المشاركة الأصلية كتبت بواسطة اوبريتر

[align=right]انصحكم عن هذه الفكرة الفاشلة جدا
يرغبكم فيها :
1 - تعجبكم في البداية سيارة جديدة .
2 - تنبسط أول 3 شهر فقط بحكم انك لك فترة عاطل ويمكن بدون سيارة جديدة .

اسباب الفشل مئات الاسباب واكتب ما اجده في ذهني حاليا :
1 - كم ارباحك في اليوم لنفرض 200 او 150 ريال كم القسط في اليوم 50 ولا تنسى فيه ايام تغيير زيت لنفرض ان ربحك الشهر 4500 تدفع قسط 1500 صافي لك 3000 كم مصاريفك ؟؟ ولو اشتغلت في وظيفة مرتاح براتب 3000 مو احسن لك من التعب واللفلة كل يوم .
2 - هل ستعمل كل يوم ؟؟؟
3 - اليوم اللي بترتاح فيه يومية القسط ماشي ومحسوب عليك .
4 - بعد سنتين او ثلاث سنوات ستصبح السيارة مصدمه ومهلوكه حتى منظرها الحلو يتغير .
5 - بعد سنة تبدأ تتعب وتحس بتعب السيارة وتبدأ اللآم في رجولك .
6 - شر لا بد منه لسائق التاكسي الكرش والجسم الخمول لقلة الحركة فقط جالس .
7 - بعد مرور 4 سنوات تنتهي الاقساط وتبغى تبيع السيارة وما تجيب لك قيمة لأنها تاكسي ومصدمة وحتى لو بتفكر هذه الفكرة كم مكسبك بعد 4 سنوات بتبيعها ب 30000 او 35000 يعني تعب 4 سنوات لعشان مكسب بسيط .
8 - مهم - ماهي خبراتك بعد 4 سنوات عندما تبحث عن عمل اخر ماذا ستقول كنت سائق تاكسي طيب مين يبحث عن سائق تاكسي له خبرة ؟؟؟
9 - عندما تسجل السيارة تاكسي باسمك تصبح مهنتك في الاحوال المدنية سائق تاكسي تمنع نفسك من أهم شئ الوظائف واستقدام عمالة واذا استخرجت جواز سفر يكتب المهنة سائق تاكسي وحتى عند استخراج بطاقة احوال جديدة يكتب سائق تاكسي .
10 - كم من شخص عمل سائق تاكسي وتركها الاف الشباب لماذا ؟ غير مجدية ولو فيها خير ما تركها الطير .
11 - ما هو مركزك الاجتماعي ومعليش سامحوني هذا مهم عندما تتعرف او تجلس مع شباب ويسألونك ايش تشتغل بتجاوب سائق تاكسي طيب نقول عادي لكن عندما يقول لك الشباب انا معلم وانا ظابط وانا موظف ما شعورك بصراحة .
12 - سؤال مهم هل اذا تقدم عريس لأختك وانا لا تعرفه وعندما تسأل عن مهنته يقولون سائق تاكسي هل توافق ؟؟؟ لا اقصد المهنة غير شريفة ولكن الا تخاف على مستقبل اختك معه !!!
فكر في الاجابة وحط نفسك محل هذا الشخص .
13 - ما هو مستقبلك يا سائق التاكسي .
14 - المهنة خاصة بمن لديهم وظائف في شركات وغيره وهي مصدر دخل ثانوي ليست اساسية .
15 - معرض للحوادث وللمشاكل .
16 - مستقبلك بعد 10 سنوات او 20 سنة ماهو ؟ تضل سائق تاكسي ولا تعرف اي خبرات او ايي شئ سوى التاكسي والمشاوير والركاب .
اكتب من واقع تجربة صديق حميم لي عمل سائق تاكسي لسنوات ووالله لم يندم على سنين ضاعت من عمره مثل السنين اللي اشتغلها سائق تاكسي راحت هباء منثورا بلا اي فائدة ولا اي خبرة اصحابه توظفوا في وظائف برواتب بسيطة منهم في شركات ومنهم حكوميين بند اجور وبعد سنوات اصبحت رواتبهم عالية وهو مازال سائق تاكسي لكن الحمدلله لحق عمره وترك هذه الشغلة الفاشلة بمعنى الكلمة .

