السلام عليكم ورحمة الله وبركاته
قرأت موضوعك من البدايه وادري مالي علاقه بالموضوع ولكن الشيء اللي خلاني اتابع الموضوع هو ان اكثر زبائن الوموزين هم فئه النساء بحكم انهن يحتاجون له اكثر من الرجال ..
اشجع فيك روح الحماس والنشاط وحب العمل وواضح انك نشيط ماشاء الله من يوم قلت تحب الفرفره بالشوارع وللاسف هذه شغله( الفرفره بالشوارع ) اغلب الشباب في مجتمعنا السعودي يمكن من زود الفضاوه اخخخخخخخخخخخخ
واضح انك شخص محترم وتحب عملك وتحترم خصوصيات الغير وانا والله بامس الحاجة للوموزين لان ما يوجد عندي سائق خاص نظرا لظروفي الماديه والاجتماعيه ولكن اعجبني اسلوبك ولو انا من سكان الرياض كان تعاملت معاك على طول حتى لو براتب شهري ولكن ما اقول غير الله يوفقك ويرزقك الرزق الحلال ويعطيك خير هالسياره ويكفيك شرها
تقبل مروري وتعليقي وآآآسفه على الإطاله ,

أختكم : سن رايس

بــآكـ وآسـف ع التأخيــــــر،،

بعد ماخلصت من الرخصة العمومي رحت أدور على ورشة لتغيير لون السيارة من فضي إلى أبيض ونزلت للصناعية القديمة (مخرج 17) ولقيت أسعارهم تختلف من 1800 إلى 17000 وبما اني مابغى اتكلف كثير بالسيارة لقيت ورشة مناسبة تغير لون السيارة بـ 2000 ريال بس مايفك الفرشه والمراتب يعني رش خارجي فقط وفعلا اتفقنا وطلعت السيارة بعد خمــس أيام باللون الجديد الأبيض،
بعدين رجعت لمرور الروضة عند نفس المهندس اللي أخذت منه ورقة طلب تغيير لون سيارة وطلع معي وشاف السيارة وعطاني نموذج جديد وعبيته ووقع عليه وقال رح للحاسب الآلي
رحت للحاسب وطلبوا مني صورة للبطاقة الشخصية وصورة لتأمين السيارة وتسديد 50 ريال استبدال استمارة
طلعت وبحثت عن شركة تأمين تأمن أجرهـ بس تفاجات انه مافيه إلا شركة التعاونية هي الوحيدة اللي تأمن أجرهـ فقط؟؟
رحت لشركة التعاونية وطلبت تأمين أجرهـ قال الموظف سعرها 775 ريال قلت له اللي أعرفه ان سعرهـ بـ 625 ريال قال لا هذا السعر قديم الحين سعرهـ تغير ولاتستبعد يزيد أكثر قلت له طيب بكم التأمين الشامل، قال سيارة الاجرة مالها تأمين شامل!!
خلصت من التعاونية وأخذت بطاقة الـتأمين وصورتها ورحت لصرافة الراجحي وسددت 50 ريال ورجعت لمرور الروضة وعطيتهم أوراقي
بعد عشر دقايق عطاني الاستمارة الجديدهـ وتغير اللون إلى أبيض
استانست اني خلصت هالشغله بسرعه بس للاسف ماكتلمت فرحتي وصار لي حادث وانا طالع من المرور بصراحه انقهرت وجتني لحظة يأس بعد كل هالتعب ويصير لي حادث بس الحمد لله الحادث ماكان جامد.
رجعت لنفس الورشة وصلحت السيارة بـ 1500 ريال

بعدين رحت لادارة النقل عشان اكمل باقي الاجراءات وراح اقولكم وش صار معي

بعد ماخلصــت أوراقي ،، بقى عندي شي واحد وهو فحص السيارة لأنه من ضمن الشروط اذا مضى على الاستمارة سنه يطلبون صورة من الفحص،

رحت للفحص الدوري (طريق الدمام تقاطع شارع جابر بشرق الرياض) وللمعلوميه الفحص يداومون حتى يوم الخميس الساعه 7 صباحاً ،، أنا رحت لهم 6.45 صباحاً وماشاء الله لقيت الناس كلهم قدامي وانا احسب نفسي أول واحد بوصلهم

