السلام عليكم ورحمة الله وبركاته

أولاً الحمد لله على نعمة الأمن والأمان ، والحمد لله على اننا نعيش في دوله كل الامور فيها تساهيل والحمد لله على اننا في دولة فيها رزق وخير كثير ،

أحب اكتب لكم تجربتي في مشروعي الجديد واللي على وشك اني اخلص من اجرائاته وباقي بس اللمسات الاخيرة فيه ،

فكـرتي في البداية كانت سيارة اجرهـ ومثل مانتم عارفين الكثير من الشباب يفكر بهالمشروع بس مايعرف الاجراءات ولا يدري وش المطلوب ولا وين يروح ..

بقولكم بالتفصييل الممل اللي صار معي خطوهـ خطوهـ عشان يستفيد أكبر عدد ممكن من الناس ،، عاد تحملوني الله يعينكم علي


البداية كانت (الفكـرهـ)
بداية المشروع كانت فكرهـ راودتني اني اعمل مشروع ويكون لي مصدر رزق وبحثت عن مشروعي يناسبني خاصة انني مقيم بالرياض وجاء في بالي اكثر من مشروع ولكن ماكان عندي احساس انه يناسبني حتى جت فكرة الليموزين وشفت انها تناسبني اكثر خاصة اني احب (الفرفرهـ ) بالرياض واعرف الاماكن الاساسية بالرياض وحافظ شوارعها..

بحثت في النت عن ناس لهم تجاربهم بالليموزين وعن الاجراءات وبالصدفه طحت على موقع حلول البطالة وبصراحه استفدت منه كثير خاصة موضوع الأخ (اشتغل في كلش) على هذا الرابط https://www.btalah.com/t217617.html

المهم توكلت على الله وقلت خلاص قررت اني ابدأ باجراءات الليموزين بس وين السيارة ووشلون اقلبها ليموزين ووين أروح ؟؟

كل هالاسئلة تبادرت لذهني وصار يطلع فوق راسي علامات استفهام >>

وللمعلومية انا معاي سيارة أملكها سوناتا 2010 لونها فضي، صراحه ترددت اني اغير لونها إلى اللون الابيض عشان اقدر اقلبها اجرهـ بس مالقيت الا هالطريقة ولاموني عليها كثير من الناس بس كنت مقتنع بفكرتي،،

بعدين قلت خلني أتأكد من وزارة النقل واستفسر عن الاجراءات ،، اتصلت على وزارة النقل (اذا دقيت على الوزارة لا تيأس لانهم ماراح يردون ) وحولني الاستعلام لموظف بالادارة وكلمته واستفسرت عن الاجراءت قال راجع (ادراة النقل بمنطقة الرياض) قلت له وين موقع الادارة، قال (طريق القصيم بعد ماتتعدى الهلال الاحمر السعودي يجي على يمينك مطعم مكدونالدز على طول تلف بعدهـ يمين تلقاهـ على يساركـ) قلت له جزاك الله خير

توجهت لادارة النقل بمنطقة الرياض وبنفس الوصف بالضبط ودخلت الادارة وسألت عن تحويل سيارة لاجرهـ عطاني ورقه فيها الشروط ونموذج طلب تشغيل سيارة اجرهـ للفرد
وراح اكتبلك الشروط المكتوبه بالضبط:
1- استيفاء نموذج الطلب المرفق.
2- صورة من بطاقة الاحوال (ومستخرج بالمهنة من الاحوال المدنية أو صورة من دفتر العائلة) .
3- صورة الرخصة العمومي سارية الصلاحية.
4- صورة من الاستمارة او البطاقة الجمركية مع تعبئة النموذج الاقرار المرفق (للسيارة الجديدة).
5- صورة من الفحص ساري المفعول في حالة مضي سنة على الاستمارة
6- في حالة مضي خمس سنوات على موديل السيارة يتم عرض السيارة على اللجنة للكشف على السيارة.

بعدها تحمست اكثر وقلت توكلنا على الله خلنا نبدأ بالاجراءات ونخلص أمورنا بسرعه، فقلت في نفسي أول شي لازم اسويه أغير لون سيارتي الى أبيض، وتحويل اللون يتم عن طريق مركز المعلومات والوثائق بالروضة (طريق الحسن بن علي وانت جاي من خريص ثاني اشارة يمين تلقاها على يسارك)
رحت للمهندس وهو عسكري وقلت له بغير لون السيارة إلى ابيض عطاني ورقة طلب تغيير لون سيارة وعبيتها وطلع معي شاف السيارة ووقع على الورقة وقال رح للحاسب الآلي ،، رحت للحاسب عشان يعتمد ان السيارة ماعليها بلاغ ووقعت الورقة من المدير وختمها (بعشر دقايق تخلصها)

وقبل لا أودي سيارتي للورشة عشان يغير لونها، قلت خلني اطلع رخصة عمومي لاني يمكن أرسب ولا شي خابر نفسي ماحب الدراسة

رحت لمدرسة تعليم القيادة بالسلي وهنااااك راح تتعب شوي وبطول عندهم بس خلك صبور،،

الحين بريحكم مني وإن شاء الله راح اكملكم وش صا معي عشان اطلع الرخصة العمومي واجرائاتها خطوهـ بخطوهـ ،،

لـــي بــآكـ ،،

بالتوفيق إن شاء الله

الله يعطيك خير أخوي

ويرزقك من حيث لا تحتسب

* اجراءات استخراج الرخصة العمومي*

طبعاً بعد ماخذت ورقة من المرور لتغيير اللون (الورقة اللي تاخذها من المرور لازم تحتفظ فيها عشان ترجعها لهم بعد ماتغير اللون)

اتجهت إلى مدرسة تعليم القيادة ورحت للاستعلام ودار بيني وبين الموظف هذا الحديث
أنا: وش المطلوب لاستخراج رخصة عمومي؟
الموظف: أنت معك رخصة خصوصي؟
أنا: إي نعم معي رخصة خصوصي
الموظف: خلاص خذ النموذج وتعبيه وتجيب معك صورة من بطاقة الاحوال وصورة من الرخصة الخصوصي وأربع صور شمسية وتحطهم بملف اخضر وترجع عندي عشان أعطيك رقم تنتظر عند شباك 14 أو 15 لاختبار فحص النظر.