المشاركة الأصلية كتبت بواسطة بن المبارك

ابعدهم والمعذرة من صاحب الموضوع . اذا فيه كلمة تشجيعية قلها للرجال واذا مافيه والله سكوتك افضل
اللي هنا كلن يدور رزقة ويبحث افضل حل وانسبها ، سواء تاكسي او حمال او غيره
وكلامك ماجا الا فيه مصلحة لك . اما انك راعي تاكسي بالفعل او لك فايدة بكلامه .
يابعدهم ما ضر الراجحي ولا ضر العليان وضر ضر الحميدان وكلهم طلعوا في وقت كان الكداد او التاكسي شغله احسن من شغلتهم . والشغل عمره ماهو عيب ولاهو حرام العيب انك كل شوي تدور الناس عشان تتسلف منهم . واذا على الفشل اعلمك وش اللي يفشل فيه

1 - 2 -3
اذا على الشغل الواحد يشتغل ، بيل قيتس كان يدور الشوارع يبيع برنامج بـ1 دولار ، والانمنهو بيل قيتس
وفيه ناس تطلع باليوم من 50 ريال الى 400 ريال ، لو التاكسي متعب ومكلف وفيه خساير وش قعد العمالة على التكاسي مع انه يسلم كل يوم للمكتب من 100 الى 170 ، ومع هذا راعي التاكسي الاجنبي كسبان
والعمل كل يوم او يوم ورى يوم مايضر ، الاهم انك ماتحتاج الناس ، ورزقك تجيبه من جبينك

وانا اكلمك شخصياً موظف بدائرة حكومية والحمد لله لكن للاسف ما تناسبني ، انتظر اخر الشهر ليه وانا دامي قادر ان شاء الله اجيب فلوس كل يوم ومتى ما بغيت

4
السيارة خلها بكيفها ، ولا ضر المصريين والسودانيين شف معهم سيارات موديلها 80 وتمشي مثل الحلاوة ، فاذا حافظت على السيارة مهما كان موديلها تبي تمشيك ان شاء الله 10 سنوات قدام ولا تهتم

5
الفلوس ما راح تجيك عند باب بيتك ، واللي يبغى الريال يروح يسعى وراه ، ولافيه شيء بلاش ، والناس على قولتك وماتتعب ويجيها فلوس شفها يامدمنه مخدارات او فيهم ضيقة صدر او 24 سكران ،
والسبب لانه ماتعب في ريال واحد فلو تعب كان حط رياله في مكانه الصحيح

6
الكرش والخمول ما ضر احد ، مارحت المطار وشفت كم نسبة اللي عندهم كروش واللي ماعندهم
والصحة من رب العالمين ولاهي بيد احد ، لكن الامر بسيط وهو انك تحافظ وتوزن الامور بالنسبة لصحتك
ولا مانع قبل ما تطلع بالتاكسي تمشي نص ساعة قبل
اظنها صعبه بعد والا لا

7
بعد 4 سنوات اخذ مبلغ السيارة 35 الف واروح اطلع سيارة جديدة واعطي 35 دفعة اولى
وبكذا انا ربحت وبعد 10 سنوات تلقاه يشتري السيارة كاش ، لان كل سنة يطلع قيمة سيارته وفي الاخير هو ربحان ماهو خسران على السيارة .

8
اسال الراجحي ويعلمك وش خبرته ، واسال بيل قيتس ويعلمك وش خبرته
الاول يملك مايملك ، والثاني انت الحين قاعد تستخدم كمبيوتر هو مصنعة
وهنا الفرق


9
اذا سجلوه تاكسي فهذا شي ممتاز ، هذا معناه ان يقدر يفتح مؤسسة ويقدر يجيب عمالة ، ويقدر يسوي بنفسه اللي يبغى ،
وبعد 10 سنوات ان شاء الله يفتح مكتب ويجيب عماله ويعطي كل واحد تاكسي ويشتغل له


10
واذا الشباب تركوها ياليت تجيب قصصهم ، لكن الشباب هنا كل واحد جايب نجاحة من التاكسي ، وكل واحد معطية كلام من الواقع فلا تنظر ولا تقول شي انت تجهله
اللي اشتغل تاكسي عارف كل شي اكثر من واحد جالس ومتبطح ويقول كلام مبني على تخيلات او توقعات هو ماجربها او ماسمعها

11
مركزي الاجتماعي صحيح بيقولون تاكسي ، لكن ميزة التاكسي ان مافيه احد يامر عليه
الضابط يامر عليه الضابط اللي اعلى منه
المعلم يامر عليه المدير
وحتى الوزير يؤمر
لكن التاكسي عايش جوه بنفسه متى ما بغى طلع ومتى ماجلس جلس

12
واذا الزواج فهذي خصوصيات الناس ، ازوجها راعي تاكسي احسن من ازوجها عاطل مايبغى يشتغل
الاول يجيب رزقه ، اما الثاني اخرتها منتحر او راعي مخدرات
الاولى ما اشتغل الا انه حاسب حساب عيشته اما الثاني اللي رافض يشتغل تاكسي خله يطر كل يوم 50 ريال من امه او ابوه ،

