صدقت يا عبدالرحمن يوم تقول
((هي اقعدو في العافيه))

بعد التحية لكل الاعضاء,,,

مكتب العمل بالرياض نظامه تقدم عليهم تعبئي الاستمارة وترفق صور الشهادات وتأخذ موعد بعد عشر ايام من تقديمك يكون موعدك فالغالب تجئ الساعة 8:00 صباحاً وتتنظر الين يجي دورك وكل شخص على حسب مؤهلاته ابتدائي-متوسط-ثانوي-دبلوم-جامعي.
وفيه كذا شخص اعرفهم واثق فيهم راحو لمكتب العمل وحصلوا وظائف ...
((بس الواحد مايتشرط)) .
الوظائف متوفره عندهم في جميع التخصصات ويخلونك تختار....

والله يوفقنا واياكم......

أناقدمت على مكتب العمل ووعدوني اراجعهم بعد اسبوع .. ولما جيتهم قال لك وظيفه؟!

فرحت وقلت بس جاك الفرج .. هاه فين الوظيفه .. قال هذي في مصنع غذائي في الصناعيه

وهذا رقمهم اتصل شوف فين موقعهم ؟؟ .. قلت طيب كم الراتب .. ( قاعد اتخيل 5000 - 4000 )

قال لي ما يزيد عن 2000 ريال .. قلت لا حول ولا قوة الا بالله .. ولما جيت رايح قال مو اكيد يقبلونك !!!

انقهرت ورميت الورقه وقلت يازين النوم بالبيت .. ( مع العلم اني احمل بكالريوس علوم أحياء دقيقة ) .

بما انه اول مشاركه لي حبيت يكون هنا ردي...

اخواني واخواتي .. بخصوص مكتب العمل .. كل موظف يخش الوظايف الزينه لقرايبه او اصدقاءه.. انا عشت هالتجربه وبكون صادق وامين معاكم لابعد الحدود..

انا قدمت على اكثر من قطاع ولم يتم قبولي على قولة نتصل عليك بعدين..

في بنك الراجحي قبلوني وظيفة خدمة عملاء .. قالوا ولكن بعد اختبار ومقابله شخصيه قلت زين.. سوولي اختبار كمبيوتر وعديته بامتياز .. اتصلو علي قالو مبروك تم تجاوز الاختبار بامتياز ,, تعال اليوم الفلاني فيه مقابله شخصيه بعدين تتحدد كل شي .. قلت زين ..

جيت وسويت كل اللي علي مع العلم ان تخصصي ادارة واكثر من مقابله شخصيه سويت وتوظفت في اكثر من قطاع ولكن ما عجبوني فقلت يلا قطاع البنوك مناسب ...

بعد المقابله واحد منهم قال انتظر مننا اتصال.. قلت زين .. انا وقفت برى ابي اكلم احد الموظفين.. لان اللي عملو لي المقابله خمس موظفين في مكتب واحد..

انتظرت برى شوي ولا يطلع واحد من الموظفين ياعنده شغل او مدري وش عنده بس وقفته سلمت عليه .. وقلت له اخوي انا ابي الكلمه الوكيده انا جاني اكثر من عرض ولكن من بنوك غير اسلاميه.. وانا متمسك فيكم لان بنك الراجحي اسلامي.. قال ماعليك انت عديت المقابله بنجاح وخذها مني بيتصلون عليك.. حتى خويه قبل ما اطلع قال انتظر مننا اتصال باذن الله..

قلت على خير.. انتظرت يومين ثلاث.. ماجاني رد.. اسبوع اسبوعين.. اتصل عليهم ما احد يرد.. قلت يلا احمل نفسي واروح لهم.. قلت صار معي كذا كذا . قالو مع الاسف كل اللي تم قبولهم بعد المقابله اتصلنا عليهم والحين مداومين دورة اسبوعين بعدين يستملون اماكن وظائفهم..

