أين نحن يامعلمي و معلمات المدارس الأهلية من هذه المكرمات ؟؟

معلمات خريجات جامعيات و فوق هذا سعوديات ،، و رواتبنا 1500 ريال ،، و ضغوط حصص ، و كرف لا يحتمل ،، كل هذا و أكثر ،، و في الأخير مالنا نصيب من هذه الزيادات أبد ...
وين الرقابة على ملاك المدارس الأهلية يانااااااااااااس ..
و الله ظلم و اجحاف بحقنا .. و الله بكيت فرحة لما اعلنت هالقرارات ،، بكيت فرحة لما شفت مليكنا يخاطبنا و يقول أبنائي و بناتي ... وفي نفس الوقت بكيت قهر و ألم و مرارة و ظلم لأني اعرف إنه ماراح توصلنا حقوقنا ...
من الأوامر إن الحد الأدنى لرواتب القطاع الخاص يكون 3000 ريال ...
احنا وين و هالثلاثة آلاف وين ؟؟ الله يستر بدال مايصرف لنا مثل غيرنا راتب شهرين شكله راح يخصم مننا راتب شهرين ...
يعني بالعقل العاطلين الباحثين عن العمل راح يصرف لهم 2000ريال كمكافأة شهرية و احنا اللي نكرف بهالمدارس و نتعب و اللي تترك أطفالها الصباح و اللي شغلها ما ينتهي بالمدرسة و تكمله بالبيت و تقصر في حق نفسها و بيتها و زوجها و عيالها 1500 ريال ،،
أنا بصراحة أفكر اترك التعليم و اجلس عاطلة ويصرف لي 2000ريال و أنا مرتاحة و نايمة و ماكلة وشاربة في بيتي و لا أروح أتعب و في الأخير مافيه تقدير ...
احنا طاقات صدقوني و الطاقة إذا ماحصلت دعم و اهتمام و مراعاة صدقوني راح ننتهي ...
يعني لا زيادة راتب و لا مكافآت شهرية ...
يقولون إنه اجباري على ملاك المدارس إدخال الموظفين في الموارد البشرية ،، هذا الكلام سمعناه من سنين وسنين و حفظناه أكثر من أسامينا بس ماشفنا شي ،، لا احنا مسجلين في التأمينات و لا في الموارد ،، لا يكون احنا مو سعوديات ،،،
صدقوني ما نزلت هالموضوع إلا من القهر اللي حسيت فيه ..
الكل بادر و طبق هالأوامر الملكية ماعاد المدارس الأهلية ،، و أنا استثني قلة قليلة من ملاك المدارس طبقوا هالأوامر بارك الله فيهم ...
بس احنا اللي ما أحد شايفنا شي ،، من يوصل كلمتنا ،، من ينظر في أمرنا ،، من يهتم لنا ،،، ما نبي مكافأة و ما نبي شي نبي على الأقل تقدير نبي شوية اهتمام ،،
يعني لا إحنا طايلين وظائف حكومية و لا تعاقد و لا بديلات و كلها بالواسطات و الله واسطات إلا من رحم ربي ،،
يقولون ارسلي برقية للملك الله يحفظه ،، أنا لو قادرة أوصل كان رحت و ماانتظرت ،،
هذا حالنا و حال كثير من موظفي القطاع الخاص ( حراس الأمن ، الكاشير ، و غيرهم و غيرهم الكثير يعانون )
أتمنى كلامي هذه يوصل للمسؤولين و ينظروا في أمرنا ...
أتمنى كلامي ما يوصل وبس و ينتهي أمره ،، لا ،، أبي اجابات شافية لسؤالاتي ،، أبي رد يرد الأمل في نفسي و في نفس كثيبر من المعلمات ...