05-12-2010, 10:15 AM
|
 |
عضو سوبر
|
|
تاريخ التسجيل: Jul 2008
المشاركات: 399
معدل تقييم المستوى: 8668
|
|
بسم الله الرحمن الرحيم
صباحكم خير يأهل الخير
خلونا نبدأ من الصباح
جيت لهم الساعة السابعة والنصف ودخلنا مبنى الهئية الموجود في طريق الملك فهد امام برج الاميره العنود اول ما تدخل فيه عسكري على يدك اليمين معه الاسماء يطلب منك البطاقة ويدور اسمك ويقولك تأكد
من اسمك ورقم البطاقة ووقع جنب اسمك واحفظ رقم التسلسلي وبعدها انتظرنا لقرابة الخمس دقائق وطلعنا إلى الدور الثاني جلسنا اشوي الا فيه اثنين ينادون بالاسماء ويوم تجي عنده يطلب البطاقة الشخصية وصورتين منها طبعا هو يكون عنده الابلكيشن الي عبيته على الموقع وبعدين يطلب منك وثيقة التخرج وصورتين منها سواء كانت مصدقه ام لا ماتفرق منها المهم يكون عندك صور لكل اوراقك وبعدها يشوف انت كاتب دورات وخبرات في الابلكيشن ويطلب منك الاصول وصور منها بعدين يسألك هل انت موظف حكومي او على وظيفه بند او مستخدم أنا طبعا لا والظاهر الي موظفين على هذه الاشياء الظاهر يطلب منهم تعريف لها وبعدين يقول لك اربع صور شخصية ملونه ويعطيك ورقة الرغبات التعيين ويقول اختر لك منها منطقتين وحدد المحافظات الي فيها حسب الاولوية طبعا لك بس منطقتين تضع بجانب كل منطقة 1 و 2
وبعدها تروح ل 1 ويكون فيها محافظات وانت رقم المحافظات على حسب الاولوية
مثال منطقة عسير تحط على اليمين 1 ويكون بجنب منطقة عسير محافظات كثيرة مثل ابها خميس مشيط رجال المع النماص سراة عبيده وانت تحط فوقها ارقام حسب رغبتك في الاولوية مثلا تحط فوق خميس مشيط 1 وفوق النماص 2 وابها 3 وهكذا حتى تنتهي منها وتكمل المنطقة الثانية بنفس الاسلوب وبعدها تكتب اسمك ورقم جوالك تحت وتوقع وتعطي الموظف ويقول لك تعال الساعة 4 العصر وكذا خلصنا من سالفة الصباح فرز الاوراق.
نجي الحين للجد الساعة الرابعة عصرا دخلنا مبنى الهئية وطلعنا نفس المكان الي في الدور الثاني وبدأ ينادي بالاسماء وانا ما طولت ربع ساعة الاوينادي باسمي عاد جاني خوف غير طبيعي لكن قرأت سورة الشرح ودعيت ان الله يوفقني وطلعت الدور الثالث مدري كم رقم اللجنة بس يوم دخلت قابلني ثلاثة رجال شخصيات ومحترمين جدا قاموا الثالثة كلهم يسلمون علي سلمت عليهم وطلب مني احدهم الجلوس وجلست وقلت بسم الله
وبدأت الاسئله مررره جدا سهلة بس انا جبت فيها العيد الله يستر
س1 ماذا تعرف عن هئية التحقيق ؟
جاوبت هي سلطه قضائية تحت المحاكم انشئت بالمرسوم الملكي (م/56) بتاريخ 24/10/1409 هـ ********> مدري هالكلام صحيح والا لا انا اخذته من هنا من هذا الموضوع وعلى ذمة الي كتبه
س2 ماهو تخصص هئية التحقيق ؟
اجابتي كانت تخصصها التحقيق في الجرائم
وطلب تمييز الاحكام
وهي تكون بمثابة المدعي العام امام المحاكم
وتفتيشيش السجون ودور التوقيف
وذكرت له انها جنائية قاطعني وقال لي ماذا تعني بالقضايا الجنائية قلت له يعني تحقق في قضايا العرض والشرف
والاعتداء على الاموال والاعتداء على النفس وقضايا المخدرات
سألني نفس المقابل السؤال الثالث وقال لي ماهو مهام كاتب الضبط ؟
قلت له انها تدوين اقوال التحقيق واستلام الدعوى من دخولها الدائرة والاعتناء بها وترتيبها وحفظ الاوراق وتصويرها إلى ان تخرج من الدائرة
ومن مهامه ايضا ذكرت لها الاعمال الادارية ومايمليه علي رئيس الكتاب .
