السلام عليكم ورحمة الله وبركاته

الله يسعد مساكم يالربع


أنا متخرج من كلية التقنيه قبل شهر تخصصي إلكترونيات ومعدلي 4.28 ودورت وظايف مافيه أحد يبينا


لذلك أبغى أستشيركم الجيش وش يعطينا أي رتبه وكم الراتب وطريقة التقديم ؟؟؟

ومثلا أنا ودي بالجنوب أقل شي 5 سنوات قدام لبعض الظروف الصعبه عندي عشان والدتي الله يخليها لي

والأمن العام التقديم على جندي يعني ما أقدر أسجل جندي وبعدين أطلع الشهاده وأقول أنا من التقنيه ويعطوني رتبه أعلى ولا وش الخبر ؟؟


تكفون إلي عنده أي خلفيه لايبخل علينا يابيضان الوجيه

لالالالالالالالالالالالالالالالالا ياخوي صل على النبي

كليه تقنيه وهالمعدل ماشاء الله عليك لاتفكر بالجيش

انت تقول ظروفك مهيب على كل حال زينه يعني عندك الوالده تعبانه الله يشفيها ويطول عمرها ويخليها لك ان شاء الله
فالجيش مايصلحلك ابد لان الجيش كل فتره وانت بديره طايحين فالعالم نقل مو على كيفك تختار التعيين
وراتب وكيل رقيب بالجيش راتب جندي بالامن الظاهر

اذا انت طولك اكثر من 168 وامورك زينه لاتفكر بالجيش عندك قطاع الامن العام افضل منه بميه مره

وتقدر تتوظف تسرح وتضوي من عند الوالده حتى لو اشتغلت فتره برى تلاقيش دقيش بالهبل بالامن العام

نصيحتي لك خل دام عندك هالشهادة قدم بالامن العام او وظيفه مدنيه لو على عقد تخصصك حلوو مهوب مثلي

انا خريج كليه تقنيه ومعدلي زفت مقبوول وللحين مالقيت وظيفه توهقت بالتقنيه الخايسه هذي ماحد يبينا انغشينا فيها

هذا الي عندي وسلامتك

موفق بإذن الله ... لك مني أجمل تحية .

الله يسعدكم على المرور


مشكور أبو عبدالله والله الواحد سار محتار الأمن العام كل يمدحه لكن حرام يقارنونني بخريجين ثانويه المفروض يعطونا رتبة عريف والحمدلله طولي 173 ووزني 87 لكن المشكله بالجيش تفرق ناس تمدحه وهي مستحيه وناس تسبه بقوه سرنا محتارين الله يكتب مافيه الخير

مواطن مطنوخ شكلي بسجل بالأمن العام واتكل على الله

ياخوي وخر وخر وخر عن الجيش والله ان يعطوك وكيل رقيب لاكن مالها قيمه الرتبة طاله عمرك وكيل رقيب تنزل نظافة مع اخوياك وكيل رقيب تنزل حصه صباحية وكيل رقيب تستلم خفارة وكيل الرقيب راتبك اقل من الامن العام جندي وكيل رقيب راتبك ينزل شهر كامل وشهر ناقص 700او500وتراجع قالو من المحاسبه ولا الخطريه والاعشاة شهر تنزل واربع مقطوعة يعني نكد في نكد وانا مثلك معي تقني والله العظيم انعرضة علي اني اللبس البدله واداوم حتى تجي الدورة واني رفضة تخيل الرجال الي كلمني قال روح فصل بدله بثلاث شرطان وتعال ولايهمك شي لاكن رفضة ياخوي ابي اعيش متهني مابي اقعد طول عمري في ذل واهانه وراتب قليل وعباطة ظباط عليك مافي تقدير لك تداوم الصباح انسى تطلع من اللوء قبل نهاية الدوام مثل المدراس بوابه متطلع منها شرطة عسكرية لوجيت قبل نهاية الدوام توقيف على طول وتحجز سيارتك وعنصريه على بعض ويكرهوك في نفسك وعملك والله تتمنى نص جندي بالامن العام والكلام الي انا قلته لك مو من راسي انا خويي توه فصل منها
يارجال احنا مانقول الجيش مانبيه لا احنا شجعان ولو احتاجنا الجيش بنجيه بدون راتب لاكن احنا معترضين على التعامل وعلى التنقل وعلى الراتب هذا رزق وانا طال عمرك باقي لي 8سنوات ويصير عمري 30 لاصار عمري 29 وانا باقي عاطل ذاك الوقت افكر في الجيش هاذي نصيحتي وسامحني على الاطالة بس قلت اعتبرتك مثل اخوي وقلت انصحك بالي عندي
(من كتم علم الجمه الله بلجام من نار)

صلي على النبي وتريث شوي ياحبيبي ..


وخذ المعلووومة مني : وبتدعي لي

انا نفس تخصصك ومعدلي أقل منك بـ كثير ( فوق 3.75 ) المهم !


فيه تقديم يفتحونه الدفاع المدني لفنيين الطيران كل سنه ويبتعثونك 3 سنين استراليا وتاخذ وكيل رقيب فني في صيانة الطائرات انا الحين اسوي امور الفيزا ( دعواتكم تطلع بأسرع وقت )



وافضل لك من هجوله القاطاعات الثانيه


والله يوفق الجميع ..