23-09-2007, 07:45 AM
|
 |
عضو مهم جداً
|
|
تاريخ التسجيل: Dec 2006
المشاركات: 512
معدل تقييم المستوى: 1714
|
|
والله محتاجه رأيكم ساعدوني
اخواني بداية مبارك عليكم الشهر واليوم الوطني
ثانياً راح ادخل عى طول بالموضوع
قدر الله واشتغلت في مدرسة خاصه وتركت مدرستي الاولية فقط لان الراتب أحسن وكمان طمع في شهادة الخبرة لان المدرسة الأولى الراتب 1200 وشهادة الخبرة 7 أشهر ماتكمل السنة .
مميزات المدرسة الجديدة كرف متواصل راتب 1500 ووظيفتي ادارية يعني مافي شهادة خبرة طبعاً لما سجلت عندهم قالولي الراتب 1800 ريال وان شاالله اذا توفر لدينا وظيفة معلمة تمسكي تدريس بس نحنا حالياً محتاجين ادارية قلت طيب وهذا نصيبي
المشكلة الحين انا رضيت بقدر الله ورضيت بالوظيفة
بس من اول يوم احس المساعدة مو طايقتني وتسوي فيني انواع التطفيش تعاملني كأني مستخدمه روحي ودي خذي هاتي ياناس التلفون جنبها اذا تبغى شي من البواب تكلمني عشان كلمه مو لانها ماتقدر تكلمه بس زياده في الضغط عليا وانا عندي من شغلي اللي مكفيني بالاضافه الى الاسلوب اللي تكلمني فيه والصريخ بوجهي وبعض الاحيان ترمي شغلها عليا والله والله لو تبغى شي من العاملة ماتكلمها تكلمني عشان اكلم العاملة تجيبه لها وانا بالدور الأول وهي بالدور الثاني تخيلوا تناديني عشان انادي المستخدمه .
وانا طول يومي جالسه اتابع عميمتي المساعدة ايش تأمرني فيه واتابع شغلي والله العظيم ماالقى وقت حتى أصلي من كثر الشغل واذا ماسويته تنزل فيني كلام ماله داعي 
ومرا من كثر الضغط عليا والاسلوب التطفيشي رحت للمديرة وطبعاً مارحت للمدير ةإلا بعد مافاض فيني واختنا بالله المساعده اعطتني الكلام اللي مو كويس وتقولي انتي مو عارفه شغلك وانتي مو فاهمه شي وبعد مارحت للمديرة قتلها فهميني ايش المهام الموكل عليا عملها حتى اعملها بإتقان وعلى طول المديرة جزاها الله خير سوت اجتماع وقسمت الشغل بين كل الاداريات وعلمت كل وحده وشغلها ومشينا على هذا النظام يومين وجات الموجهة وشافت شغلي وعلمتني اهم المهمات اللي لازم اسويها يوميا من بداية الدوام.
واليوم السبت المديرة غايبه وحلت محلها المساعدة وكأنها تقول في نفسها اليوم ياانا ياانتي
من اول الدوام وهيا طايحه فيني روحي ودي جيبي لاتسوي كذا وهذا لي كذا وهذا كذا وحتى شغلي اتدخلت فيه اصلاً جالسة فوق راسي وبس انتقادات وكأنها تقول راح اطفشك يعني اطفشك الين من نفسك تكرهي هذا العمل .والله احس ان ثقتي بنفسي نقصت من كثر الاحباط ومن كثر هذا ليه وهذا مو كذا وانا عارفه شغلي من يوم بدأ الدوام والمديرة عمرها ماقالتلي غلط بالعكس المديرة تثني على شغلي لكن هاذي الله يحاسبها والله اني ماابغى ادعي عليها لكن مابيدي الا اقول إلا حسبنا الله ونعم الوكيل وترى حتى هيا جديدة مثلي بس جديدة بالمدرسة لكن خبرة في الادارة ونص الشغل اللي تعطيني هوا أغلاط ولكن احس علاقتها بالمديرة (المالكة) جداً كويسه وانا الحين افكر اترك المدرسة لاني بهذا الاسلوب متأكده مايخلص الترم إلا وانا مريضة من كثر الألم النفسي اللي جاني واقول "عسى ان تكرهوا شيئاً وهو خيراً لكم" يمكن الخير لي اني اتركها لان اكيد ماراح استمر السنة كلها بهذا الأسلوب وبهاذي الطريقة تخيلوا اليوم كله اكرف ولا حتى راحه خمس دقايق تجي المساعدة تقولي انتي مرا ماتشتغلي اجل لو اشتغل كيف راح يكون ...
والله تعبانه من الظلم الواقع عليا علموني ايش الحل .... يمكن عندكم لي حلول احسن يمكن احد عنده فكرة او طريقة أحسن وماجات على بالي ........ يمكن شخص مر هاذي التجربة يفيدني وترى هذا قليل من كثير والله العالم كيف يمر يومي مع هاذي المساعدة
انتظر ردودكم
|
العرض الشجري
