للي يقدر يساعدني يقرأ موضوعي

الذوق كله · #1 (**permalink**) 23-12-2010, 10:41 PM

السلام عليكم ورحمة الله وبركاته

صباحكم/مسائكم ورد وجوري

كيفكم ان شاءالله بخير

ارجوكم ابي مساعدتكم باللي تقدورن عليه واللي مايقدر يكفي يدعي لي بصلاته

انا اشتغل بس راتبي مايكفيني قليل حييييييييل يالله يكفي ديوني

انا ابي شغله حلوه بسيطه اشتغل فيها وانا بالبيت مثلآ واحد تاجر مش فاضي يستقبل مكالمات او يأخذ طلبيات ويبي وحده تقوم بالمهمه هاذي

او احد عنده بضاعه نسائيه ويبي يصرفها يمشيها انا اشتغل بمدرسه وبقدر اصرفها على المدرسات والموظفات

او احد يبي شقه او عماره او ارض او فله او سياره ومايبي يتعب ويدور انا ابحث له ولي طبعآ سعي

او اي شغله فيها مكسب مضمون لو بالشهري او الاسبوعي

والله العظيم ان لي حوول اربع شهور اشتغل ولا تهنيت ولا براتب واحد كله ديون راتبي مايتعدى 800ريال

وودي بمشروع حلو بس مافيه مجال راتب مايبقى منه شي

اللي يقدر يساعدني ياليت يفيدني ولا تبخلون علي وتسألون لي اقاربكم ولا ابي مثل الشركات اللي يبون مندوبات ونسبه لاني بصراحه مااحب اسوق الا على شي مضمون ومجرب

وجزيتم خير

الفاضلي · #2 (**permalink**) 23-12-2010, 11:03 PM

اختي انا ها اليومين بحول الله وقوته بفتح محل كمبيوتر
طباعة وتصوير تحاضير بحوث ملخصات مطويات حل اسئلة وخلافه وكذلك اذا عندك فكرة في تصميم المواقع والمنتديات والبنرات
ممكن نتعاون مع بعض ايش رايك
أخوكي / ابو محمد

ღأبو سلطانღ · #3 (**permalink**) 23-12-2010, 11:05 PM

اتمنى لكـِ التوفيق

لكن لو ذكرتي من أي مدينة أنتي ؟

داااايخ · #4 (**permalink**) 23-12-2010, 11:59 PM

الله يوفقك ويزقك ويساعدك

السـفير · #5 (**permalink**) 24-12-2010, 12:53 AM

من اي مدينه انتي ؟

تاجر بلا دراهم · #6 (**permalink**) 24-12-2010, 01:41 AM

انصحك لوجهه الله اكثري من الاستغفار

وابتعدي عن العمل مع الرجال... انا رجل وانصحك نصيحه لوجهه الله

لن تأخذي ريآل واحد .. واقولها عن معرفه وقناعه تامه كثر من عملن مع الرجال عن طريق وساطه او سمسره ولم ترى ريال واحد

لا ادخل بنوايا أحد .. لكن الاغلب

المشكله ليست فقط بالنساء ايضا الرجال يشاركونهن المشكله

حاولي تسوين حلويات .. طبخ.. حضانه اطفال ..

اذا ماعجبك اي واحد منهم.. اغمضي عينيك وفكري ماهي ميولك وماهي مواهبك

ساعتهاا رآح تلاقي شغله انتي فاهمه فيها

نصيحه لك ولغيرك لاتفكر تشتغل بشغل ماقتنعت فيه او ماعندك معرفه وخلفيه مسبقه

الله يوفقك ويرعاكم...

القلعه التجاريه · #7 (**permalink**) 24-12-2010, 04:37 AM

ربي يرزقك الرزق الحلال ويفرج همك ويرفع قدرك

اتفق مع اخي تاجر بلا دراهم

ابتعدي عن الرجال .. مو عشان ممكن ماتاخذي منهم ريال لالالالا ممكن تاخذي حقك وزود

لكن ابتعدي عنهم وسدي باب الفتن فقط لاغير

نعم الرجل يفتن بمراه والمراه تفتن بالرجل

هذه هي الحقيقه

الشغل راح تحصلي شغل بامر الله في مجتمع نسائي

اكثري من الذكر والاستغفار والصلاة ع رسول الله

ممكن يجيك شاب يحقق لك جميع طموحك ويعطيك حقك وزياده
وغرضه استغلال حالتك الصعبه

الوحده تفكر مليون مره قبل ان تطرح اي شي وتفكر لبعيد

عالعموم يا اختي

ممكن تبحثي لك عن احدى الاخوات ولو من محيطك انك تسوقي لها اشياء

وربي ييسر لك ويرفع قدرك ويرزقك الرزق الحلال