المشاركة الأصلية كتبت بواسطة يآرب اتوظف

السلام عليكم ورحمة الله وبركاته
وعليكم السلام ورحمة الله وبركاته
بقولكم قصتي دايركت وانتم احكموا بالنهايه

هذآ ياطويلين العمر مره من المرارير قمت الصبح بدري حوالي الساعه 6ونص وسويت لي كوب نسكافيه وقعدت امخمخ على التليفون ادق دق على المدارس الخاصه >>يوميآ على ذا الحاله

المهم دقيت على كذا مدرسه اللي خطها مشغول واللي مايرد >>هذي على طول ماسكه معي سبحان الله

واللي واللي .... الى مالا نهايه

مسكت خط وانا اتصل عليهم الى ان منّ الله علي بفضله وردت علي المدرسه كلمتني وحده

بقولكم اللي صار بالمحادثه بيني وبينها بالتفصيل بدون زياده او نقصان :

يآرب اتوظف : الو

الموظفه : هلا

يآرب اتوظف : السلام عليكم

الموظفه : وعليكم السلام

يآرب اتوظف : اقول انا متخرجه من قسم لغه عربيه وحبيت اسألكم اذا فيه احتياج عندكم ولا لا ؟

الموظفه : ايه يااستاذه الاداره طالبه معلمات نفس قسمك وعندنا نقص معلمتين عربي >>انا هنا طقتني البوهه وفهّيييت على طول قعدت احلم باحلام اليقظه

ماانتبهت الا وهي تقول الوووو قلت لها ايوا طيب طيب يعني اجي ولا كيف ؟>>ابو السؤال اللي مدري وش يبي بالحياه >>اعذروني مو مستوعبه انها تتوظف بعد اربع سنين عطآاله


قالت ايوا تعالي بكره للمقابله الشخصيه واعتبري نفستس موظفه عندنا ومن يوم السبت تباشرين

انا هنا قفلت السماعه ماقلت لها شكرآ ولا مع السلامه ورحت طيران ابشّر امي وابوي

المهم قعدت اتجهز للمقابله بكره ماخليت شي ماسويته حتى عبايتي وديتها للكّواي >>علشان مايلقون عذر لااستبعادي يقولون عبايتها مقرفطه >>عاد هم معروفين مايحتاج اقولكم

حلوه مقرفطه

جاء بكره وعلى طول لبست وتكشخت وهب طب ليني عندهم

دخلت على المديره وسلمت عليها قلت انا فلانه اللي كلمتكم امس وتخصصي لغه عربيه وقلتولي انه بوه احتياج وكذا ........الخ >>يعني قلت لهم الحوار اللي دار بينا على التليفون

وانا فاكه الخشه وقاعده اوزّع ابتسامات ومبسوطه محد قدي , الا وتلمخني بقولها ,لا من يقول ؟؟

حنا ماقلنا لتس تعالي ولا قلنا بوه احتياج اصلآ تخصص لغه عربيه مو مطلوب كثير>>اووم وابووو وطوايف واهل التحطيم كلهم

عاد الابتسامه ذبلت وصار الفم تقل قوس مقلوب قلت لها طيب واللي كلمتني وقالت لي تعالي , ردت علي لا يابنتي ماعندنا والله يرزقتس و صوت المديره نفس الصوت اللي كلمته بالتليفون

عاد انا هنا تسكرت الدنيا بوجهي ولاعاد عرفت وش اقول ووش ارد عليها غير كلمة حسبي الله ونعم الوكيل كمختها على وجهها فيها وطلعت اجرّ اذيال الخيبه وراي والملف الاخضر قدّامي

وركبت السياره ورب الكعبه ابوي يسألن وش صار ووش سويت ماقدرت اكلمه خانقتن العبره

بس جاوبته بنفس اليوم المغرب >>بعد ماهدت نفسيتي


وبس وما خفي كان اعظم


ابي رايكم باللي صار وبرضو ابي دعواتكم




حجابي نسيت اشكرتس ياقلبي على موضوعتس وربي يرزق اخوتس الوظيفه اللي يتمناها واللي بها خير له ويرزقن ويرزق كل العواطليه