جينا للسؤال الي كنت خايف منه وهو ماذا تعفل لو قال لك المحقق اكتب غير الكلام الي قاله المتهم ؟
انا جبت العيد في الاجابة وتناقضت في الاجابة حيث قمت اتفلسف وقلت له لن اكتب لانها امانه قال لي لو اصر قلت له لن اكتب قال لو اصر انك تكتب الا تكتب قلت له اكتب تفاديا للموقف امام المتهم واعلم بذلك رئيسي ورئيسه فيما حصل عاد انا هنا احس اني ناقضت كلامي حيث قلت له انها امانه وفي الاخير قلت له اكتب بس بشرط ان اعلم رئيسي ورئيسه بماحصل والا المفروض اني اقف على اجابتي الاولى وأقول له لن اكتب يعني لن اكتب لكن يالله ان شاء الله ماتكون عائق هذا الاجابة .
بعدين سألني سؤال رابع
ماهي القضايا الي حاصله على الساحة عالميا وحاليا ؟
برضه جبت العيد في هذه الاجابة
قلت له محليا يمكن الخبر الي نشر قبل فترة عن القبض عن الخلية الارهابية الي مسكوها في السعودية وتضم 124 ارهابيا اما عالميا فلست متابع للقضايا العالميه قال ولو خبر واحد قلت له سمعت عن الحرب الكوريتين فقط تناقضت في الاجابة هنا للمره الثانية والله يستر
قفز المقابل الثاني وقال لي ياحسين ماقد اشتغلت من اول قلت له الا اشتغلت في شركتيين وانا حاليا اعمل في مؤسسة للخدمات التجارية ففاجاني بسؤال غير متوقع وهو ماهو رايك في المدير الناجح فمن هول الصدمه ماكأني سمعت السؤال وقلت له سم عاد لي صيغة السؤال مره اخرى قال ماهي في نظرك صفات المدير الناجح ؟
قلت له ان يكون على اطلاع بمايدار حوله وان يكون مع الموظفيين مباشرة والاطلاع على عملهم وقضاياهم احس انها اجابة غير شافية لكن المهم اني جاوبت قفز الثالث وقال لي لو كلفلك رئيسك بعمل غير التحقيق كتصوير اوراق ومتابعة عمل ما في قسم اخر غير قسمك ماذا تفعل ؟
انا سألته قلت له هل هو من ضمن اختصاصي في العمل فقال نعم قلت له نعم اعمله على اكمل وجهه .
وبعدها رجع لي المقابل الاول وقال لي متى اخر مره دخلت موقه هئية التحقيق والادعاء العام على النت قلت له الاسبوع الماضي
وبعدها قالوا لي الله يعطيك العافية وبالتوفيق
وطلعت حصلت الموظف الي كان ينادي بالاسماء وقلت له خلاص قال لي خلاص وبالتوفيق وسالته متى بتكون النتائج قال لي تابع موقع الوزارة .
يااخوان المهم الثقة بالنفس وعدم تناقض الاقوال كما حصل لي اثبتوا على رائي واحد لانهم يحاولون يشوف انت بتثبت على رأيك والا لا وهذا مااتضح لي من خلال المقابلة وبالنسبة للإجابات لحد يأخذ بها لاني لست متأكد منها هذا والله اعلم مع تمنياتي لكم بالتوفيق والنجاح
التعديل الأخير تم بواسطة حسين صلوي ; 05-12-2010 الساعة 10:26 AM
|
العرض العادي
