17-12-2010, 05:16 AM
|
|
Guest
|
|
تاريخ التسجيل: Feb 2009
الدولة: خميس مشيط حاليا
المشاركات: 6,889
معدل تقييم المستوى: 0
|
|
|
قصتي مع النظرة الشرعية...بالصور
هنا فقط ابحكي لكم قصة خطوبتي وملكتي وزواجي للعظة والعبرة لعل بعض العزابية المشافيح
ياخذون مني العبرة ويعرفون وش اللي لهم وش اللي عليهم
في عام 1428 حشرت اخوي الكبير على جنب وهو رايح يصلي التروايح اخر ليلة من شعبان ...حشرته تحت المكيف حق جارنا قلت له تكفى قول لابوي يخطب لي قسم بالله اني بلغت وطلع لي شنب
بس تراني توي محلق وصار صوتي خشن حتى امي يوم تكلمني بالجوال ماتصدق ان ولدها...وحتى حريم جيرانا صارو يتغطون عني ....قالي طيب خلني افكر....قلت له ياخي تكفى كلمه واعطية دورة بالفورد حقي ....قالي ليه ماتكلمه انت قلت له ناسي اني امس كسرت قزاز سيارة جارنا ابو مصلح ...
المهم اول يوم في رمضان جبت له موية زمزم وتمر وجلست جنبه على السفره وقاعد اقرى الاذكار وادعى للامة الاسلامية ابيه يعرف اني عقلت ويوم اذن المغرب عطيته الموية والتمر ...ويوم شرب المويه شرق بغى يموت قالي من الحمار اللي جاب هالموية ...قلت مدري يمكن ابراهيم اخوي ...قالي الله يصلحه هذي موية وملح ماهيب موية زمزم....
المهم بعد حب خشوم وعلوم قبايل وافق ابوي قلت له يبه تكفى ترى ما ابي الا هالبنت والله لو تنطبق السماء على الارض ما ابي الا هي قالي طيب يالورع وش رايك نخطب لك بنت خالتك في ابها ...قلت والله البنت مابها شي بس اخوها دايم يفوز علي في البلايستيشن ومالي وجه اقابله مع اني اطلعه رصيف اذا لعبت معه حرامي السيارات المهم يبه ياتخطب لي هالبنت والا خلني عزابي ازين...\
وافق ابوي الله يحفظه وحددنا رابع العيد عام 1428 عشان النظرة الشرعية
رحت الحلاق وقلت له شوف ....شايف الاخ اللي في المراية ,,,قالي ايه...قلت ابغى اشوف واحد جديد...قالي على راسي...
وبعد ساعة وربع قالي قم...قمت واناظر في المراية...ويوم صار شكلي زي هذا
بس هو معه بزر وشنطة وانا مامعي الا مفتاح الفورد الله يرحمه تكسر في حادث...
ويوم طلعت من عند الحلاق جوني الصحفيين يسألوني
ماهي نظرتك المتوقعة للمنطقة بشكل عام؟
قلت والله اتوقع انخفاض حاد في درجات الحرارة مع هبوب رياح شمالية باردة تتسم بالدفء..على المنطقة الغربية بشكل عام
قالي خوي يالدلخ يحسبونك الحريري حق لبنان...
سألني صحفي ثاني..
سؤال مافهمته...قلت له اغد رجال ودحدر لاهلك لا تصير علوم ماهيب زينة...
قالي انت تسذوب الحريري مايقول اغد رجال...انت مو سعد الحريري...
المهم تهاوشت معه وشقيت وجهه
طلعت من البيت وانا كلي شموخ وكبرياء ومن اول مطب طاح الشماغ ..
