السلام عليكم ورحمة الله
اخواني في منتدى المشاريع والافكار يامن تشحذون عقولكم لتنيروا مستقبلكم لترفعوا عنكم عبودية الوظيفة وسلطانها .
قرأت مثلي مثل غيري في منتداكم هذا عن سوق الخضار المركزي في العزيزية بالرياض وعن اسواق جملة الخضار في مدن غير الرياض وكيف ان الربح والخير فيها , واشكر كل من شارك بتجربته ليفيدنا ويجلي الأمر لنا وادعوا الله ان يكون ذلك في ميزان حسناته
طبعا انا طرت بعجة اكبر من العجة الي جتنا قبل اسبوع
لكن قلت في نفسي اركد شوي ولاتحلم واجد عشان ماتنصدم بالواقع المر
الي فهمته من مواضيع الخضار بالمنتدى (وهي قديمة شوي ,يعني حوالي لها 3 شهور ) ان فيه حراج للخضار المحلية وانك تجي وتزايد عليها وتعطي الدلال ( المحرج) حقه وبعدها تاخذ بضاعتك وتصرفها, كيف تصرف البضاعة ؟ اما تكون مستاجر بسطة من ادارة السوق وهي غالية , اما تطلع برى السوق وتوديها لمحلك , اما تطلع برى السوق وتبيعها على محلات الخضرة او المطاعم والبوفيات , اما تطلع برى السوق وتبسط فيها قدام مسجد او اي مكان , اما تبيعها في مكانها عن طريق الدلال (يعني تبيعها بنفس الطريقة الي اشتريتها )
طبعا انا قلت لازم اطب السوق بنفسي وناخذ جولة عشان أتاكد بنفسي من هالكلام
رحت للسوق على صلاة الفجر وصليت بمسجد العامودي الي جنب السوق ,وطبيت السوق وتبين لي ان دخول السوق بالسيارة ب10 , انا موقف برى السوق ودخلت كعابي ( على رجولي
)
طبعا السوق كل ابوه اجانب بنقاليه على باكستانيه على هنود على يمانيين
والسعوديين ماتلقى الا الجيازنة الي ماتفرقهم عن اليمنيين ( وانا لا انتقص منهم هنا )
السوق مقسم للمستورد وللمحلي ومبنى للبرادات, رحت للمحلي ومشيت على البسطات واشوف الاسعار لكن مالقيت اي دلال يحرج عليها , طبعا التحميل عن طريق البنقالية الي معهم عربيات ويشيل لك على 15 او 10 بالرد الواحد
وعلى يسار المحلي فيه مواقف سيارات فيها جح (حب حب ) ويحرجون عليها .
زبدة الهرج
/
الاكيد ان اسعار الجملة منخفضة ومايبي لها راس مال كبير عشان ابدأ أتاجر , لكن المشكلة وين اقدر اصرف البضاعة ؟
الحراج داخل السوق ومالقيته
اصرفها خارج السوق على المحلات؟ المحل كم يبي كرتون ؟ كم محل تقدر تتفق معه ؟ التصريف للمحل الواحد راح يكون يومي او اسبوعي ؟ كم يكون ربحك على الصندوق الواحد ؟ هل تتفق انت وصاحب المحل على سعر معين بغض النظر عن تذبذب سعر الجملة من يوم لاخر؟ او على حسب سعر الجملة كل يوم بيومه ؟
ابسط بسيارتي بالشارع هذي يبيلها وقت طويل وفيها خطر البلدية
لكن قريت في موضوع ان الربح يستاهل , احد جرب هالشغلة ؟
وبالأخير ابي رجال شقردي اجودي نشمي سنايدي يشتغل بالسوق يعطيني رقمه ونتقابل هناك ويضبطني ويعلمني اسرار المهنة
وشكرا
03-04-2011, 08:38 AM
العرض الشجري
