لاضاقت الدنيا


لاضاقت الدنيا علي والفضا ضاق=ولاجتني الضيقه وهم العبادي
نصيت من بأمره بدى نور الإشراق=اللي من عروشه على الخلق بادي
واللي لخوفه تنثني كل الأعناق=وبأسمه ينادي للصلاة المنادي
ولاكثرة همومي وضاقن الأخلاق=دجت بمناكب الأرض دوج الجرادي
نضرب بحور وناصل آفاق وآفاق=لاذاق ولد اللاش حلو الرقادي
الرزق بيد الله فتاح الأرزاق=ولاهوب بيد الناس شربي وزادي
أهل المصالح لجلها تحفر أنفاق=ويغيضها لبس الهدوم الجدادي
عزلت من رفقة وسيعين الأشداق=ما شفت غير البلبله والدوادي
وذكرت من له خافق القلب خفاق=اللي بعد ربي عليه إعتمادي
الغايب الحاضر له أشتاق وأشتاق=هو منتهى الخوه وغاية مرادي