[align=center]
نوبلس عملية الزائدة
هل تسقط والا لا
لأن العملية صار لها
حوالى 5 او 6 سنوات
[/align]

الله يوفقكم كلكم ياشباب وتتوظفون جميعاً

ونوبليس انشاء الله تترقى وتصير عقيد وتتوسط لنا < شكلهم بيطولون يالطيب



الله يعين

بسم الله الرحمن الرحيم
السلام عليكم ورحمة الله وبركاته
وش حالكم ياشباب عساكم طيبين.....ابي أسألكم أنا مقدم على القاعده الجويه بالشرقيه قبلت قبول مبدئي وعطوني موعد للمستشفي بتاريخ 5 /2/1432 هـ هل الكشف الطبي يركز على الاسنان؟

مرحبا
انا عندي استفسار بسيط
اللحين كم راتب الجندي امن وحمايه مع البدل كامل
والدوره كم يعطونا
وبا التوفيق للجميع

[align=center]
بندر سكرتير أسئلته جداً مهمة

أتفق معه في جزئية ان ميزة الجوية التعيين بنفس المكان اللي مقدم عليه

وأختلف معه ان الدوام مهوب يوم وتسلم يومين << لأن الدوام يختلف حسب السرية

حتى السرية الوحدة ممكن يكون فيها أكثر من دوام حسب موقع الحراسة وحسب عدد الأفراد

وكل ماكان العدد كبير كل ماكان في مصلحة الفرد


جيت على طاري الشركات وأقول ان الشركات شبه الحكومية واللي تحديدا نسبة الدولة فيها أكثر من 55%

والشركات الكبيرة .. هذه ماعليها خلاف وفيها ميزات مهيب عند الوظائف العسكرية والحكومية بصفة عامة

أما الشركات الصغيرة والمتوسطة فغالباً ما تهتم بجانب وتفرط بجوانب << ونصيحة اللي حاب يتوظف فيها

ياخذها بشكل مؤقت ولا يعتمد عليها ويدور عن الأفضل ولا يتركها الا بعد ما يضمن الوظيفة الثانية ويحطها بجيبه


أستغرب من اللي ما يشوف الا العسكرية ولا يبي الا العسكرية ويموت بشي اسمه عسكرية

الحمد لله الوظائف مهيب كلها عسكرية ولا الدنيا بتوقف عند العسكرية

الواحد يجرب حظه فيها ومهوب عيب يجرب مرة ومرتين وثلاث << وليه أقول أكثر من مرة

لأني مؤمن بشغلة ان الواحد اذا حب شي بيبدع فيه ويستمر فيه ويعطيه أفضل ماعنده

ويشوف في هالعمل الاستقرار والراحة والأمان

حتى لو كانت البيئة اللي يشتغل فيها بالنسبة لغيره تعتبر جهنم أو في أحسن حالاتها غير صحية وغير مناسبة للعمل

أرجع وأقول الواحد يجرب حظه في التقديمات العسكرية اما يقبل ويكون خير وبركة

أو يشوف مجال ثاني بعيد عن العسكرية فالواحد مايدري وش اللي كاتبله ووين الخيرة له

يمكن بشركة ويمكن بوظيفة حكومية ويمكن بتجارة ويمكن الله يقفل الطرق بوجهه عشان يكمل دراسته

وصح يتعب بالبداية لكن يرتاح بالنهاية

والقصص في هذا كثيرة ولو فتش الواحد في محيطه بيلقى نماذج عانت وكافحت في البداية ولكن حققت أحلامها بالنهاية

أما أنا راح أقول قصة واحد دخل التجارة << يبي يصير بزنس مان وكان عمره وقتها 31لكنه خسر كل فلوسه ومانجح

ويوم صار عمره 32 يعني بعد سنتين قرر يرشح نفسه بالانتخابات ومانجح << الا يبي يصير مهم خخخخ

في سن 34 قرر يرجع للتجارة << يعني باقي ماتاب وهالمرة فشل وخسر كل فلوسه

في سن 35 ماتت زوجته << ياحرام وفقد الأمل بالحياة << يعنني متأثر

وفي سن 36 جاه انهيار عصبي << مثل انهيار البورصة السعودية في 2006 هع << صار ينتف بشعره مثل بعض ناس << اللهم لا تبلانا

يوم صار عمره 43 رشح نفسه لانتخابات الكونجرس وفشل ثم بعد ثلاث سنوات يوم صار عمره 46 رشح نفسه وفشل

ثم يوم صار عمره 48 رشح نفسه وفشل << وش ذا الحقنة

ويوم صار عمره 55 قال خلني أغير ورشح نفسه لمجلس الشيوخ لكنهم شاتوه مانجح

ويوم صار عمره 56 رشح نفسه نائب للرئيس << اااه ياقو قلبه << طلال سلامة داخل عرض

ويوم صار عمره 58 << مدري احسكم مليتوا كل شوي يوم صار يوم صار خخخخ

المهم رشح نفسه لمجلس الشيوخ وهم بعد ماعطوه وجه خسر فيها

وبعمر الـ 60 رشح نفسه للرئاسة وانتخبوه رئيس للولايات المتحدة الامريكية << يعني ضبطت معاه على آخر عمره

من طلع ؟ طلع ابراهام لينكولن << المعروف باسم محرر العبيد

العلم ان الواحد اذا عنده هدف وسعى له بيحصل نتيجته عاجلا أم آجلا والشي الثاني مايفقد الأمل

