[align=center]
[align=justify]
بسم الله الرحمن الرحيم
في هذا الصباح المشرق قمت بجولة في صناعية العاصمة وكانت جولة جيدة بالنسبة لي
وسأروي لكم الحكاية بعد ماأتحدث قليلآ عن معاناتي وبعدها سأتطرق للحديث عن جولتي .
شاب سعودي من هواة الميكانيكا فشلت في الدراسة بسبب الهواية ولو كنت أعلم أنني في بلد
لايقدر سوى هواية كرة القدم لأشتريت كرة قدم في صغري ولم أفكر في شراء عدد يدوية
بدأت المعاناة بعد خروجي من المدرسة والعصيان بعدم العودة أليها وأتجهت لممارسة هوايتي
الميكانيكية حتى أصبحت ماهر جدآ ونصحني أحد الأخوة ذات يوم بالتوجه إلى سوق العمل ولم
أترك سبيل وطريق الا سلكته دون جدوى ، أولى الخطوات ذهبت الى شخص في الصناعية يقوم بتأثيث ورشته الخاصة ( شخص سعودي طبعآ) وطلبت منه العمل بعد أفتتاحها فأجابني عندي 5 فيز من الفلبين ولا يوجد مكان لعامل آخر .
أتجهت بعدها إلى شخص آخر وسألته العمل فأجابني أنت سعودي وتقهقه فأجبته بالفم المليان نعم ( بكل شموخ ) أنا سعودي وأنت ؟؟ أجابني بشموخه الخاص اللذي أعتلى شموخي وأجابني وقال :
أنا سوري والآخوان من اليمن الشقيق - والنعم فيكم - واجاب مرحبا خيو بدنا عامل لمدة شهر لبين ماييجي أبن خيي من سوريا فأزا بدك حياك .
وافقت على العمل معهم براتب 900 ريال بدأت العمل وقلت أحسن من الجلسة في البيت وأكسب خبرة في بعض المركبات اللي ماأشتغلت عليها من قبل .
فعلآ بدأت من اليوم الثاني وحطني المساعد الخاص له وكنت أفك الجيربوكس وأنا مبسوط وأذا جيت أوضبه يجي ويقولي روح جيب مفتاح 14 ويطلب مني أقرب له المفاتيح وأنضف القطع فقط
بحجة أني ماأعرف أوضب ، وكان يهمشني في كل شيء واذا كان فيه شغلة حساسة يصرفني أجيب مفتاح 14 عشان ماأتعلمها ، أنتهى الشهر وأنا ماأستفدت منه الأ أنني عرفت ان لمفتاح 14 أكثر من ثلاثة أنواع وأنا ماأعرف الا نوع واحد مختوم ومفتوح فقط .
تركت العمل ونصحني أحد الأخوه بالذهاب الى مكتب العمل وأختبر عندهم وبالشهادة أقدم على قرض مهني وأفتح ورشتي الخاصة ، توسدت وسادتي وقبل النوم بنيت قصور من الأحلام وتخيلت نفسي مدير في مركز وأنافس السوري ابو مفك 14
اليوم الثاني رحت مكتب العمل وطلب مني 4 صور شخصية وملف علاقي وحولني على المعهد المهني لأجراء الاختبار وفعلا اختبرت وأخذت شهادة ميكانيكي أول .
أخذت الشهادة وأنا أقبلها تارة وأحضنها تارة وأتجهت الى الغرفة التجارية وسألتهم عن الصناديق ونظام التقديم عليها ونصحوني أروح اقدم على صندوق المؤوية بحكم أنه مايطلب كفيل وأنا رجال مأحد يكفلني .
كلمت الصندوق وقدمت عن طريق موقعهم وأرسلولي اليوم الثاني موافقة وطلبو مني دراسة جدوى وفعلآ صلحتها وأرسلتها لهم ، وكل يوم أتصل عليهم مستعجل أبغى ابدى مشروعي وأستمر الوضع 5 أشهر بعدها قالولي عندنا تحديث بالموقع أرفع لنا الدراسة مره أخرى ، استعنت بالله ورفعت الدراسة مره أخرى ، وأنتظرت 3 أشهر بدون نتيجه ولما أسأل خدمة العملاء عن مقر الصندوق تقولي الأخت اللي ترد عليه : ماتحتاج مراجعتهم بيدقون عليك .
بحثت لين لقيت موقعهم ورحت أقدم شكوى ، دخلت وشرحت قضيتي ، قالولي الحين نسويلك المقابلة الشخصية ليش ماجيتنا من الأول << هههه
سويت المقابلة وقالولي مقبول روح وندق عليك ، رحت وتابعت على الموقع حتى كتبو لي بالموقع ان المعاملة حولة للتجهيز .
وبعد تحويلها للتجهيز بفترة شهرين دقو عليه قالو نبغى برنت من التأمينات ، رحت جبت البرنت وقالو خلاص بندق عليك لكن ترا نطلب منك كفيل !!!!!!!!!!!
كيف يالربع تطلبون كفيل وانا قدمت بشروط ان مافيه كفيل ، قال انت مقدم على النظام القديم ومايشملك لأنك ماوقعت عقود الى الآن ، بحثت لهم عن كفيل بالغصب لقيت وقبلوه ، وقالو خلاص روح وندق عليك والى الآن المعاملة في التجهيز والكفيل جاهز ومادقو عليه ، وأصبحت المدة كاملة من يوم قدمت على الصندوق الى الآن قرابة سنة وأربعه أشهر وأنا صابر ومحتسب وأتمنى يجيني القرض المأمول وأبدا مشروعي ........
أعود بكم لسالفة الصباح المشرق وصناعية العاصمة ، رحت اليوم بتاريخ 10 ربيع الأول 1432 هـ وبحثت عن ورشة تأويني ألين يطلع قرضي . وأتجهت لأول شخص قال مافيه ثاني شخص مافيه .
