30-06-2011, 02:42 PM
|
 |
عضو مميز
|
|
تاريخ التسجيل: Nov 2009
المشاركات: 838
معدل تقييم المستوى: 456610
|
|
الى اللي جتهم رسائل قبووول مبدئي
اقدم لكم كل مااراح يصير معكم بالتفصيل ....واعذروني اذا حصل مني تقصير
==============================
طبعا بعد ماجتك الرساله قبول مبدئي ,, جهز كل الطلبات من صور وحلاقه واوراق واطبع الاستماره اللي سجلت بها بالموقع والصور خذ معك 8 احتياط
تروح مقر القبول والتسجيل
اذا انت من اهل الرياض
بتكون تعرف المخارج والطرق
تدخل مع مخرج سبعه ويجبرك انك تروح يمين امش وديور فوق تحت بعدين امش لين يجبرك تروح يمين ,,
امش مع الخدمه يجيك مكتوب شرطه الصحافه امش شوي يجيك مكتوب امن المنشات لجنه القبول المركزيه رح يمين وتلقى العسسكر واقفين صفط موترك بس لا تاخذ جوالك معك ممنوع دخول الجوال ,,
واذا انت من برى الرياض فالاريح انك تاخذ تكسي وتقول ابي شرطة الصحافه او امن المنشات غير اللي على طريق خريص
بعد الوصول للقياده
بلبسك الرياضي ومعك جميع الاوراق تدخل وياخذون بطاقتك يتاكدون ان موعدك في نفس اليوم بعدها يعطونك رقم تنتظر شوي وتدخل رف السروال الى الركبه ومنزل حذائك .. تجي عند قياس الطول والوزن ياخذونه بعدين يختمون لائق او غير لائق بعدهايدققون بالاوراق ويقولون وين تبي الكشف الطبي .. بعدها تطلع من عندهم يعلمونك متى تروح المستشفى او يرسلون لك
===================
مرحلة الكشف الطبي
تجي اول يوم يخلونك تبصم لفتح ملف في المستشفى وبعدها قياس طول ووزن ثم يكشفون على الصدر والظهر ويقولون رح
تجي من البكره
ياخذون تحليل دم وبول اكرمكم الله .. وتروح
تجي من البكره
تمر العيادات الباطنيه الجراحه عمى الالوان اذن وانف وحنجره و النظر .. ثم تروح
تجي من البكره
تسوي تحليل سموم وتروح يعلمونك متى المقابله او يرسلون لك رساله
==========
مرحلة المقابله الشخصيه
تجيهم في نفس مبنى القبول والتسجيل ,, معك الاوراق اللي يطلبونه على الموقع لما تجيك الرساله
يصير معك مثل ماصار في القبول المبدئي لكن زياده عليه
يعطونك ورقتين تعبيها وبعدها تدخل على المقابله الاولى يسألونك اهم لاترتبك ولاتتلعثم خل واثق من نفسك وارفع صوتك ..وبعدها تدخل على المقابله الثانيه ويسألونك كم سؤال ترى الدعوه تساهيل
وبعدها لاخلصت تروح غرفة البصمات يعطونك خطاب موجه الى الدله الجنائيه عشان تبصم ومن ثم يعطونك دفتر الالتحااق عشان تعبيه وتنتظر رسالة القبول النهائي ,, مثلنا
===========
ملاحظااات
بطاقتك لازم تكون معك في كل موعد
الجوال ممنوع عند مراجعة القياده
الصور والاوراق خل معك نسخ زياده عشان ماتتوهق
لاتشيل هم ان شاء الله الدعوه تساهيل
قبل لا انسى
انتم يمكن تكون اجرائاتكم نفسنا من خلال الايام والمشوره
ويمكن اذا كان العدد قليل تخلصون من بدري كل شي ...
=================
بالختااااام
اتمنى ان اكون وضحتلكم بما فيه الكفايه ,,ان احسنت فمن الله وان اسأت فمن نفسي والشيطان
مابي منكم الا الدعاء بالتوفيق وبالذات من والديكم وان اللي في بالي يصير
مع تمنياتي للجميع بالتوفيق
التعديل الأخير تم بواسطة محمدعويض ; 30-06-2011 الساعة 02:50 PM
|
العرض العادي