طلعت من عندهـ وعبيت النموذج وصورت البطاقة والرخصة وصورت اربع صور شخصية كل هذا بخمس دقايق باستديو تصوير خارج دلة

رجعت للاستقبال أخذت رقم وانتظرت تقريباً نص ساعة رحت للعسكري قال نظركـ زين قلت ايه قال طيب خذ الورقة هاذي حقت البصمات وارجع للاستقبال وتعال عندي على طول قلت طيب
رحت للاستقبال ووقع عليها وكتب بياناتي ورجعت للعسكري وختمها وقال رح للادلة الجنائية واذا خلصت من عندهم ترجع لنا قلت إن شاء الله

رحت للادلة الجنائية (موقعها صعب شوي ولكن اسهل وصف على طريق الملك عبد العزيز اذا وصلت كبري البطحاء تروح من تحت الكبري واذا وصلت الاشارة تلف يمين وثاني اشارة اللي عند الدفاع المدني تلف يسار تلقاهم على يساركـ) الساعة 8 الصباح مافيه لازحمه ولا شي بدقيقتين خلصت بصمت وعطاني موعد بعد أسبوع بالضبط

رجعت للادلة الجنائية بعد اسبوع وأخذت الورقة والحمد لله مافيه لاسوابق ولا جرائم ولا شي >> حتى التوقيف ماعرفه

ورجعت لمدرسة تعليم القيادة وبنفس المكان اللي عطاني ورقة البصمات رجعته لهم وحطه بملفي الاخضر وعطاني الملف وقال رح للاستقبال
رحت للاستقبال وعطاني رقم وقال انتظر عند شباك 21 او 22 او 23 طبعاً لازم يكون معاك 435 ريال لانك راح تسددلهم كاش وماعندهم شبكه
وصل دوري وعطيته الملف وسددت قيمة الرسوم 435 ريال وقال تبغى الدراسة صباح او مساء قلت كم الفترة يعني؟ قال الصباح من 7 صباحاً حتى 12 ظهراً والمساء من 12 ظهراً حتى 6 مساء ومدة الدراسة أربع أيام .
قلت خلها مساء قال خلاص وعطاني إيصال (لازم تحتفظ فيه) وقال راح يبدا دراستك من يوم السبت

رحت لهم يوم السبت عند قاعة المحاضرات وقبل لاندخل القاعة أخذو منا ورقة الايصال وطبعاً الدراسة أي كلام مش حالكـ يعني ،، وبعد العصر تمرين على وانيت (ددسن مقربعه ) طبعاً ممنوع التمرين على التريلا او الدينا بس وقت الاختبار.

المهم مرت الاربع ايام وفي اليوم الخامس كان الاختبار الصباح الساعة 9
وطريقة الاختبار عبارة عن شاشة كمبيوتر باللمس يطلع لك السؤال وثلاث اجوبه تختار باللمس الجواب الصحيح ولازم تجاوب 18 جواب صحيح من اصل 20 سؤال يعني اذا اخطأت بثلاث اسئلة راح يعيدون لك الاختبار بعد اسبوع
بعد ماخلصنا من الاختبار رحنا لاختبار القيادة وخلصناها بسرعه
بعد ماخلصنا الاختبار نادونا بالاسماء وعطونا ملفاتنا ورحنا للحاسب الآلي عشان يطبع الرخص بس قبل لاتعطيهم ملفك سدد 200 ريال للرخصة النقل الصغير.
وبعشر دقايق تطلع الرخصة العمومي

شغلتها طويله بس سهله يعني يبغالك اسبوعين عشان تخلصها .

وهاذي أول خطوهـ أساسيه خلصتها ،، وبعدها بكمل لكم باقي الخطوات ومنها تغيير لون السيارة وانهاء اجراءاتها وتغيير الاستمارة

لــي بــآكـ

الله يوفقك ياغالي :
انا مثلك لاكني خلصت ضرب البوية بقي لي اعرض السيارة على لجنة في الفحص الدوري يوم الثلاثاء لان موديل سيارتي مر عليه تقريبا 5 سنوات اما سيارتك ماعتقد يلزمها ها لخطوة ماشاء الله :

انا الان بسأل كم تكلفة العداد مع الستكرات والفانوس ؟ ومابي شركة تكون غالية وتوهقنا باستغلالهـا للموقف "
وانا احد متابعيك وفالي وفالك وفال الجميع الخير ....

متابع موضوعك

الله لايهينك كم مدة مراجعة المرور عشان تغير ملف السيارة من خصوصي لـ ليموزين
لأني قد شريت سيارة جديدة بإسم اخوي وخلصتها في يومين

لكن اللي بيشتري سيارة خصوصي مستعمله ويبي يعدلها ليموزين يقولون تبطي اجراءات المرور وفيه ناس يقولون تاخذ شهر مدري كلامهم صح ياليت تفيدني اذا عندك فكرة عن الموضوع