رحت لصديق لي فلبيني دايم اصلح عنده سيارتي قلت تكفى ، قال والله ودي لكن انت عارف نظامنا نشتغل بالنص وصاحب الورشه مطوع ماراح يرضى يشغلك معنا < قلت المطوع وغيره رافضين .
ساقتني الأقدار لورشة حولها عامل وقفت عنده قلت صديق انا ميكانيكي وابغى عمل قالي راعي الورشه جوه بالمكتب قلت سعودي ؟ قال ايه : قلت كويس على الاقل ابحرجه لاشافني سعودي وراح يتقبلني .
دخلت سلام عليكم السلام كيف حالك ، ياخوي انا رجال ميكانيكي ولي باع طويل في الشغله ممكن عمل ؟؟؟
قال حياك الله نقدر الشباب السعودي الطموح < كفو ياذيبان هذا اللي بيشغلني
بعدها دق تلفونه وأستاذني ورد على خوية اللي فهمته من كلامه انه هذاك صاحب مكتب ويجيبله عمال والرجال ناقصه عماله ، قاله الرجال حولك عطنية باكلمه هو يفهم عربي ؟؟
كلم العامل وأتفق معه بـ 2500 ريال والعمل فترتين < وانا أراقب قلت اجنبي عطاه 2500 أكيد انا بيعطيني 3000 وبدون مايتفاهم معي .
خلص مكالمته قال يا أخي أحنا نظامنا نعمل فترتين قلت أعرف هالشي ، قال تعرف توضب الماكينة قلت أيوه ، قال اي نوع من السيارات ؟ قلت الأمريكي والياباني فقط ،، تنحنح قالي اهااا
طيب تعرف توضب القير الأوتوماتيك ؟
بغيت اجيبله سالفة السوري ابو مفك 14 وأستحيت .
قلت لا والله بس أعرف افكه واركبه لكن توضيب ماعرف .
قال والله مثل ماتشوف الورشه مليانه عمال وناقصنا فقط عامل توضيب قير تماتيك وبما أنك ماتعرف والله ياخوي << قاطعته قلت عادي وانا اخوك الشغله مافيها أحراج الله يرزقكم
قال أذا انت قصدك تكتسب خبرة حياك الله تعالني بالفترة المسائيه لكن الراتب اسمحلي والله مثل ماتشوف عمال عندنا كفاية لكن اقدر اساعدك تعمل معنا اذا تبي خبره فقط . < يعني افهمها اشتغل بلاش .
خرجت من عنده وأنا أفكر في كلامة وترحيبة بالبداية وتغير لهجته بعد التلفون والـ 2500 اللي بيعطيها الميكانيكي اللي بالطريق .
والأعذار اللي قدمها لي ويقولي حياك اكسب خبره مجاني .
لاتعليق .....
الآن وكلنا نعلم أن الصناعية مليئة بالعمالة الأجنبية وياليت السعودي صاحب الورشه جالس على راسهم ويحاسبهم ويعطيهم رواتب ، لكن العكس ، اهم يعطونة راتب واهو جالس بالبيت فأي راتب يتقاضاه ، مبلغ بخس قرابة 3000 ريال يشترون فيه أسمه اللي على اللوحه ، وأقل مركز صيانة يطلع بالشهر 30 ألف بالميت اذا ماأشتغل .
ليش مايكون فيه نظام لسعودة ورش السيارات ؟
ليه مايكون فيه قرض لكل خريج معهد يستلمه بعد تخرجه ؟
بتقولون فيه ؟
صح فيه لكن بعد مايطلعون عينك بعدين تاخذه وانت كاره الشغله وتكون ردة فعلك اجيب كم عامل واسلمهم الورشه ويعطوني مبلغ وانا راقد .
أقسم لكم ياشباب أني اعرف ورشة سيارات فيها 10 عمال غير نظاميين بوسط الرياض وهذا مثال لمئات الورش .
الله يرزق المسلمين ، لكن أنا لي حق أيضآ ماأرضى أنه يهضم !
أنا أفك القطعه أنظفها وأذا تتصلح اصلحها وأوفر على صاحب السيارة مبلغ شراء قطعة جديدة .
أنا أركب بأمانه وأعمل في السيارة وكأنها سيارتي لأني أسوي حاجة تخدم بلدي وولد بلدي وأبغى أكسب أحترام الشخص اللي وكلني على سيارته .
الأجنبي مايخفاكم ، يفك القطعه ويطلب قطعه جديده ويركبها حتى لو كانت الأولى تتصلح أهم شي يوفر على نفسه الوقت عشان يستقبل سيارة ثانية ويجمع أكبر مبلغ يقدر يشيله ويروح بلده ومافكر فيك ولا في غيرك
.
تجي عنده سيارتك فيها بواجي ، يقولك يبغالك تصفية ، التصفية تدرون وش ؟
تغيير بواجي ، تغيير أسلاك بواجي ، تغيير أصلاح كربريتر ، أو أصلاح بخاخات اذا كانت السيارة بخاخ .
ثلاث شغلات عشان ايش ؟
عشان يضمن انها تتصلح لانه ماعرف يحدد مكان العطل الحقيقي .
والسعودي مفهي مع أحترامي للمصطلح .
من المسؤول ؟
تحياتي يامكتب العمل .. وشكرآ ياحماية المستهلك ، وأرق تحية ياوطني العزيز .
(ميكانيكي مغترب في بلدة )
وشكرآ
[/align]
[/align]
15-03-2011, 12:27 PM
قصة معاناة ميكانيكي مغترب في بلدة ( قصة طويلة اللي ماراح يقراها كامله لايدخل )
<تحمست
العرض العادي