والله ثم والله ثم والله ... اني قدمت على البنك العربي وقبلوني .. بعد اكثر من مقابلة شخصيه وانجليزي وعديتها بسلام .. لدرجة انهم قبلوني بدون اي اختبار.. وريتهم الدورات اللي عندي والمهارات والخبرات..
يعني مع الاسف صارت البنوك الغير اسلاميه تقبلنا مثل السلام عليكم .. والاسلاميه يطنشونا..؟؟

عموما غيرتي على ديني حتمت علي اترك هالعمل وقلت ان شاء الله ربعي يعوني بخير منه.. تركتهم واتصلت على مكتب التدريب التعاوني في الكلية.. قلت ابي وظيفه مانزلت عندكم وظايف.؟؟

قالوا لا .. قلت مالي الا اشغل حركات الفيتامين واو .. يعني الواسطه.. اتصلت على مدير ادارة شئون المتدربين في المؤسسة.. يعني له سلطة حتى على التدريب في الكلية.. شرحت له الوضع .. قال ولا يهمك تعال بكرا .. رحت له وقعدت معاه سولفت شوي معاه .. قال رح الحين للكلية .. وادخل على المدير حق التدريب بدون اي موعد.. قوله انا فلان وهو يدخلك.. وربي رحت السكرتير قعدني وماطل فيني .. قلت له ابي المدير ضروري مستعجل انا.. قال مشغول الان.. قلت قوله فلان وماعليك قال اصبر.. كلم المدير بتلفونه .. ومدير وش قاله .. وربي انه فز من الكرسي وصافحني وقالي اسف على التاخير .. ودخلني .. والمدير وقف بوجهي .. سولف شوي معاي وقال وش تبي الحين.. قلت ما ابي الا خطاب لاي مكان اتوظف فيه .. قال اعرف واحد بمكتب العمل برسلك له وانت روح له وهو يعطيك الوظيفه اللي تبيها.

رحت لمكتب العمل .. وقابلت ذاك الرجال.. وربي وربي وربي وبكل امانه .. بدون لا موعد ولا هم يحزنون.. قال هذي الوظايف اللي عندنا اختار وظيفه تناسبك.. حاطها في ملف وخاشها بالدرج.. اما الوظايف مش حالك حاطها على المكتب عشان لااحد جا خلاه يختار منها .. ولازم موعد ومرمطه..

رحت توظفت .. وظيفتي حلوه .. ولكن والله تضايقت قلت فيه ناس احق مني.. خاصة ان مجال الوظيفه غير مناسبه لتخصصي.. قلت اتركهم واشوف شي مناسب..

اتصلوا علي البنك .. بنك العربي . قالوا وراك تركتنا.. قلت بصراحه شغلكم حرام وانا ما احب الحرام.. اغروني.. قالو نحطك على التداول .. الخ .. ونعطيك راتب اساسي 6000 مع البدلات كل سنه توصل ال30 الف ومع اجازات وحجز طيران وتامين .. ومع مكافأه كل ثلاثة اشهر.. قلت الله يبعدنا عن الحرام ياخوي وشوفو موظف مناسب غيري..

اتصلت على بنك البلاد.. وكلمت احد الاخوان .. وشرحت له الوضع.. قال وش مؤهلك .. علمته .. قال انت سجلت بالموقع.. قلت ايه من زمان .. قال خلاص سجل الحين مره ثانيه واكتب رقم البطاقه اي رقم ثاني واتصل علي وقول انك سجلت ..

ما ابي اطول واضح من كلام الرجال انهم يطنشون اللي يسجلون عن طريق الموقع.. يعني عندك واسطه تسنعت ماعندك واسطه الله يكون بعونك..

قلت يلا بنشوف لنا واسطه على الاقل هذا مجال عملي .. اتصلت على واحد من الجماعه صديق للدكتور ابراهيم السبيعي..

ابراهيم السبيعي رئيس مجلس اداره .. عضو مشارك في بنك البلاد وله سلطه..
المهم كلمه قال انا بجده ولكن خله ينتظر او ارسله على احد ويخلص له اموره..

والسبت او الاحد بروح للرجال اللي ارسلني عليه..

عموما اسف لو طولت عليكم..
ولكن حبيت اقول الواسطه تلعب دور كبير في مسالة التوظيف بالسعوديه.. وهذي مشكلة عجزنالها..

واذا عندك شهاده تستاهل.. يعني بكالوريس مع دورات وخاصة اللغه توب فيها.. امورك بتتيسر مثل السلام عليكم..

وبالنهايه التوفيق من ربك سبحانه وتعالى..

خلوا املكم بربكم كبير.. والله يفعل ما يرد..

والله يوفقنا وياكم

اخوكم:
خالد

الله يعيننا وياكم والله العظيم حالتنا حاله ..