مساء / صباح الخير


بدون مقدمات ، كلنا نعرف أنو الدين الإسلامي دين يسر وسهولة .
وأن التعددية المذهبية ماتعني انو شخص "خاطىء " و "الآخر" صح .


لكن حقيقة سؤالي لكل مسؤول أو مسؤولة توظيف :


ليش تشرط كشف الوجه في وظيفتك ؟



****************************************
اليوم انا مابتكلم عن الحكم الديني ، ومين الصح ومين الغلط .

أنا باتكلم عن الرزق ، عن "المساومة في الرزق " .


لمن بنت تكون متربية في بيت أهلها تغطي وجهها ، وتتخرج وتتحمس وتحب تشتغل ، وتجي أنت / أنتي مسئولين التوظيف تقولو في المقابلة بصريح العبارة "لازم تكشفي وجهك " .

تتوقع أنو البنت دي اش راح يكون موقفها ؟
ممكن تكشف وممكن لا . الموضوع اكيد مو بغاية الصعوبة .


لكن أبغى اسأل : كيف تساوم الناس على أرزاقهم ؟ كيف تضغط على انسانة عشان لقمة عيشها ؟


دي الأنسانة اتربت طول عمرها انو وجهها دا مايشوفوا احد الا محارمها ، ومتعودة على دا الشي بغض النظر ان كان من الدين أو لا ..ألخ

تجي أنت تجبرها وهيا ممكن ترضى عشان لقمة العيش ، لكنها راح ماتأدي عملها براحة .

************************************************** ********************************


همسة : صدقني عمرو ماكان العمل بالوجه ، أو التواصل .
فيه ناس عذرهم أنوا عشان "الاتصال communication" مع العميل . اقلك ممكن صح كلامك وأنو الوجه مختلف فيه لكن صدقني في النهاية في شي اسمو لغة الجسد ممكن تكون "مغطية وجهها " وتكسب العميل ويرتاح معاها .
مممكن تكون واحدة كاشفة وجهها لكن اخلاقها سيئة مع العميل ، وطول الوقت مكشرة .


لا تعتقد أنوا غطا الوجه أو الكشف هو الأساس !!
في النهاية دا كلو بيعتمد على شخصية المرأة .


************************************************** *****************************

همسة تانية : لاتعتقد أن المرأة اللي بتغطي ممكن تكون "غبية " أو "منغلقة " وماتعرف كيف تتعامل مع الرجال .
كتير نساء عندهم زملاء يحترموهم ويقدروهم وهو ماقد شاف طرفها ، وياما ناس بتكشف ومايقدر الرجال يتعامل معاها من اخلاقها "ألفظة " .


************************************************** ************************


رجاء إن كنت مسئول توظيف أو صاحب شركة : لاتساوم الناس على رزقهم ، عشان مايجي اليوم اللي ربنا يرسلك أحد يساومك على رزقك في شي أنت ماتقدر تسويه !!



كلمة : أنا اؤمن بتعددية المذاهب ، كشف الوجه وغطا الوجه شيء ثانوي وفيه واؤمن بكل وجهات النظر ، لكن أكره التعامل بجبروت مع الناس ، أكره انو يجي شخص يساومك على مستقبلك وطموحك بأسلوب رخيص .


صورة من غير تحية لوزارة العمل اللي ما اتدخلت لمن دحين في شروط الشركات اللي تكتب بصريح العبارة "يجب كشف الوجه "