بسم الله الرحمن الرحيم

السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين ..

اسعد الله الجميع بالخير والعافية
عندي نقاط حاب استفسر عنها وياليت يتم قراءة الموضوع كامل لكي تتضح الصورة واتمنى القى جواب عند اهل الخبرة والاختصاص:
مدخل :
موظف قطاع خاص . شركة .
النقطه الاولى:
اشتغلت لدى الشركة في نهاية 2007م عن طريق واحد جزاه الله خير وكانت طبيعة شغلي استقبال بس اسم يعني اجي والا مااجي عادي واخر الشهر اخذ راتبي ومقدار الراتب 2000 ولايوجد عقد عمل بيني وبين الشركه بس اللهم لي اسم وينزل اسمي بالمسيرات ولي رقم وظيفي خاص بالشركة وغير مسجل بالتامينات الاجتماعية واستمريت عندهم الى نهاية 2010 يعني مايقارب 3سنوات ســـــــــــــــــؤالــــــــــــــــــــــــــي:
1/ هل استحق خلال تلك الفترة مستحقات يعني نهاية خدمة و و و و الخ

النقطة الثانيه:
ونهاية 2010 صارت في وظيفة شاغرة عبارة عن مدير اداري وتم ترشيحي عليها وسويت العقد والعقد مدته سنه يتجدد تلقائي والراتب المتفق عليه 2000 وسجلوني بالتامينات ويخصمون 180 يعني صافي الراتب 1820 ريال.
طبيعة العمل :
دوام فترتين + تعقيب وانهاء جميع المعاملات لجميع الدوائر الحكومية .
وللاسف سيارة الفرع اللي انا اديره خربانة يعني كل المشاوير اللي اسويها على سيارتي والبنزين من عندي <طبعا ماصار اي اتفاق على هالشي يعني ماتكلمت بالموضوع ولا هم قالو > ولايصرف لي بدل نقل وساكن فبيت اهلي ولايوجد لدي بدل سكن علماً ان جميع العاملين لدى الفرع مؤمن لهم سكن لانهم اجانب واللي ساكن برا يصرف لهم بدل سكن طبعا انا السعودي الوحيد بالفرع بس باقي الفروع الجميع يستلم بدل السكن اجنبي اوسعودي وهذا البدل غير موضح لدي بالعقد
وهذا اول عقد اسويه فماادري هل توضح البدالات بالعقد ام لاتكتب من ضمن العقد.ومن ضمن بنود العقد :

البند الثالث :
يدفع الطرف الاول للطرف الثاني خلال قيامه بكامل واجباته راتباً شهرياً مقداره
(2000ريال سعودي) شامل .
ســـــــــــــــــــــــــــــــــــــــــــــوالي

1/ هل يحق لي صرف بدل مواصلات عن المشاوير اللي اسويها على سيارتي ؟ وكم مقداره ؟ وطرقة حسابه؟

2/ هل يحق لي صرف بدل سكن مع العلم اني اسكن مع اهلي وعزوبي وكم مقداره ؟ وطريقة حسابه ؟

ملاحظة: قد تفيدكم بالرد علي تم الحصول على اللائحة الداخلية للشركة والمصدقة من مكتب العمل
البدلات :
المادة 41:تؤمن المنشأة السكن المناسب للعامل وفق مايتفق عليه في عقد العمل او يتم صرف بدل سكن نقدي يتفق عليه في عقد العمل .

المادة 42:تؤمن المشأة وسيلة النقل المناسبة للعامل من مكان سكنه الى مقر عمله وبالعكس وفي حالة عدم تأمينها يتم صرف بدل نقل نقدي يتفق عليه في عقد العمل .