المهم افتحو البوابه وصفت السيارات سرا تمر بالسيارة على كبينه وتعطيهم 73 ريال للفحص وتمشي بسيارتك لين توصل داخل صالة يستلم عامل سيارتك ويختبرها بعدين يطلعها ويعطونك النتيجه اذا كان مكتوب اجتياز تروح تختمها من عند العسكري (يعني تقريباً الشغله يبيلها ساعه)

بعدين رحت لادارة النقل وأوراقي كلها كامله وعطيتهم الاوراق بعدين عطاني الموظف ورقة للتفتيش يشوفون السيارة تناسب الاجرهـ او لاتناسب بعدين عطوني خطاب موجه لادارة المرور طلب تحويل سيارة خصوصي الى اجرهـ

رحت لمرور الملز خلف مستشفى قوى الامن شارع صلاح الدين (الستين)

اخذت من عندهم نموذج وعبيته ويطلبون صورة بطاقة التامين وصورة للبطاقة الشخصية وصورة للرخصه العمومي وحطيته بملف بلاستيك (حسب طلبهم) وسددت 600 ريال استبدال لوحات ورحت للعسكري عطيته اوراقي بعدها عطاني الاستمارة الجديدهـ و خطاب موجه لشركات تجهيز سيارات الاجرهـ ورحت للضابط عشان يوقع الخطاب ويختمه

رحت لشركة جنب المرور وهي الوحيدة الموجودهـ يجهزون السيارة بـ 1200 ريال دخلت سيارتي عندهم وقال العامل فك اللوحات وجيب اللوحات الجديدهـ عند المرور
فكيت اللوحات ورجعت للمرور وعطيتهم اللوحات القديمه وعطوني لوحات جديدهـ فيها خط اصفر الخاصة بالليموزين
بعدين رحت لشركة التعاونية(موجود لهم مكتب في نفس المرور) وطلبت منهم يغيرون رقم اللوحات الموجوده بالبطاقة وعلى طول طلع لي بطاقة جديدهـ برقم اللوحات الجديدهـ
رجعت للشركة وركبو اللوحات الجديدهـ وجهزو السيارة بالاستيكرات والعداد بعدين عطوني خطاب موجه لادارة النقل عشان يعطوني رقم التشغيل
رحت للنقل وعطوني نموذج أعبيه وطلبو مني صورة للبطاقة الشخصية وصورة من البرنت وصورة للاستمارة وصورة شخصية واحدهـ
بعدين عطاني خطاب موجه للشركة مكتوب فيها رقم التشغيل
رجعت للشركة ركبو رقم التشغيل في خلف السيارة وختمو على الورقة ورجعت للنقل وفتشو على السيارة وشافو كل شي تمام بعدها عطوني كرت التشغيل

والحمد لله خلصت الامور كلها بدون ملل او كلل او تأجيل
وتوكلت ع الله في طلب الرزق
ارجو منكم الدعاء

وأي عضو حاب يسال او يستفسر عن اي شي او يبغى مساعدهـ انا جاهز للي يبغى

أرجو انكم استفدتو من موضوعي مثل ما أنا استفدت منكم،،

تحياتي لكــــم

أحييك على صبرك
الله يوفقك

صحيح اخوي مثل ما تفضلت ربما انت وغيرك من الشباب المحترمين اللي يدورون الرزق الحلال بعيدين كل البعد عن مثل هذه التصرفات المشينه ...
لكن للاسف فيه بعض اصحاب الاجره غير محترمين وقليلين أدب ومهما اقول عنهم ما اقدر اوفيهم حقهم من السب والشتايم ويستغلون ضعف و حاجة النساء وهم اللي خربوا على الطيبين واعطوا بعض النساء فكره مو زينه عن اصحاب الاجره السعوديين وهذا واقع وكثير من هذه المواقف السئيه للأسف تصير بين صاحب الاجره والزبائن النساء .. والله يصلح الاحوال ويهدي كل ظال .
اتمنى لك التوفيق في عملك والله يرزقك أن شاء الله الرزق الحلال .