المهم دخلت عند عمي وانا ابي اوريه اني انسان مثقف وان الثقافة مقطعتني ....المهم قاعد اقوله ان جدار برلين طاح عشان المقاول مصري وما زود الاسمنت وسارق نص الحديد...وعمي مشاها لي
الشيبان جالسين يسولفون وانا متقطع ابي اشوف البنت وادق ابوي في رجله قال ابوي لعمي طيب الولد يبي يشوف البنت قال عمي خلها بعد صلاة المغرب مابقي الا 10 دقايق ...اكلت معي ...قلت طيب نصلي ونشوف اخرتها ...صليت ورجعت ..قال عمي تقهو وبعدين ادخل شوف البنت ...انا ماصدقت قلت لعمي انا صايم قال ابوي الولد يمزح ترى تونا صلينا المغرب ....قلت لعمي ترى اهم شي عندي صيام الست من شوال...
المهم قبل ما ادخل دقيت على خويي قلت له دق على جوالي بعد عشر دقايق تراني حطيت نغمة السديس وهو يدعي في الحرم
عشان عمي يقول ماشاء الله قلبه متعلق في المساجد
خويي الدلخ دق على جوالي الثاني وكنت حاط اغنية رومنسية...
يوم دخلت بحلقت فيها الين دمعت عيوني وامي جنبي واختي جابت لي قهوة يعنني باقهويك قلت لها اقولك ترى مو وقتك الحين انتي معي في البيت 20 سنة ولاعمرك جبتي لي كاسة موية...
حسيت اني اكلت البنت بعيوني قلت خل اعطيها فرصة عشان تشوفني واناظر في السقف واقول لعمتي اللمبات هذي 110
والا 220 يعنني ابفتح موضوع للنقاش!!!
قلت لعمتي اللمبة اللي في الركن ورا ماتشتغل كلمي اي واحد من العيال عشان يجيب السلم ابطلع اغير اللمبة وكلمي عمي يجي يمسك السلم عشان لا اطيح..
قالت لي اختي فظحتنا انت جاي تتزوج والا تغير لمبات...قلت لها اصبري شوي ابغى البنت تشوف امكانياتي....وتريني اقدر امشي على ايديني...قالت طيب اطلع الحين....طلعت وبعد خمس دقايق دقيت على اختي قلت لها نسيت اقولك اني اجيد اللغة الانجليزية تحدثا وكتابة ....وبعدين لا تقولين لها ان راسي كله ترميم من المضاربات والحوادث
طلعت من المجلس وانا اقول بيني وبين نفسي لعيونها بس لعيونها قلبي سراب بدونها ماقول اعشقها بعقل ...مجنونها
ويوم طلعت من المجلس حصلت اخوها الصغير عند المغسلة يقولي انت اتحادي والا اهلاوي قلت والله اني اعتزلت الكورة من زمان اخذته على قد عقله ومشيت الامور ...
رحت لابوي قلت له يابابا انا عاوز اتجوز عجل علي وخلنا نبلّش هلاّ
قالي اركد وخل نخلص...قلت له ابي امي ابي ابوي لأ مستحيل
جاني اخوي الكبير يقول وش فيك قلت له مابدي اقلك شوبني شلي جرالي في الدني بدي معك ابدى العمر اول سطر ولا بدي احكي شو اللي حصل شو اللي كسر فيا الامل واللي قلب الدحكة زعل غربني ياما وردني
قالي ياحليلة ياحليلة يحتري مني اجيله يكفي واياه اتكلم هذي من عندي جميلة
قالي تبي شي انا رايح قلت له خذني معك خذني بايدك على الفرح خذني معك ع المطرح اللي مافيه جرح خذني معك باب القلب لما انفتح خلاني حدك انحني
قالي قم وخر سيارتك ابي اروح مشوار...
وراح مشواره ورحنا مشوارنا والحمدلله تم الزواج على خير والان حصيلة حبنا طفلة عمرها 10شهور يقال والله يستر ان هالطفلة تسير على خطى والدها
والسلام عليكم ورحمة الله وبركاته
وترقبوا قصتي في التقديم على العسكرية
|
والله نفسي اتزوج اليوم قبل بكرة
ااااااه زمن قاسي لاعسكرية تقبلنا والمدنية لازم
العرض العادي