يحق لك تطالب بالهشي مادام انت موقع عقد

هذي مشكلتنا الواحد ما يعرف ايش الي له ايش الي عليه

أولا انت غلطان تعمل و بالإسم فقط
و لا تطلب تسجيلك في التامينات
و من حقك تستلم نهاية خدمة ما دمت أكملت السنة و أكثر

اما الوظيفة الجديدة لا تقبل لا تقبل 2000 و مراجعة دوائر حكومية
أنا قبلت بأضعاف راتبك لكن غيرت رايي و أطالب باكثر
لان المراجعات ما تخلص و لا تتوقف على ادارة واحد
تبداء بجوازات و تنتهي بزكاة و تامينات و مرور و مكتب عمل و مدرسة القيادة
و مع هذا 2000 ريال و بلا مواصلات لا تقبل حتى موضوع شامل
لازم يحددون الاساسي و بدل السكن و المواصلات
و أقلها 2000 غير السكن و المواصلات 500 و 500 في البداية فقط
حتى 500 قليلة فقط تكفي من السكن الى العمل كيف مراجعات في أكثر من جهة
نصيحة لا تقبل قبل العقد و معرفة كل فقرة لان الشركات ليس لهم أمان
اذا جاء وقت الجد يظهرون لكن بألف عذر و يدخلونك في متاهات
اما الأجانب معروف وضعهم
سكن و مواصلات و تأمين طبي حتى تجديد الاقامة و غيرها لا تقبل الا بتأمين
و السعودي يماطلون به سنة و سنتين المهم يوفرون على حساب السعودي

شامل يعني كل شئ الأساسي من البدلات
اما تسكن مع أهلك أو ما تسكن ما هو شغلهم
من حقك تستلم بدلات حتى في الاجازة فقط بدل مواصلا تتوقف
و تستلم راتب شهر الاجازة مع السكن اول يوم تاخذها

اذا في العقد مو مكتوب لك بدلات ليش وقعت عليه مارفضت .؟

راجع العقد اذا مافيه بدلات ماتصرف لك ولايحق لك تطالب بها .

الوظيفه الاولى طالما بدون عقد رسمي مالك نهايه خدمه مع ان المفروض لك نهايه خدمه حلوة ومبلغ ينفعك .


نصيحه لاحد يشتغل لين يراجع العقد مره ومرتين وثلاث

احفظ حقوقك من حقك بدلات ونهاية خدمه مثلك مثل اي موظف لاكن بعد توقيع العقد مايحق لك

الا اذا متعاونين معك وناس طيبين يساعدونك يغيرون العقد لك .

اتمنى لك التوفيق عزيزي

طبعا لكل شركة سياستها في صرف البدلات
بس بعطيك الحالات

- اذا انت في مقر العمل في المكتب الرئيسي نعم فيه بدل سكن فقط العاده يكون 25% من الراتب يدفع شهري او يجمع كل 6 شهور

-اذا نقلوك الى خارج مقر/مكتب العمل نفسه ... فهنا لا والله تشرط بدل سكن 25% ونفس الوقت توفير سكن وبدل مواصلات 10% بس في حالتك 10% ما تخارج اطلب 500 ريال مواصلات

-بعض الشركات تعطي كذا وكذا سوى نقلوك او انك في مقر مكتبهم.

-بالنسبة للمواصلات اذا هي سيارتك الخاصة انا اقترح عليك انك تاجرها على الشركة بس تحت استعمالك
والمعقول دائما يكون 1500 او 2000 شهريا هذا نظام الشركة عندنا.
وجب لهم الفواتير حقت بنزين لان البنزين ما يدخل في الـ2000 او 1500

هذا والله طريقة سويتها في الشركة اللي انا فيها ومشت واللحين ماجر سيارتين كل وحده 2000


الله يوفقك وييسر لك ولنا جميعا ويرزقنا من واسع فضله ........... امين

ماعندي خلفيه اخوي
الله يوفقك يارب ويسهل امورك

شف ياغالي

لازم يعطونك بدل سكن ومواصلات ( بدل نقل ) الي هو عبارة عن بدل سكن 600 ريال تقريبا وبدل

نقل 400 ريال تقريبا ويعطونك كروت بنزين عدد لترات معينة شهريا من محطة الدريس او اي محطة

متعاقدة معها الشركة.


لازم تطالب بحقك وقلهم نظام مكتب العمل يعطيني راتب اساسي وبدل نقل وبدل سكن والمفروض الي

مثل شغلك يستلم 3000 او 3500 ريال شهري لانك تشتغل معقب وحاول تضغط عليهم لان وظيفة

التعقيب لازم سعودي يعني محتدين عليك هم.

أم اذا رفضو الشكوى على الله اصبر عليهم الين تاخذ سمعة حلوة وبعدين ارجع طالب بحقك والله

يوفقنا واياك.