13
مستقبلي ان راح يكون عندي مؤسسة تكاسي ، وبدل الواحد اجيب 10
وبدل 10 اجيب 100
وهنا راعي التاكسي اللي تضحك عليك صار عندع مؤسسة ويدخل مبلغ اكثر من مبلغ الملازم في المباحث
وقتها تكون هنا ندمت انك ما زوجت اختك لراعي تاكسي
راعي التاكسي صار عنده مؤسسة وشركة ولا احد يامر عليه
والثاني كل يوم عند مديرة عشان يتوسط له يترقى

14
تقدر تخليها دخل اساسي ، انت وبكيفك

15
اذا انت ضامن ان اسطوانه الغاز ما تنفجر في بيتك وانت جالس تتقهوى
واذا انت ضامن تعيش لبكرا
فانا اضمن للرجال انه مايضر له حادث او مشاكل

16
مستقبلي راعي تاكسي ن بس عندي شركة وبمزاجي ، والواحد يعرف الشغله اللي يشتغلها ، انا مدني اعرف وش شغلي لكن وش عرفني بوظيفة العسكر ، وش عرفني بوظيفة الدهان ، بوظيفة السمكري
كلن له مجاله وكلن له معرفته

واذا خويك ما توظف او ما دور له وظيفة او ماعرف للتاكسي فانه بالتاكيد طريقته في الشغل خطا ، او انه ماعنده اراده او انه اساسا ما انجبر على التاكسي

فهنا الفرق بين اللي يستغل المهنة صح

المشاركة الأصلية كتبت بواسطة اوبريتر

انت موظف دائرة حكومية مرتاح ضامن الزيادات وضامن الراتب الجامد اخر الشهر ماتدري عن سواق التكسي عذاب اقسم بالله
انا اشتغلتها4سنوات ونص تعب ولا هي مجدية

فية ايام من 6 الصبح تجي 12 ما احصل شي
الناس بعدين يمشي لهم تقاعد وسواق التكسي مسكين مايمشي له تقاعد

التكسي السيارة تخترب مرة كل أسبوعين على الأقل توقف تصلحها تدفع الي كسبتة
نصيحة لوجة الله يا شباب انحاشو عن التكسي خذها نصيحة من مجرب

وبتلقون وظائف ان شاء الله

المشاركة الأصلية كتبت بواسطة بن المبارك

يابعدهم حتى لو اني موظف هذا معناه اني اقعد كل مرة اتحرى اخر الشهر
يابعدهم مافيه احد اغتنى من وظيفتة ، اللي موظف تلقى كل راتبة قروض وفواتير

وبالمناسبة اذا تتوقع اني مستانس بوظيفتي لا والله
الحمد لله موظف لكن انا ماهو طموحي اني اقعد لاخر الشهر
وانا ماقعدت هنا الا ادور لي شغله غير دوامي حالي حالهم ، يعني الا متى وحنا نقعد تحت رحمه الاجانب
ياكلوننا وحنا نتفرج
حتى لو حصل اني افصل من وظيفتي لاجل شي فصلت ،
الا متى وحنا نقعد تحت رحمه مدير والا سكرتير

واذا تنصح الشباب انصحهم وقلهم اسباب انك فشلت في التاكسي ، يعني تبي تقنعني ان الناس اللي يذكرون
قصص نجاحهم من التاكسي يكذبون . اجل اسال نفسك ليش انت خسرت وهم ربحوا

طيب نبه الشباب عن قصتك والاخطاء اللي صارت لك ، عشان مايطيحون مثل ما طحت
بس هالسوالف ابعدوا واتركوا وفاشل هذا اساس تطلع من شخص مهما دخل اي مشروع وانا اقول اي مشروع
راح يفشل
لانك انسان حطمت نفسك بنفسك

اذا ماعندك عزيمة خل الناس اللي عندها عزيمة تسوي اللي تبغى ، والا عندك عزيمة شجعهم وانصحهم . عشان ما يخسرون


الحين مافيه موضوع تاكسي الا راد عليه . اذا انت خسرت فيه ناس ربحت
وانا شفت ناس بعيني وسمعت منهم قالوا التاكسي ذهب
وانت تقول العكس

اجل انت اللي ماعرفت تشتغل ، واخوياك اللي يمشي لهم تقاعد
شفهم اذا تقاعدوا , صدقني اول ما يفكرون فيه التاكسي
تدري ليه
لان راتب التقاعد ماراح يكيفهم


الله عرفناه بالعقل ، ما شفناه بالعين