السلام عليكم ورحمة الله وبركاته

أتسيف الحال يا عواطليه يا مناضلين

خلون أحتسي لكم وش صار معي الصبح اليوم مع معهد دقوا علي أمس يبون موظفات
وشددت علي هاللي متصله تقول تجين الساعه عشر بالضبط وإذا جيتي بعد عشر نلغيتس

قلت طيب جايتكم وعطين الوصف وعطتن

وقمت الصبح من الفجر ومدروخه و زهبت الفطور وأفطرت وعينت من الله خير وطلبت من خيي يودين وتخبرون هالعيال لازم مواعيد مجدوله وبالذات اللي عندي شي يبط التسبد لازم أخذ موعد عشان جدوله مزحوم << ولا الراجحي الأخ

إيه ماعلينا ورحت الساعه تسع ونص وعاد شوارعنا مثلها مثل أي شارع بالسعوديه وأخذنا بتداول الحديث حول المناقصات و هالحفريات اللي ماخلت شارعن بحاله عاد أنا أقول له تراهم يدورون على مفك عزوز وشرعنا بالسب والشتم على هالنصابين
تخيلوا شوارعن وش زينه قبل لقيناها محوطه بصبات ومحفرينه
عشان تسذا من تحويله لتحويله إلين اصل للمعهد المطلوب وجيت قبل الموعد بشوي رقيت فوق إلا ألقى وحده بس على الأستقبال سلمت عليه قلت أنتم داقين علي تبون تسون مقابلة شخصية معي جت قالت المديرة مهيب موجوده راحت تقضى للمعهد !!

أستغربت من جد الحين داقين علي ومشددين وهذي رايحه تتسكع عاد جلست أحتري الماخوذه إلا جت بنت مثلي وجلست جنبي همن جت بنت ثالثه والمديرة ما شرفت

كل شوي أطل بساعة جوالي حشى وين هذي !!
جت الساعه 11 وزود قلت الحين بتجي المديرة وإلا شلون ؟؟ قالت سيارتها متعطله وبالطريق

وأنا أحتقرص وأحترق من داخل مسوين أنفسهم نظاميات وحقات شغل وهن خرطي
قلت يالله أنتظر وقسم جت الساعه 12 إلا ربع إلا يدق خيي وحالته حاله ينافخ علي
وينتس خلصتي ؟؟ قلت ماجت مديرتهم قال أجل أطلعي قلت تكفى أنتظر ورح صل الظهر همن مرن قال أحتريس 5 دقايق وتطلعين

قلت طيب وأرجع أسأل هاللي بالأستقبال متى تجي المديره قالت ابد بالطريق !!

وأنا بنفسي أقول كل هذا طريق شكلهم يهكون علي

رجع دق الماخوذ وعرفت من نفسي لو جلست فجّر المعهد واللي فيه همن قمت عطيت هالي بالأستقبال السي في حقي قلت ما أقدر أجلس أكثر من كذا وأنا أخذ قراشيعي قلت للبنات النظام زين والوقت وقت
وطلعت إلا جالسن يدعي وحالته حاله على المعهد واللي فيه وسبحان الله صادف وقت أذان الظهر وهاتك تحسيب عليهم ليه خربوا عليه يوووومه وهي بس3 ساعات

حسبي الله عليهم جعلهم ما يتهنون جعلهم ما أدري وش جعلهم وجعلهم ........... قلت يابن الحلال الحين وش ذنبي أنا هم اللي أخرون ؟؟ قال أنتي مالتس ذنب أدعي عليهم وقسم طول الخط حسبي الله و جعلهم ما أدري وش راسي صكن صك قلت بس خلاص أزعجتن وأخذ يزيد ويعيد قلت شف ترى أبفتح السيارة أبنتحر يا أخي أسكت راسي صدع من نقك
وسكت ثواني ورجع الموال بس بصوت واطي ياربيه على اليوم الغبر

وبس خلصت قصتي مايستفاد منه :
1- البنوتات إذا رحتن مع أخوانكن أشرن سماعات وإلا حطن قطن في شناطكن تحسباً لأي طارئ
2- الشاب السعودي خل عنك الحتسي بس أنواع الجدوله على حساب أهلك وإلا مع خوياك أنواع الفله والصرقعه .
3- مالت على المعهد اللي رحت له وأكيد أنه خيره لكن مقهورة على اللطعه الغير محترمه .
4- الله لا يربح الخونه حقين المقاولات خربوا شوارعنا عشان مناقصات لاجت ولا جت .



وبس

والله صااادقه الواحد لويطلع مع اصحابه تشوفين الضحكه من وين لوين ومع خواته ياللله ياللله تاخرت وراي شغل ومشواير الله يصلحهم بس
الله يعوضك عن المعهد باحسن منه ياااارب

وعليكم السلام ورحمة الله وبركاته
والله عن اخوك مو بس هو كذا الشعب كله كذا الا انا طبعا
وعن المعهد ليه ما اخذتي منها رقم المديرة وكلمتيها بنفسك؟ الله يعينك كل المواعيد كذا ياختي مو بس المعاهد
بكره ارجعيلهم الله يعينك تحملي بس لاتتركيهم واذا تركتي عندها الملف ماتنفع ماراح حتى يفتحوه لازم تروحيلهم بنفسك وان شاء الله مقبولة يارب
يلا بكره بستناك فقسم مبرووك التعيين معاي بس ماراح تشوفيها اذا مارحتي المعهد
الله يوفقك ان شاء الله

وعليكم السلام ورحمة الله وبركاته
لا تضيقين صدرك لو انها لك اخذتيها ام هالعيال سبحان الله طينتهم وحده الا من رحم ربي
ووسالفتك ذكرتني بسالفتي باالبنك تخيلي علشان اقص بطاقه من الساعه 9الصبح الى
العصر اذن واناافتح باب بيتناواللي يقهر ان معي رقم وموعد ويوم رحت قالوا خذي رقم
جديد كان 23 وعطوني 52بس سبحان اللي سخر لي اخوي ذاك اليوم وانتظرلين انتهيت..

__________________
"لله دُر أمي إذا ابتسمت
تهادت جروح قلبي والتئمت"

لـــعلها خيرهـ

وبعدين ما دام أولها كيذا ينعاف تاليها


مووووفقه أختي صراع

يا قلبي عليك خيره إن شــاء الله

بس وربي اسلوبك فلّــــه

اما العيال وربي صادقة ونصيحتك بحفظها

والله يعوضك افضل منها ياارب

الله يعينك ويعين الجميع هذا حالك وحال الجميع وانا اخوك

الله يوفقنا جميعاً يارب