للشاعر
زياد زيد البقمي
يامكثر اصحابك ان كثـرة دراهمـك
وياقلهم لو يصبـح الجيـب خالـي
لو بار فيك الوقـت والفقـر داهمـك
باروبك اللي عندهـم كنـت غالـي
لو كان طيب عندهم تنـزل اسهمـك
ويصبح لك رضاهم صعيب المنالـي
سيـد العـوارف والاوادم تغاشمـك
صاحي وحطوا فيـك مثـل الهبالـي
ماحد(ن) تقبـل منـك والا تفهمـك
الله يعيـنـك لا جفـتـك الليـالـي
تلقى الجفا من وين مارحت لازمـك
وقعت وانهال بـك المكـان الهيالـي
اطلب رضا ربك عسى الله يرحمـك
والا رضـا المخلـوق ياهمـلالـي
وان كثر مالك صرت طيب وماشهمك
وكل(ن) يحطك صاحب لـه موالـي
لو كان ماخبل منك بالطيب رهمـك
ويحطلـك هيبـه ومنزلـك عالـي
وتصير شيخ ويمدحونك هل النمـك
ويصير راسك فوق روس الرجالـي
والكـل بحـزام المراجـل يحزمـك
ماباقي الا تصيـر صاحـب معالـي
والناس بصـدور المجالـس تقدمـك
ودقاق هرجك صـار كلـه جلالـي
كل(ن) على مقـدار مالـك يقيمـك
ماهمـهـم حــرام والا حـلالـي
علـى قـدر مالـك تغيـر معالمـك
مقـدارك امـا تحـت او بالعلالـي
واللـي يطبلـك ودايـم يعشـمـك
ماينفعك لـو صـار بـدرك هلالـي
ليتك تواضع لـي دقايـق واعلمـك
وقـت الشدايـد يقصـرن الحبالـي
لا ثقل حملك ويـن منهـو يقاسمـك
شيـل الحمـول الكايـدات الثقالـي
مير التزم حبل اللي يقـدر يسلمـك
الواحد اللـي مـال حكمـه زوالـي
هو ليه لوجيـه المخاليـق ماكرمـك
ولوجـه ربـي ماتفـك الريـالـي
ربي عطاك ويقدر اليـوم يحرمـك
اكـرم لوجهـه ياكريـم السبـالـي
واترك حياة الزمك ماينفـع الزمـك
قـدام صافيهـا يـعـود حثـالـي
كثروا اصحابك يوم كثرت دراهمـك
وياقلهم لو يصبـح الجيـب خالـي
لو بار فيك الوقـت والفقـر داهمـك
باروبك اللـي يتبعـون الريـالـي
07-11-2007, 05:48 PM
العرض الشجري
