلاص..وأتمنى تكون عدت على خير..ولكن للفائده المقابله تكون بالاثنين بالعربي والانقلش وهي ترجع لمدير القسم الي تم ترشيحك له

الزيزفوني · #**303** (**permalink**) 02-05-2011, 11:35 AM

اقتباس:

المشاركة الأصلية كتبت بواسطة احلام متواضعة

اولا الله يجزاك خير على حرصك على مساعدة الغير

انا قدمت عن طريق الموقع قبل تقريبا اسبوعين
وبعدها بكم يوم ارسلولي رسالة على الجوال اني اروح اقدم واخذ اوراقي كاملة وسي في بالانجليزي
ورح يسوون لي اختبار لغة

سؤالي انا تخصصي علوم اغذية وتغذية من كلية الزراعة وتصنيفي من الهيئة اخصائية خدمات غذاء وتغذية
هل فيه وظايف تناسب تخصصي ؟؟
بصراحة الكل جالس يحطمني ويقولي اذا مستشفيات وزارة الصحة ماقبلوني الحرس مستحيل يقبلني
لان تخصص التغذية العلاجية متفوق علينا وهو المطلوب بالمستشفيات
يعني تخصصي مو معترف فيه
بس لما قدمت بالحرس كان فيه ثلاث خيارات للتغذية
واحد منها Food and Nutrition يعني تخصصي بس ماعرف وش هي شروطهم ؟؟

غير اللغة الي معجزينا فيها
وانا اقرا الردود لقيت وحدة تخصصها انجليزي وتقديرها عالي
وجابت في اختبارهم 84!!!!!
اجل انا الي اخر مرة درست انجليزي وانا بالثانوي كم بجيب؟؟؟
انا اختبرت اختبار لغة بقوى الامن والحمد لله كان سهل وعديته والي نقصني هي المصطلحات الطبية
ماعرف اختبار الحرس نفس المستوى ولا اصعب؟؟؟

اسفه على الاطالة

أنتي مالك شغل في غيرك أنتي تفعلي الاسباب والرزق من الله والتخصص أكيد مادام صحي فلكي فرصه بالحرس.

بالنسبه للاختبار ..خريجي الانقلش الدرجه الادني لهم هي 80 لذلك الموضوع مختلف عن باقي التخصصات الي درجة الانقلش المحدده لخريجي الجامعات ب 65 .

ماعندي فكره عن اختبار قوى الامن لكن حسب علمي اختبار الحرس هو الاقوى من بين المستشفيات ويأتي بعده فيصل .

الزيزفوني · #**304** (**permalink**) 02-05-2011, 11:38 AM

اقتباس:

المشاركة الأصلية كتبت بواسطة مملوحة الوصايف

السلآم

لو سمحت حبيت أستفسر عن صحة عآمة متى يبدأ التسجيل للوظآئف .... أنآ إختبرت إختبآر الهيئه والحمد لله عديته

بس أبي أقدم في المستشفى ... والله يحقق أمآنيك

مآقصرت أبدعت في الموضوع عسآك ع القوة

التسجيل مفتوح طول السنه

الزيزفوني · #**305** (**permalink**) 02-05-2011, 11:41 AM

اقتباس:

المشاركة الأصلية كتبت بواسطة أخصائية إجتماعيه

مسااائو
الله يعطيك الف عافية ويجعلها موازين حسناتك يارب على مبادراتك.........

انا حابه اسال انا سمعت انو فيه بمستشفى برنامج التدريب وبعدهها التوظيف مباشره مدري عن مصداقية هالمعلومة
اذا المعلومه هذ صحيحه هل الكل يقدر يقدم اولا لتخصصات معينه
انا معي بكالوريس وحابه اتدرب عندهم بتخصصي اكون اخصائية اجتماعيه اقدر اولا
وكيف طريقة التقديم على التدريب وكم مدته .............
شاكره لك............

ماقد سمعت عن هالبرنامج..فيه برنامج تدريبي للتخصصات الطبيه في بنك الدم وغيره ولمدة 8 شهور ولكن المستشفى غير ملزم بتوظيفهم ولكن غالبا يتم توظيفهم .

في بنات كثير أشوف الفتره الاخيره يجون يتدربون في الحرس ولكن حسب ماوردني هم منتدبات من جامعاتهم وعلى وشك التخرج وليسو خريجين ..أن كان الموضوع يهمك ممكن أسئلك.

الزيزفوني · #**306** (**permalink**) 02-05-2011, 11:45 AM

اقتباس:

المشاركة الأصلية كتبت بواسطة لطوووفه

مرحبا أخوي الزيزفوني
مستشفى الحرس له فرع في ديراب ؟
ومثلا إذا ترشحت في ديراب أقدر أرفض هالترشيح ؟ وأطلب تكون الوظيفة >>بمستشفى
الحرس اللي عند خشم العان وإلا
إذا رفضت يشيلون الابليكشين حقي ومايحق لي الترشيح مرة ثانية؟
لأني سويت المقابلة المبدئيه مع الموظفة وقالت بتوافقين لو رشحناك ديراب قلت ايه ماعندي
مشكله << وبالواقع ديراب بعيدة عنا
مشكوووور وجزاك الله

ايه له فرع في ديراب مستوصف وله في ام الحمام..تقدري ترفضي بس الوظيفه المرشحه لها ماتتحول لمستشفى الحرس..الي راح يصير انهم ينتظرو يتوفر شي مناسب لي في المدينه الطبيه ,ولا يشيلو طلبك يضل كما هو مع التوضيح انك ترغبي بالمدينه الطبية .

