الــــبداية و النهاية

عبادي عاطل · #1 (**permalink**) 18-11-2007, 02:57 AM

كل ما جيت ابتدي فيـك انتهيـت
وكل ما جيت انتهي شفتك بدايـه

ولو نظمتك بيت وفي قافي سريت
شاب قافي وانت ماجيت النهايـه

ولو كتبتك حرف وبكتابك قريـت
راح عمري بينك وبيـن الروايـه

ولو شربتك شوق ما ضني رويت
ولو رويتك زاد شوقي مع ضمايه

ولو نسيتك لحظـة كلـي بكيـت
ولو بكيتك صاحت اشواقي معايـه

ولو ذكرتك ونسيت انـي نسيـت
هلت دموعي وهـذا مـن وفايـه

كيف ابانسى من بروحي له فديت
وكيف ما اذكر غاية آمالي ومنايه

فالوفاء طبع ورثت وبـه عليـت
طول عمري نجمه يشع بسمايـه

ولو اذوق المر ما قلـت اكتفيـت
وانهلـه كلـه حـلا لا واهنايـه

ولو جروحي تشتكي لك ما شكيت
دامها منك انت انا ما ابغا دوايـه

وفوق جمر النزف لو منك استويت
ما اقول ارجوك يكفي لا حشايـه

لاني بسوق الغـلا كلـك شريـت
فرحك بحزنـي وراحتـك بعنايـه

فخلني ازعل الى منـك رضيـت
وانت بس ارضى وعده من خطايه

سقت حظي في دروبـك ومشيـت
ومشى حظي وانا اتبعه بخطايـه

يوم لبى القلب لأمرك مـا هقيـت
انه بيـوم يجيـك ومـن ورايـه

انت ميقاته ورامـك ثـم نويـت
آصلك مهما ابتعدت وعن مدايـه

محرم بالود وباحساسـي سعيـت
وطفت في كعبة غلاك وذي حكايه

ادري اني غايتك لو مـا دريـت
وتدري انك غايتي وانتـا رجايـه

وبحياتي غير ذنبـك مـا جنيـت
وبمماتي ما يبي ذنبـك وصايـه

ابتديتـك بالغـلا وفيـك انتهيـت
وانتهى فيك الغـلا وقلنـا كفايـه

وكل ما جيت انتهي فيك ابتديـت
وكل ما جيت ابتدي شفتك نهايـه