السلام عليكم ورحمة الله وبركاته
مشكلتي بختصار انا ام لطفلين اعمارهم 3 و7 الله يصلحهم مطلقه واعيش في بيت العايله والدي ووالدتي وفي نفس البيت 2اخواني متزوجين ومعاهم اطفالهم اقل واحد عنده 4 اطفال والبيت شعبي مكسر حالته حاله وضيق مررره يعني كل واحد من اخواني ماخذ غرفتين وحده للنوم ووحده للعيال
ومن ضمن الغرف المجللس وواحد بنى فوق البيت غرفتين وحمام تكرمون بس ماقدر يكمل بناء لان البيت مايتحمل كله طوب وخشب مافيه حديد والوالد قالهم لو سويت غرفه زياده بيطيح على روسكم اصلا اقسم بالله البيت من كثر موو قديم ومهرهر يهتز اذا مشينا فيه حتى اساس مافيه الجدران تهتز والله يشهد على كلامي هذي مشكلة بيت اهلي ضيق زحمه مكسر وشعبي حتى النوم مااتهنى فيه اخاف يطيح على روسنا هذي اول مشكله المشكله الثانيه اطفالي مالهم غرفه ينامون معاي بغرفتي وهالشي كان عادي لانهم اطفال بس بعد ماكبروا ضاقت علينا الغرفه خاصة انها 3 في 4 وفيها كل اغراضنا الكبتات والالعاب والمكتب حق ولدي الكبير الي يدرس وكتبه والعابه المهم الغرفه لاتؤهل للعيش ومصيري اطلع منها لان اطفالي يكبرون ويحتاجون غرف مستقله وحياه نظيفه ومرتبه
خاصة اني مرتاحه ماديا ماشاءالله وراتبي صحيح مو ذاك الزود بس مغطي مصارفينا ويعيشنا عيشه كريمه افضل من هذي الحمدلله على كل حال
قبل كم يوم خطرت ببالي فكرة اني استاجر شقه واطلع بطفالي فيها عندي سياره مستعمله تمشي الحال وسواق فكرت بشكل جدي اني اخرج بس ياترى كيف افاتح امي وابوي في الموضوع علما اني كلمت اخواني وماصدقو وكأنهم يقولون من اووووووووووول
وانتو بشكل عام ايش رايكم هل رح اواجه عقبات بحكم اني لحالي رغم اني قويه ومعتمده على نفسي في الحالتين سواء لحالي او ببيت اهلي ومااخاف من شي الا من الي خلقني يعني اقدر اعتمد على نفسي واعيش لحالي بس احتاج رايكم يمكن فيه صعوبات انا مااشوفها اتمنى تنصحوني وتوجهوني
واهم شي كيف افاتح امي وابوي؟؟؟
وزوجي لاتعلقو عليه لانو في الامل من سنه ونص ومو داري بالدنيا يعني اتمنى ماتطرونه خلونا في صلب الموضوع
اسفه طولت

اختي ردة امك وابوك لو فاتحتيهم بالموضوع وشلون بتكون؟؟ لو تقبلو الموضوع شوفي اى شقه وتكون قريبه حيل منهم وعلى قدك انتي وعيالك ولاتشيلين هم الله معك اقوى من الجميع وماعليك من ردت اى كان من الناس الاهم والديك وفاتحيهم بالموضوع بدايه من عند بيتنا ضيق وعيالي كبروا وانا راتبي يكفيني

لا تأزمين نفسك

ادعي ، واستخيري

وفاتحيهم بأسلوب لطيف .. ولو تقدرين تاخذينهم يعيشون وياك .. ( مادري على حسب وضعكم )

وقولي ابدور شي حولكم .. ولا رح ابعد عنكم ( ممكن هالنقطة يخافون منها )

ابدأي بداية وحياة جديدة .. متوكلة على الله

وطوري نفسك عشان العمل .. وممكن تفكرين ف بزنس صغير ( شغلة تتقنينها ولا تكلف )

عشان تزيدين الدخل .. وتكفلين حياة كريمة لك وأولادك الحين ومستقبلا ..

بسطي الأمور وهونيها .. والله يسهل أمرك ويجعل لك بكل خطوة سلامة ونجاح دايم ..

بالتوفيق الدائم حبيبتي

انتي موظفة ؟

قوي قلبك وفاتحي أمك وأبوك في الموضوع .. وان شاء الله مايمانعوا
استأجري شقه تكون قريبة من أهلك ..