الزيزفوني · #**307** (**permalink**) 02-05-2011, 11:47 AM

اقتباس:

المشاركة الأصلية كتبت بواسطة متقاعد صغنون

بسالك اخوي ؛؛؛؛؛؛ انا اخوي قدم على مستشفى الحرس الوطني قبل اكثر من سنه وشهادة ثانوي واختبر عندهم وعلى قولته انهم قالو انك نجحت بالاختبار على الحافه المهم ياطويل العمر دقو عليه قبل يومين وقالو له الوظائف المتاحه وهي عامل ؛؛ مراقف مريض××× وعامل بالمستودع ×× ومراسل(

وراح لهم امس قال له الموظف انت قلت اوك تبي الوظيفه بس باقي لك المقابله النهائيه هل هو الحين يعني قبل بالوظيفه او باقي وثاني شي كم وراتب الوظائف التاليه على قولته المستوى الثالث وسلامتك

أن شاء الله ان اموره تمام...الرواتب راح تتراوح مابين 3000 حتى 5000.

الورده الحالمه · #**308** (**permalink**) 02-05-2011, 11:54 PM

اخوي زيزفون كل ماكتب يطيرمادري وش الهرجه
المهم ابي اسالك >>> تحملها

مستشفى الحرس بالدمام كيف التوظيف فيه ؟ يفتحون ملفاتنا والا ناس وناس والا واسطات
المهم انا قدمت ع الموقع في اخر اعلان نزل بالجريده يمكن بشهر 11 وقعدت شهر انتظر محد دق علي دقيت عليهم واسال وش صار على اعلانكم قدمت محد دق علي متى الاختبار>>مستعجله
قالت اي اعلان ؟!! قلتلها الاعلان حقكم ماتدرون عن الاعلاناتها اللي تنزل
قالت يمكن برياض معليش ماعندنا خبر
قلتلها الزبده تخصصي دبلوم سكرتاريه طبيه ونسخ طبي وابي اتوظف متى تختبروني >>تكتب قصتها
قالت تغير نظامنا حاليا اذا نزلت وظائف ندق عليكم تجون تختبرون هاتي رقم طلبك ودقي اسالي عن الوظائف الشاغره المهم انتظر محد طق لي خبر وش يبون فيني اكيد الفلبينيات احسن مني عيون مسحبه وخشم افطس
رجعت كلمتهم قالت انتي فلانه ياسلام تتذكرني قلتلها اي وش صار قالت باقي مافي وظائف اذا بتنزل بدق عليك ان شاءلله .
دقت علي صديقتي الاسبوع اللي راح وقالت اختباري السبت
قلتلها متى نزلت وظائف قالت مدري
قلت الله يوفقك يارب ورجعت ادق عليهم نزلت وظائف عندكم اداريه شاغره؟؟
قالت ارسلي السي في حقك ع الايميل ذا طيب وموقعكم اللي رازينه ؟؟ >> يستهبلون علينا قلتلها طيب ورسلته قالت حاليا مافي وظائف اذا بتنزل بكلمك

اخوي وين المصداقيه بهالمستشفى نفسي اعرف؟ والوظائف ليه محد يدري عنها؟؟
وبسالك عن صديقتي >>كثرت اسئله
المهم صديقتي اختبرت وربي دعيتلها ربي يسهل عليها
بس الاختبار موب سهل تقول المهم جابت 48 وهي نفس تخصصي دبلوم سكرتاريه ونسخ
قالتلها ماعديتي وحددتلها اختبار بعد 3 اشهر
طيب موب تقولون ان الدبلوم اقل شئ 45 كيف ماعدت اتمنى توضحلي ؟؟

لطوووفه · #**309** (**permalink**) 03-05-2011, 01:40 PM

الله يجزاك خير يالزيزفوني ويرزقك من حيث لاتحتسب
على ردك والله يجعلها بميزان حسناتك

Excellent · #**310** (**permalink**) 03-05-2011, 06:08 PM

الله يجزاك خير عن التوبيك الرائع هذا
بسألك هل فيه مجال للتدريب عندكم قسم التغذية ( تغذيه عامة ) ، و كيف الاجراءات ؟ و الرسوم ؟ و كل شئ ..شكرا لك

الي عنده أي إستفسار عن مستشفى الحرس الوطني

إستفسارات ونتائج الوظائف المدنية

بسم الله الرحمن الرحيم أخوتي الكرام من باب حفظ حق من ساعدني في هذا الموقع أرغب في عرض مساعدتي على الأخوه الي يرغبون في العمل في مدينة الملك عبدالعزيز...

الي عنده أي إستفسار عن مستشفى الحرس الوطني

تسجيل الدخول

الي عنده أي إستفسار عن مستشفى الحرس الوطني

إستفسارات ونتائج الوظائف المدنية

بسم الله الرحمن الرحيم أخوتي الكرام من باب حفظ حق من ساعدني في هذا الموقع أرغب في عرض مساعدتي على الأخوه الي يرغبون في العمل في مدينة الملك عبدالعزيز...

الي عنده أي إستفسار عن مستشفى الحرس الوطني