ويجرب أكثر من طريق وأكثر من مجال الى مايشوف وش الله كاتبله خاصة وان العمر باقي صغير


أدري اني ما انتهيت وللحديث بقية

[/align]

[align=center]
قلت ان الواحد ماييكون بباله شي ثم يحط رجل على رجل وإما تجيني هالشغلة ولا منيب متوظف

هذا أقوله تعال أبيك بكلمة راس ورى الباصات << صدق يبي من يفقع وجهه

بيقعد عالة على أهله وعالة على مجتمعه جيبولي وأبي وأعطوني واشترولي << والله يعينه على نفسه


حتى لا نخرج كثير عن موضوعنا أقول

العسكرية وظيفة حكومية يعني أمان واستقرار وظيفي ويسلم الواحد فيها من الفصل التعسفي مثل بعض الشركات

ويسلم فيها من الأجنبي اللي يستقعد له لأجل انه خايف يحل محله

وتضمن ان يوم 25 وراتبك نازل كامل بدون خصميات اللي كل شهر بحجة وكذبة جديدة

وبدون مماطلة وتأخير وملعنة والدين


عيب العسكرية أو الظلم والاجحاف أو اقتضاء المصلحة أو الأوامر التعسفية << يعني حسب ما يسميها البعض وغيرها من المسميات

واللي تعكس مدى التضرر من بعض الأوامر أو البنود أو النظام بشكل عام من عدمه

يتركز حول أشياء نتمنى ان يصير فيها تعديل وبعضها الى تغيير وبعضها يحتاج الى اضافة في نص النظام

والمطلع على نظام الخدمة أو اللائحة التنفيذية أو نظام التقاعد

يجد انه موجه لرئاسة الحرس الوطني ولوزارة الداخلية ولوزارة الدفاع والطيران وللاستخبارات العامة وفروعها

لكن بعض البنود مذيلة بكلمة .. ولكل جهة تطبيقه أو تفسيره بما يتماشى مع ادارتها << للأمانة منيب حافظ النص

المهم انك اذا جيت لأرض الوقع والتطبيق للبنود

تلقى تفاوت بين إدارة وإدارة وبين وزارة ووزارة وبين قطاع وقطاع بمعنى ان أشياء تحسب هنا ما تحسب هنا

وأشياء موجودة هنا مهيب موجودة هنا

وشخصيا مدري وش الأبعاد لمثل هذا لكن ان جيت للظاهر تلقاها ما تصب في مصلحة الفرد المتضرر

الشي الثاني والعجيب ان الأمور اللي فيها مصلحة الفرد تختلف آلية التطبيق من ادارة لإدارة

والشي اللي في غير مصلحتك يالفرد تلقى الجميع متفق عليه

وعشان كذا تلقى أكثر العسكر صاكته النفسية بسبب هالأمور وغيرها من الأشياء اللي يتمتع فيها الضباط

وما يتمتع بها الأفراد وعلى سبيل المثال المؤهل الأدنى

الحين بالنسبة للأفراد كل رتبة حتى تترقى لها لابد يكون عندك مؤهلها التعليمي الأدنى

وأعلى مؤهل علمي للأفراد في النظام واللي وضع من بداية الحكم السعودي هو الثانويةوعليه تحسب مكافأة 300

طيب الآن الناس تطورت وصار فيه شي اسمه دبلوم وبكالوريوس وماجستير ودكتوراة

وللأسف ان جات تعديلات على المؤهل العلمي لكنها لا ترتقي لمستوى التطلعات واللي يتمناها الأفراد

بالمختصر نتمنى بعض الشغلات أسوة بالضباط مثل مكافأة على الشهادة الجامعية وغيرها

وبعض الشغلات ماتخدم لا الافراد ولا الضباط مثل المستشفيات العسكرية بصراحة أصبحت كابوس

هي والمستشفيات الحكومية تروح الصبح ولا تطلع من عندهم الا قرب العصر لا هذا وانت جاي على موعد

وهذا الموعد انت ماخذه قبل كم شهر

ونتمنى مثل الحرس الملكي تأمين طبي في المستشفيات الخاصة


الكلام كثير ويطول وكل ما تعمقنا فيه تتشابك الخيوط ولا توفيه لا بصفحة ولا حتى بكتاب

لكن على ماقالوا كل عقدة ولها حلال

والواحد مع الممارسة والاحتكاك مع الخلق يعرف ويتعلم كيف يخارج نفسه في أمور كثيرة

حتى في ممارسات بعض الضباط واللي نطالب بوضع حد وقوانين لصلاحيتهم


والله مدري أفدتك ولا شوشت عليك مثل منت شايف الموضوع كبير ومتشعب

اذا في سؤال معين ممكن أجاوب عليه أما كذا أحس اني راح أدخلك بمتاهات

ومابي بنفس الوقت أخوفكم

الحمد لله الأمور ماشية وكلن ماخذ حقه ووظايفنا كل من يتمناها

[/align]

نوبليس مشكور على هالمقدمة الرائعة الي استفدت كثير منها والاخون بعد استفدو منها لان هالمعلومات مالقينها الا عندك . لكن لحضت يالعم نوبليس تسرب بعض الشباب من القطاعات العسكرية 4 في الحارة اعرفهم فصلو من العسكرية مع ان رواتبهم سبعة الف وشوية ورتبة جنود سؤالي يانوبليس وش هيء برايك اسباب تسراب الشباب من الدورة وحتى بعد التعيين البعض يقول بسب تسلط الظباط وناس عسكر اخويك اتمنى تفيدنا