وربي يحفظك ويحفظ لك عيالك ويهديهم ويصلحهم لك ويعوضك فيهم يآرب


الله يسهل أمورك

صعوبات انا مااشوفها اتمنى تنصحوني وتوجهوني
واهم شي كيف افاتح امي وابوي؟؟؟
وزوجي لاتعلقو عليه لانو في الامل من سنه ونص ومو داري بالدنيا يعني اتمنى ماتطرونه خلونا في صلب الموضوع
اسفه طولت

اذا كنتى تبغى الحياه الصعبه اطلعى السبب

1- بتكونين هرجه 2- هدف لكل لمن تسول له نفسه حتى لوكنتى قويه لان فى مجتمعنا الرجال عيبه

فى جيبه والمر تعيب اهله وقبيلتها

لانى اعرف قصه حرمه بنفس التفكر غير جابت اخوها معها فى البيت لانها تعرضت لاشياء؟؟؟؟؟؟

[align=right]عآدي مشششكلتك مآفيهآ شششي,,

آنتي قلتيهآ بنفسسسك قويه ومعتمده على نفسسسك مآشششآء الله آلله لآيضرك ^^[/align][align=right]
كلمي آمك وآبوك وآن شششآء آلله مآيمآنعون تسسسكنين بروحك آنتي وعيآلك ,,

الله يحفظلك عيآلك ويخليهم لك ويعوضك خير يآقلبي ,,[/align]

الله يكون بعونكـ يااارب000
انتي فاتحي امك وابوووك وحاااولي تقنعيهم باي طريقه واذا قدرتي تاااخذينهم معااااك يكون افضل
يعني بما انك موظفه حاااولي منيه مناك تجمعين مبلغ او قرض بس انك تاخذين اهلك وياااك
لان امك وابوك نفس الشي خايفين عليك مثل منتي خااايفه ع عيااالك
والله كل شي بهالدنيا يدور
والدينك هم اهم شي
والله يوفقك ويسر لك امووورك وان شاء الله تفرحين بعيالك ويقدورن هاللي سويته عشااانهم
دربك خضر يالغلا000
طمنينا عنك

اسال الحي القيوم ان يفرج همك اختي ,,,

وبصراحه رائئ لو تقولين للوالد والوالده وتاخذينهم معك لشقتك هذا افضل ..
ويرتاحون من الرعب والخوف اللي عايشينه كل يوم ,,,,
ومن حقك تطلعين وانتي مطمئنة لان بصراحه احس مستحيل هالعيشه تنطاق مثل ماقلتي بوصفك..
لكن مسالة انك قوية وتقدرين تتحملين ماشاء الله عليك يعجبني هالشي فيك لكن
مستحيل مستحيل هالشي لابد يوم من الايام بتحسين بالضعف مابي اهبط من عزيمتك لاني احب الانسان القوي بكل شي والقوي الله سبحانه ..
لكن بحكم معرفتي لزميلتي بالعمل قريبة من مشلكتك مطلقة وتعمل ومستاجره شقةلها ولعيالها لكن كل يوم عايشه برعب الين اخذت اخوها وامها معها وربي ماشاء الله عليها عن الف رجال بكل شي بحياتها لكن حست بالضعف ,,,
وانتي الان قاعدة تقوين نفسك وهذا شي حلو بصراحه ,,,
وبعدين كلام الناس حتى لو تقولين مايهموني لكن اذا رجعنا للواقع مهم اهم شي ماترك لاحد فرصة يتكلم فيني بشي ,,,
وبعدين مشكلة اخر الليل لو يتعبون عيالك لا سمح الله صدقين فيه اكثر من سبب ماتقدرين تعيشن لوحدك ,,
فافضل حل هو انك تقولين لاهلك وتاخذين الوالد والوالده معك ..
منه يسلونك وتطمني عليهم ومنه يكون وراك سند باي وقت تحتاجين لاحد ,,,
صدقيني هالكلام ماقلت الا من اللي شفته بزميلتي ,,

اسفه ع الاطاله واتمنى ماتاخذين بخاطرك مني ,,,

واسال الحي القيوم ان ييسر امورك ويرزقك الخير حيث ,,
موفقه ,,,

لاتسكنيين لوحدك حتى لو انك قويه
فاتحي امك وابوك انك بتستأجرين شقه او حتى بيت يكفيكم وبما انك مقتدره ماديا قوليلهم انك بتدفعين الايجار
وحتى لو قالوليك لا حاولي مره واثنيين وثلاثه الانسان بعيش مره وحده في العمر وحاولي تدورين بيت وقوليلهم لقيت وخليهم يشوفونه يمكن يغيرون رايهم تر السمع مو زي الشوف
الله يفرجها عليك وعلينا